މާލޭގައި ތޫނު އެއްޗެހިން ހަމަލާދީ މަރާލި އަބްދުލްމުހީތު (ބޮބީ) ގެ މަރުގެ މައްސަލާގައި މަރަން ހުކުމް ކޮށްފައިވާ ކުޑަކުއްޖެއްގެ މައްޗަށް މަރުގެ އަދަބު ނުދެވޭނެ ކަމަށް ސުޕްރީމް ކޯޓުން މިއަދު ހުކުމްކޮށްފި އެވެ.
ފިނޭންސް މިނިސްޓްރީ ކުރިމަތީގައި 2012 ވަނަ އަހަރު ގ. ވޭރު، މުހީތު ހުއްޓާ ގްރޫޕަކުން ގޮސް އޭނާއަށް ހަމަލާދީ މަރާލި މައްސަލާގައި ޖުވެނައިލް ކޯޓުން 2013 ވަނަ އަހަރު ދެ ކުއްޖެއްގެ މައްޗަށް މަރުގެ ހުކުމް އިއްވި އެވެ. އެ މީހުން އެ ކުށްކުރީ 18 އަހަރު ނުފުރެނީސް ކަމަށްވިޔަސް, އެ މީހުންނަށް ހުކުމްކުރީ 18 އަހަރުވިފަހުންނެވެ.
އެ ހުކުމަށް ހައި ކޯޓުން ތާއީދުކޮށްފައި ވަނިކޮށް އެ މައްސަލަ ސުޕްރީމް ކޯޓުގައި އޮއްވާ ފަހުން އަމަލުކުރަން ފެށި ކުޑަކުދިންގެ އަދުލުގެ ގާނޫނު އޮންނަ ގޮތުން އުމުރުން 18 އަހަރު ފުރުމުގެ ކުރިން ކުއްޖަކު ކޮށްފައިވާ ކުށަކަށް މަރުގެ އަދަބެއް ނުދެވޭނެ އެވެ.
މުހީތުގެ ދެ ގާތިލުންގެ އިސްތިއުނާފް 10 އަހަރު ފަހުން ފަށައިފި
ސުޕްރީމް ކޯޓުން މިއަދު ކުރި ހުކުމްގައި ބުނީ ކުޑަކުއްޖެއްގެ މައްޗަށް މަރުގެ އަދަބު ދިނުމަކީ ކުޑަކުދިންގެ އަދުލުގެ ގާނޫނުން މިހާރު ހުއްދަ ކުރާ ކަމަކަށް ނުވާތީ އެ އަދަބު ނުދެވޭނެ ކަމަށެވެ. އެހެންވެ, ޖުވެނައިލް ކޯޓާއި ހައި ކޯޓުގެ ހުކުމް ބާތިލްކޮށް، އެ މައްސަލަ އަލުން ބެލުމަށް ޖުވެނައިލް ކޯޓަށް ވަނީ ފޮނުވައިފަ އެވެ.
މުހީތުގެ މަރާ ގުޅިގެން އެހެން ދެ މީހަކު ވެސް މެރުމަށް ކްރިމިނަލް ކޯޓުން ހުކުމްކޮށްފައިވެ އެވެ. އެ މައްސަލަ އަދިވެސް އޮތީ ހައި ކޯޓުގަ އެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!