ކުރީ ސަރުކާރުގެ ލިސްޓުން ޝަރުތު ހަމަނުވާ މީހުން އުނިކޮށް، ސެޕްޓެމްބަރުގެ ނިޔަލަށް ފްލެޓް ހަވާލުކުރަނީ

ހުޅުމާލޭގައި ގެދޮރުވެރިޔާ ސްކީމްގެ ދަށުން ކުރިއަށްދާ 4،000 ފްލެޓްގެ މަޝްރޫޢު އަންނަ ސެޕްޓެމްބަރު މަހުގެ ނިޔަލަށް ނިންމައި، ފްލެޓްތައް ހައްގުވެރިންނާ ހަވާލުކުރުމަކީ މި ސަރުކާރުގެ އަމާޒު ކަމުގައި ހައުސިންގ މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެ އެވެ.

ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައި މިނިސްޓަރު ހާމަކުރެއްވި ގޮތުގައި މިހާތަނަށް 1،000 ފްލެޓްގެ އަމަލީ މަސައްކަތް ވަނީ ނިމިފައެވެ. މި ފްލެޓްތަކަށް އަސާސީ ހިދުމަތްތައް ކަމުގައިވާ ފެން، ނަރުދަމާ އަދި ކަރަންޓު ގުޅުމުގެ މަސައްކަތް މިހާރުދަނީ ކުރެވެމުންނެވެ. މިނިސްޓަރުގެ އުއްމީދަކީ ޖުލައި މަހުގެ ތެރޭގައި މި 1،000 ފްލެޓަށް ހިދުމަތްތައް ފޯރުކޮށްދެވޭނެ ކަމަށް ވިދާޅުވި އެވެ.

ފްލެޓްތައް ހަވާލުކުރުމުގައި، ނިމޭ ފްލެޓްތަކުގެ އެއްބަސްވުން ހެދުމުގައި އިސްކަންދޭނީ ފްލެޓް ލިބޭ ފަރާތްތަކުގެ ތަރުތީބަށް ބަލައިގެންނެވެ. ސަރުކާރުގެ ޕްލޭނަކީ އަންނަ މަހުގެ ނިޔަލަށް އިތުރު 1،000 ފްލެޓް ނިންމުމަށްފަހު، ސެޕްޓެމްބަރު މަހުގެ ނިޔަލަށް މުޅި 4،000 ފްލެޓްގެ މަޝްރޫޢު ފުރިހަމަކުރުމެވެ.

ސަރުކާރުން މިހާރު ވަނީ 2023 ވަނަ އަހަރުގެ ނޮވެމްބަރު މަހު ކުރީގެ ސަރުކާރުން ނެރުނު ލިސްޓަށް ފްލެޓް ދިނުމަށް ނިންމާފައެވެ. ނަމަވެސް، މި ލިސްޓުން ޝަރުތު ހަމަނުވާ ފަރާތްތައް އުނިކުރެވޭނެއެވެ. އަދި މާލޭގައި މެދުނުކެނޑި ދިރިއުޅުނުކަން ސާބިތުކުރުމަށް އިތުރު ލުއިތަކެއް ގެނެސް، 2007 ގެ ކުރިން މާލޭގައި ދިރިއުޅުނުކަން ސާބިތުވާ ފަރާތްތަކަށް އިތުރު ފުރުސަތުތަކެއް ދެވޭނެއެވެ.