ފެބްރުއަރީ 2026 އާ ހަމައަށް ލިބިފައިވާ ފަހުގެ ސެޓެލައިޓް ފޮޓޯތަކުން ހާމަވާގޮތުގައި، އެމެރިކާ ނުވަތަ އިސްރާއީލުން ދީފާނެ ވައިގެ ހަމަލާތަކަކުން ރައްކާތެރިވުމަށްޓަކައި، އީރާނުގެ މުހިންމު އަސްކަރީ އަދި ނިއުކްލިއާ މަރުކަޒުތަކެއްގެ މަތީގައި ކޮންކްރީޓްގެ ބޮޑު "ނިވާފަތްގަނޑެއް" ނުވަތަ "ސާކޯފަގަސް" އެއް ބިނާކުރުމުގެ މަސައްކަތް އީރާނުން ކުރަމުން އަންނަކަމަށް ރިޕޯޓްތައް ބުނެފިއެވެ.

މި މަސައްކަތް ކުރިއަށްދަނީ މެދުއިރުމަތީގައި މަސްލަހަތު ވަރަށް ބޮޑަށް ގޯސްވެ، އެމެރިކާގެ އަސްކަރީ ބާރުތައް އެ ސަރަހައްދުގައި ވަރުގަދަކޮށްފައިވާ ދަނޑިވަޅެއްގައެވެ.

Ad
rt

ޕާޗިންގައި ހަދާފައިވާ "ކޮންކްރީޓް ސާކޯފަގަސް"

ތެހެރާންގެ އިރުދެކުނުގައިވާ ޕާޗިން އަސްކަރީ ކޮމްޕްލެކްސްގައި، "ތާލެގާން 2" ގެ ނަމުން ނަންދެވިފައިވާ އާ މަރުކަޒެއްގެ މަތީގައި އީރާނުން ވަނީ ވަރުގަދަ ކޮންކްރީޓް އޮނިގަނޑެއް ބިނާކޮށްފައެވެ. އިންސްޓިޓިއުޓް ފޯ ސައިންސް އެންޑް އިންޓަނޭޝަނަލް ސެކިއުރިޓީ (އައިއެސްއައިއެސް) ގެ މާހިރުން ފާހަގަކުރާ ގޮތުގައި، 2026 ފެބްރުއަރީގެ މެދަކާ ހަމައަށް އައިއިރު، އެ މަރުކަޒު ވަނީ ކޮންކްރީޓާއި ފަސްގަނޑުގެ ދަށުގައި އެއްކޮށް ފޮރުވާލާފައެވެ. މީގެ ސަބަބުން އެއީ ކޮން ތަނެއްކަން ވަކިކުރަން ނޭނގޭ ފަދަ ހާލަތަކަށް ގޮސްފައިވާއިރު، ވައިގެ މަގުންދޭ ހަމަލާތަކަށް އެތަން ވަރަށް ބޮޑަށް ކެތްކުރާނެ ކަމަށް ބެލެވެއެވެ.

މީގެ ކުރިން އެނަލިސްޓުންނަށް ފާހަގަކުރެވިފައިވާ ގޮތުގައި، ތާލެގާން 2 ގެ ތެރޭގައި 36 މީޓަރު ދިގު ސިލިންޑަރު ބައްޓަމުގެ ކޭމްބަރެއް ހުއްޓެވެ. މިއީ ނިއުކްލިއާ ހަތިޔާރު އުފެއްދުމަށް ބޭނުންވާ މުހިންމު ބައެއް ކަމަށްވާ "ހައި-އެކްސްޕްލޯސިވްސް ކޮންޓެއިންމަންޓް ވެސެލް" އެއް ކަމަށް ތަޖުރިބާކާރުން ލަފާކުރެއެވެ.

އީރާނުގެ މުހިންމު މަރުކަޒުތައް ރައްކާތެރިކުރުމަށް ވަރުގަދަ ކޮންކްރީޓް ޝީލްޑްތައް ބިނާކުރަމުންދާ ސެޓެލައިޓް ފޮޓޯ: އަލްޖަޒީރާ

