ދިވެހި ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންގެ ޚިދުމަތުގެ އަގުވަޒަންކުރެއްވުމުގެ ގޮތުން، 66 ބޭފުޅަކަށް ޝަރަފުގެ ބެޖާއި އައްޑަނަ އަދި ހަނދާނީލިޔުން މިއަދު އަރުވައިފިއެވެ.

މި އިނާމުތައް އެ ބޭފުޅުންނާ ހަވާލުކޮށްދެއްވީ ދިވެހިރާއްޖޭގެ މިނިވަން ދުވަހުގެ މުނާސަބަތުގައި ބޭއްވި ރަސްމީ ޖަލްސާގައެވެ.

Ad
rt

ދިވެހިރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި މިއަދު ހެނދުނު ޒުވާނުންގެ މަރުކަޒުގެ ހޯލުގައި ބޭއްވެވި މި ރަސްމީ ޖަލްސާގައި މި ޚިދުމަތްތެރީންނަށް ޝަރަފު އަރުވާފައިވަނީ ރައީސް ޑރ. މުޙައްމަދު މުޢިއްޒުއެވެ.

މި އިނާމު ލިބިވަޑައިގެން ބޮޑު ތިލަދުންމައްޗަށް ނިސްބަތްވެވަޑައިގަންނަވާ ބޭފުޅުން

އާސާނު، ށ. ފުނަދޫ، ޕްރިންސިޕަލް ހެލްތު ކެއަރ އެޑްމިނިސްޓްރޭޝަން އޮފިސަރ، ށ. އަތޮޅު ހޮސްޕިޓަލް
ކްރެސެންޓްވިލާ، ހދ. ފިނޭ، ފެމިލީ ހެލްތު އޮފިސަރ، ހދ. ފިނޭ ޞިއްޙީ މަރުކަޒު
ހައިލެޓް، ހދ. ކުޅުދުއްފުށި
ޝަބްނަމްއާގެ، ހއ. މޮޅަދޫ

މިއަދު ޝަރަފުގެ ބެޖާއި އައްޑަނަ އަދި ހަނދާނީލިޔުން ލިބިވަޑައިގެންނެވި ބޭފުޅުންގެ ތެރޭގައި ހިމެނިވަޑައިގަންނަވަނީ، ދައުލަތަށް 41 އަހަރަށްވުރެ ދިގު މުއްދަތަކަށް ޚިދުމަތް ކުރައްވައިފައިވާ ބޭފުޅުންނެވެ. މީގެ ތެރޭގައި ހިމެނެނީ މިހާތަނަށް އެއްވެސް ސަބަބަކާހުރެ މި އިނާމު އެރުވިފައިނުވާ ބޭފުޅުންނަށް މި އިނާމު އެރުވުމަށް ރައީސުލްޖުމްހޫރިއްޔާ ނިންމެވުމާ ގުޅިގެން ހޮވުނު ބޭފުޅުންނެވެ.

މި ބޭފުޅުން ހޮވުމުގައި ރައީސުލްޖުމްހޫރިއްޔާގެ އޮފީހުން އެ ބޭފުޅުންގެ ރެކޯޑުތައް ހޯއްދެވުމަށްފަހު، ޤައުމީ އިނާމާބެހޭ ކޮމިޓީއަށް ފޮނުއްވައި، އެ ކޮމިޓީން ވަނީ އެ މައުލޫމާތުތައް ދިރާސާކުރައްވާފައެވެ. އަދި ކޮމިޓީން އެ ބޭފުޅުންނާ ބައްދަލުކުރައްވައި، އިނާމަށް ޝަރުޠު ފުރިހަމަވާކަން ކަށަވަރުކުރައްވާފައިވެއެވެ.

ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންގެ އަގު ވަޒަންކުރުމަކީ މި ސަރުކާރުން ޚާއްޞަ އިސްކަމެއް ދެއްވައިގެން ކުރިއަށްގެންދަވާ ކަމެކެވެ. މިއަދުގެ ޖަލްސާގައި އިނާމު ލިބިވަޑައިގެންނެވި ހުރިހާ ބޭފުޅުންނަކީވެސް ގައުމީ ތަރައްގީގައާއި ދައުލަތް ހިންގުމުގެ އެކި ދާއިރާތަކުގައި ނަމޫނާ ޚިދުމަތްތަކެއް ކޮށްދެއްވާފައިވާ ބޭފުޅުންނެވެ.