ރ. ފުއްގިރި މައްސަލާގައި ކުރީގެ ރައީސް އަބްދުالله ޔާމީނާއި ސަން ކުންފުނީގެ މައްޗަށް ކުރާ ދައުވާގައި އެމްޑީއޭގެ ލީޑަރު އަހުމަދު ސިޔާމާއި އެ ޕާޓީގެ ޑެޕިއުޓީ ލީޑަރު އަލީ މައުރޫފް ހެކިބަސް ދެއްވަން ދެކޮޅު ހައްދަވައިފި އެވެ.
ފުއްގިރި މައްސަލާގައި ރިޝްވަތުގެ ގޮތުގައި 1.1 މިލިއަން ޑޮލަރު ހޯދައި، އެ ފައިސާ ލޯންޑާކުރި ކަމަށް ބުނެ ކުރީގެ ރައީސް އަބްދުﷲ ޔާމީންގެ މައްޗަށް މި މައްސަލާގައި މަނީ ލޯންޑަރިން އާއި ރިޝްވަތުގެ ދައުވާކުރެ އެވެ. މި މައްސަލާގައި ސަން ކޮންސްޓްރަކްޝަން ކުންފުންޏާއި ސަން އިންވެސްޓްމަންޓްގެ މައްޗަށް ވެސް ވަނީ މަނީ ލޯންޑްރިންގެ ދައުވާކޮށްފަ އެވެ.
މިއަދުގެ އަޑުއެހުމުގައި މައްސަލަ ބައްލަވާ ގާޒީ އަލީ ނަދީމް ވިދާޅުވީ ހެކިބަސް ދެއްވަން ކޯޓަށް ހާޒިރުވާން ބޭނުން ނުވާ ކަމަށް ބަޔާންކޮށް، ސިޔާމާއި މައުރޫފް ސިޓީ ފޮނުއްވާފައިވާ ކަމަށެވެ. އަދި ދައުލަތުގެ ވަކީލުން ވެސް ބުނީ އެ ދެ ބޭފުޅުންގެ ހެކިބަސް ނަގަން މިހާރު ބޭނުން ނުވާ ކަމަށެވެ.
މިއަދު އޮތް އަޑުއެހުމުގައި ކުރީގެ ނައިބު ރައީސް އަހުމަދު އަދީބުގެ ބޮޑީގާޑް އަހުމަދު އާމިރު ހެކިބަސް ދީފައިވާއިރު، އޭނާ ވަނީ އަދީބާއި ޒިޔަތާ އެކު ބޭއްވި ބައްދަލުވުމެއްގައި މައުރޫފާއި ސިޔާމްގެ ކޮއްކޮއެއް ކަމަށްވާ ސާލިމް ބައިވެރިވި ކަމަށް ބުނެފަ އެވެ.
ސިޔާމާއި މައުރޫފްގެ އިތުރުން ވެސް އެހެން ދެ ހެއްކަކު ވަނީ ހެކިބަސް ދޭން ބޭނުން ނުވާ ކަމަށް ބުނެ ކޯޓަށް ހުށަހަޅައިފަ އެވެ. އެ ދެ ހެކިވެރިންގެ ހެކިބަސް ނަގަން ވެސް ދައުލަތުން މިހާރު ބޭނުމެއް ނުވެ އެވެ.
މި މައްސަލާގައި ދެން ހެކިބަސް ނަގަން ބާކީ ތިބީ ދެ ހެކިންގެ އެވެ. އެ އަޑުއެހުން އަންނަ ބުރާސްފަތި ދުވަހަށް ވަނީ ތާވަލުކޮށްފަ އެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!