އީރާނުން އަމިއްލައަށް ކަނޑައަޅައިގެން މިސައިލްތަކަށް ޒަމާނުއްސުރެ ގެންގުޅުނު 2،000 ކިލޯމީޓަރުގެ ލިމިޓް ނައްތާލައި، މިހާރު 4،500 ކިލޯމީޓަރު (ގާތްގަނޑަކަށް 2،800 މޭލު) ދުރުގައި ހުންނަ އަމާޒުތަކަށް ހަމަލާދިނުމުގެ ގާބިލުކަން ލިބިފައިވާ މިސައިލްތައް އެ ގައުމުގައި އެބަހުރި ކަމަށް އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފިއެވެ.
މިއާއެކު، ޔޫރަޕާއި އިނގިރޭސިވިލާތުގައި ހުރި އެމެރިކާ އަދި އެ ގައުމުތަކުގެ އިއްތިހާދީ އަސްކަރީ މަރުކަޒުތައް އީރާނުގެ މިސައިލްތަކުގެ ރޭންޖުގެ ތެރެއަށް ވަނީ ވަދެފައެވެ.
އައިއާރުޖީސީގެ ތަރުޖަމާނު ބްރިގޭޑިއާ ޖެނެރަލް ހުސައިން މުހައްބީ ވިދާޅުވީ، މީގެ ކުރިން ބެހެއްޓި 2،000 ކިލޯމީޓަރުގެ ލިމިޓަކީ ޓެކްނިކަލް ގޮތުން ނުކުޅެދިގެން ކަނޑައެޅި ހައްދެއް ނޫން ކަމަށާއި، އެއީ އީރާނުގެ ކުރީގެ ސުޕްރީމް ލީޑަރުގެ އަމުރުފުޅަކަށް ކަނޑައެޅި ސްޓްރެޓީޖިކް ހިފެހެއްޓުމެއް ކަމަށެވެ. އަދި މިހާރުގެ ސުޕްރީމް ލީޑަރު އެފަދަ އަމުރެއް ދެއްވައިފިނަމަ، ޖިއޮގްރަފީގެ އެއްވެސް ހުރަހެއް ނެތި އަސްކަރީ އޮޕަރޭޝަންތައް ހިންގުމުގެ ފުރިހަމަ ގާބިލުކަން އީރާނުގެ އަސްކަރިއްޔާއަށް މިހާރު ލިބިފައިވާ ކަމަށް އޭނާ ވަނީ ވިދާޅުވެފައެވެ.
މިސައިލްގެ ދުރުމިން 4،500 ކިލޯމީޓަރަށް ފުޅާކުރުމުން މުޅި ޔޫރަޕް ބައްރާއި އިނގިރޭސިވިލާތް ވެސް މިހާރު އޮތީ އީރާނުގެ ހަމަލާތަކެއް އަމާޒުވެދާނެ ސަރަހައްދެއްގެ ގޮތުގައެވެ. މި ހަފުތާގެ ކުރީކޮޅު އީރާނުގެ ދައުލަތާ ގުޅުން ހުރި މީޑިއާތަކުން ވަނީ، އީރާނާ ގާތްގަނޑަކަށް 4،500 ކިލޯމީޓަރު ދުރުގައި އޮންނަ އަދި އެމެރިކާގެ ބޮންއަޅާ ބޯޓުތަކުގެ މައި މަރުކަޒެއް ކަމަށްވާ އިނގިރޭސިވިލާތުގެ އާރްއޭއެފް ފެއަރފޯޑް ބޭހަކީ، އީރާނުން ބަދަލުތައް ގެނެސްފައިވާ "ޚުރަމްޝަހްރު" ބެލިސްޓިކް މިސައިލްގެ އަމާޒަކަށް ވެދާނެ ތަނެއްގެ ގޮތުގައި ފާހަގަކޮށްފައެވެ.
