ހަ ދާއިރާއަކަށް ކައުންސިލަރުން އިންތިޚާބުކުރުމަށް އިލެކްޝަން ކޮމިޝަން (އީސީ) އިން މިއަދު ކުރިއަށް ދިޔަ ބައި-އިލެކްޝަންގެ ފަސް ގޮނޑި ވެރިކަންކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ކާމިޔާބުކޮށްފިއެވެ.
މިގޮތުން ޕީއެންސީން ކުޅުދުއްފުށީ ސިޓީ ކައުންސިލްގެ ކުޅުދުއްފުށީ އުތުރު ދާއިރާގެ ގޮނޑީގެ އިތުރުން ކާމިޔާބުކޮށްފައި ވަނީ މާލޭ ސިޓީ ކައުންސިލްގެ ހެންވޭރު ހުޅަނގު ދާއިރާ، ހުޅުމާލެ ދާއިރާ، މައްޗަންގޮޅި މެދު ދާއިރާ އަދި ފ. ބިލެތްދޫ ކައުންސިލް ރައީސްގެ ގޮނޑިއެވެ.
ޕީއެންސީ އަށް ކާމިޔާބު ނުވީ ހަމައެކަނި ރ. ރަސްމާދޫ ކައުންސިލްގެ އަންހެނުންނަށް ޚާއްޞަ ގޮނޑިއެވެ. އެ ގޮނޑި ކާމިޔާބުކުރީ އަމިއްލަ ކެންޑިޑޭޓެކެވެ.
ކުޅުދުއްފުށީ ސިޓީ ކައުންސިލްގެ ކުޅުދުއްފުށީ އުތުރު ދާއިރާގެ ގޮނޑި ކާމިޔާބު ކުރީ އިބްރާޙީމް މުޙައްމަދެވެ. އަދި ފ. ބިލެތްދޫ ކައުންސިލް ރައީސްގެ ގޮނޑި ކާމިޔާބު ކުރީ އަރީހް އިސްމާއީލް އެވެ.
— Elections Commission (@ElectionsMv) July 20, 2024
މާލޭ ސިޓީ ކައުންސިލްގެ ހެންވޭރު ހުޅަނގު ދާއިރާގެ ގޮނޑި ކާމިޔާބު ކުރީ ފާތިމަތު ސައުފާ ސަލީމް އެވެ. މައްޗަންގޮޅި މެދު ދާއިރާގެ ގޮނޑި ކާމިޔާބު ކުރީ ފާތިމަތު އިޝާން ޢަލީ އެވެ. އަދި ހުޅުމާލެ ދާއިރާ ގޮނޑި ކާމިޔާބު ކުރީ ޢަލީ އައިމަން އެވެ.
މި ކެންޑިޑޭޓުންގެ ކާމިޔާބަށް ޕީއެންސީން ވަނީ މަރުޙަބާ ކިޔާފައެވެ.
މިއަދުގެ ބައި-އިލެކްޝަންގައި އިދިކޮޅު ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އަށް އެއްވެސް ގޮނޑިއެއް ކާމިޔާބު ކުރެވިފައެއް ނުވެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!