އެހެނިހެން މަރުކަޒުތައް ވަރުގަދަކުރުން

ޕާޗިންގެ އިތުރުން، އިސްފަހާންގައި ހުންނަ ބިމުގެ އަޑީގައިވާ ނިއުކްލިއާ ކޮމްޕްލެކްސްއަށް ވަންނަން ހުންނަ ޓަނަލްތަކުގެ ދޮރުތައް ވެސް ވަނީ ފަސްއަޅައި ބައްދާލައި، ހާއްސަ ސިފައިންގެ ރޭޑްތަކާއި "ބަންކަރ-ބަސްޓަރ" ބޮންތަކުން ސަލާމަތްވުމަށްޓަކައި ވަރުގަދަކޮށްފައެވެ. ހަމައެހެންމެ، ނަޠަންޒްގައި ހުންނަ އެންޑްވާންސް ސެންޓްރިފިއުޖްތައް ރޭވުމާއި ޔުރޭނިއަމް މުއްސަނދިކުރުމުގެ މަސައްކަތްތައް ރައްކާތެރިކުރުމަށްޓަކައި، ކައިރީގައިވާ ފަރުބަދަތަކުގެ އަޑީގައިވާ ޓަނަލްތަކުގެ ދޮރުތައް ވަރުގަދަކުރުމުގެ މަސައްކަތް ދަނީ ކުރަމުންނެވެ. އަދި ޤުމް އާއި ޝީރާޒްގައި ހުރި، މީގެ ކުރިން ހަމަލާތަކުގައި ގެއްލުން ލިބުނު މިސައިލް މަރުކަޒުތައް ވެސް ހަލުވިކަމާއެކު މަރާމާތު ކުރަމުންދާކަން ވަނީ ފާހަގަކުރެވިފައެވެ.

އެމެރިކާ-އީރާން ނުތަނަވަސްކަމުގެ ފަސްމަންޒަރު

މި މަރުކަޒުތައް ވަރުގަދަކުރުމުގެ މަސައްކަތް ކުރިއަށްދަނީ ވޮޝިންޓަނާއި ތެހެރާނާ ދެމެދު އިންތިހާއަށް ނުތަނަވަސްކަން ބޮޑުވެފައިވާ ދަނޑިވަޅެއްގައެވެ. އެމެރިކާއިން ވަނީ އެ ސަރަހައްދަށް ޔޫ.އެސް.އެސް އަބްރަހަމް ލިންކަން އަދި ޔޫ.އެސް.އެސް ޖެރަލްޑް އާރް. ފޯޑް މަނަވަރު ހިމެނޭ ކެރިއަރ ސްޓްރައިކް ގްރޫޕްތައް ފޮނުވައި، ވައިގެ އަދި ކަނޑުގެ ބޮޑު ފައުޖެއް ރުކުރުވާލާފައެވެ. މިއީ 2003 ވަނަ އަހަރު އިރާގަށް އެރި ފަހުން މެދުއިރުމަތީގައި އެމެރިކާގެ ވައިގެ ސިފައިންގެ ބާރު މިހާ ބޮޑަށް ވަރުގަދަކުރި ފުރަތަމަ ފަހަރެވެ.

މި ނުތަނަވަސްކަމުގެ ތެރޭގައި ޖެނީވާ އަދި އޮމާންގައި ނުސީދާ ވާހަކަތަކެއް ދެކެވުނު ނަމަވެސް، އެމެރިކާގެ ސަރުކާރުން ވަނީ ޔުރޭނިއަމް މުއްސަނދިކުރުން އެއްކޮށް ހުއްޓާލުމަށް ބާރުއަޅައި "ޒީރޯ އެންރިޗްމަންޓް" ސިޔާސަތެއް ގެންގުޅެން ފަށާފައެވެ. އީރާނުން އެގައުމުގެ އަސްކަރީ އަދި ނިއުކްލިއާ އިންފްރާސްޓްރަކްޗާ ވަރުގަދަކުރަމުން މިދަނީ މިފަދަ ހަރުކަށި ފިއްތުންތަކާއި ކުރިމަތިވެފައިވާ ދަނޑިވަޅެއްގައެވެ.

މި ފިޔަވަޅުތައް އަޅަމުން މިދަނީ 2025 ޖޫން މަހު އެމެރިކާ، އިސްރާއީލް އަދި އީރާނާ ދެމެދު 12 ދުވަހަށް ދެމިގެންދިޔަ ހަނގުރާމައަށް ފަހުގައެވެ. އެ ހަނގުރާމައިގައި އީރާނުގެ ނިއުކްލިއާ އަދި މިސައިލް އޮނިގަނޑުތަކަށް އަމާޒުކޮށް ހަމަލާތަކެއް ދީފައިވެއެވެ.