ދިވެހިރާއްޖެއަށް ކުރިމަތިވެފައިވާ މާލީ އަނދަވަޅުން އަރައިގަތުމަށް ދައުލަތުގެ މުވައްޒަފުންގެ އަދަދު މަދުކުރަން ރައީސް ޑރ. މުޙައްމަދު މުޢިއްޒު ނިންމަވައި އެކަން މިއަދު ޢިއުލާންކުރަށްވައިފިއެވެ.
ރައީސް މިއަދު މީސްމީޑިއާ މެދުވެރިކޮށް ވަނީ މިކަން ޢިއުލާން ކުރަށްވާފައެވެ.
މިކަން ހާމަކުރަށްވައި ރައީސް ކުރެއްވި ޕޯސްޓްގައި ވިދާޅުވެފައި ވަނީ ސަރުކާރުގެ އިގުތިސާދު ރިފޯމް އެޖެންޑާގެ ދަށުން ސަރުކާރުގެ އެކި ވުޒާރާތަކުން 228 ސިޔާސީ މުވައްޒަފުން ވަކިކުރަން އަންގާފައިވާ ކަމަށެވެ.
މި ފިޔަވަޅު ކުރިއަށް އޮތް 15 ދުވަހުގެ ތެރޭގައި ތަންފީޒު ކުރުމަށް ރައީސް އަަންގަވާފައިވާއިރު، ރައީސް ވިދާޅުވެފައިވާ ގޮތުގައި ވަކިކުރަން އަންގަވާފައި ވަނީ އޭގެ ހަތް ސްޓޭޓް ވަޒީރުންނާއި 43 ނައިބު ވަޒީރުންނާއި 109 ސީނިއާ ޕޮލިޓިކަލް ޑިރެކްޓަރުން އަދި 69 ޕޮލިޓިކަލް ޑިރެކްޓަރުންނެވެ.
މި ނިންމެވުމާއެކު ދައުލަތުގެ ބަޖެޓުން މަހަކު 5.714 މިލިޔަން ރުފިޔާ ސަލާމަތްކުރެވޭނެ ކަމަށް ވެސް ރައީސް ވަނީ ވިދާޅުވެފައެވެ.
As part of the Economic Reform Agenda, as a direct cost cut down measure, I have today instructed to remove 228 political appointees from various government ministries within the next 15 days. This includes 7 State Ministers, 43 Deputy Ministers, 109 Senior Political Directors…
— Dr Mohamed Muizzu (@MMuizzu) October 15, 2024
ރާއްޖޭގެ އިޤްތިޞާދު ހަމަމަގަށް އެޅުވުމަށް ސަރުކާރުން ފަށާފައިވާ މަސައްކަތުގެ ތެރެއިން ދައުލަތަށް އާމްދަނީ އިތުރުކުރުމާއި ގުޅޭ ބައެއް ބިލުތަކުގެ މަސައްކަތް އިއްޔެއިން ފެށިގެން ރައްޔިތުންގެ މަޖިލީހުން ވަނީ ފަށާފައެވެ.
އޭގެ ތެރޭގައި ޓީޖީއެސްޓީއާއި، ގްރީން ޓެކްސް އަދި އެއާޕޯޓުން ފުރާ މީހުން އަތުން ނަގާ ފީ ބޮޑުކުރުން ހިމެނެއެވެ. އެއާޕޯޓުން ފުރާ އިކޮނޮމީ ކްލާހުގައި ދަތުރުކުރާ ދިވެހިން އަތުން ނަގާ ފީ ބޮޑުކުރަން ސަރުކާރުން ނިންމާފައެއް ނުވެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!