އީރާނުގެ މިސައިލްތަކުގެ ރޭންޖު އިތުރުވެފައިވާކަން ސާބިތުކޮށްދެއްވުމުގެ ގޮތުން މުހައްބީ ވަނީ، އިންޑިއާ ކަނޑުގައި އޮންނަ އެމެރިކާ އަދި އިނގިރޭސިވިލާތުގެ ގުޅިފައިވާ އަސްކަރީ މަރުކަޒު ކަމަށްވާ ޑިއޭގޯ ގާސިއާއާ ދިމާލަށް އީރާނުން މީގެ ކުރިން ހިންގި މިސައިލް ހަރަކާތްތަކަށް އަލިއަޅުއްވާލައްވާފައެވެ. އީރާނުގެ ސަރަހައްދުން ފެށިގެން އެ މަރުކަޒާ ދެމެދު ގާތްގަނޑަކަށް 3،800 އާއި 4،500 އާ ދެމެދުގެ ކިލޯމީޓަރު ހުރެއެވެ. ހުޅަނގުގެ ޖާސޫސީ ރިޕޯޓުތައް ބުނާ ގޮތުގައި، 2026 ވަނަ އަހަރުގެ މާޗު މަހުގެ ތެރޭގައި ޑިއޭގޯ ގާސިއާއާ ދިމާލަށް އީރާނުން ދެ ބެލިސްޓިކް މިސައިލް ފޮނުވާލިއެވެ. އޭގެ ތެރެއިން އެއް މިސައިލަށް ދަތުރުމަތީގައި ޓެކްނިކަލް މައްސަލަތަކެއް ދިމާވި އިރު، އަނެއް މިސައިލް ވަނީ އެމެރިކާގެ އަސްކަރީ މަނަވަރަކުން ވައްޓާލާފައެވެ.
އީރާނުގެ އަތުގައި ގިނަ އަދަދަކަށް ބޭނުންކުރެވޭ ފަދަ 4،500 ކިލޯމީޓަރުގެ މިސައިލް އެބަހުރިކަން ހުޅަނގުގެ ދިފާއީ ދިރާސާކުރާ ފަރާތްތަކަށް އަދި މިނިވަންކަމާއެކު ކަށަވަރުކުރެވިފައެއް ނުވެއެވެ. އެހެންނަމަވެސް، ފަހުގެ ޖާސޫސީ އަންދާޒާތަކުން ދައްކާ ގޮތުގައި، އެމެރިކާ އާއި އިސްރާއީލުން އެތައް މަހެއް ވަންދެން ދިން ވައިގެ ހަމަލާތަކަށް ފަހު ވެސް، ހަނގުރާމައިގެ ކުރިން އީރާނުގައި ހުރި މިސައިލް ސްޓޮކުގެ ގާތްގަނޑަކަށް ދެބައިކުޅައެއްބައި، އެއީ 1،500 އާއި 2،500 އާ ދެމެދުގެ އަދަދަކަށް ބެލިސްޓިކް މިސައިލް އަދިވެސް ތެހެރާންގެ ބާރުގެ ދަށުގައި އެބަހުއްޓެވެ.
އީރާނުން މިފަދައިން ބުނެފައި މިވަނީ އެ ގައުމާ ދެކޮޅަށް ފުޅާ ދާއިރާއެއްގައި އަސްކަރީ ވަރުގަދަ އާ ހަމަލާތަކެއް ދިނުމުގެ ހުއްދަ ދެއްވުމާމެދު އެމެރިކާގެ ރައީސް ޑޮނަލްޑް ޓްރަމްޕް ވިސްނަވަމުން ގެންދަވާ ދަނޑިވަޅެއްގައެވެ. އެހެންކަމުން މިއީ ވޮޝިންޓަނަށާއި ޔޫރަޕްގެ އިއްތިހާދީ ގައުމުތަކަށް އަމާޒުކޮށް، އެފަދަ ހަމަލާއަކުން ފަސްޖެއްސުމުގެ ގޮތުން ދިން ސީދާ އިންޒާރެއް ކަމަށް މަސްރަހް ދިރާސާކުރާ ބައެއް ފަރާތްތައް ގަބޫލުކުރެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!