ރާއްޖޭގެ މަރުކަޒީ ބޭންކް، މޯލްޑިވްސް މޮނިޓަރީ އޮތޯރިޓީ (އެމްއެމްއޭ) އިން ތަރައްގީކޮށް އަމަލީ ގޮތުން ބޭނުންކުރަމުން އަންނަ "ފަވަރަ" ނިޒާމުގައި ބައިވެރިވުމަށްޓަކައި ފަހިޕޭއާއެކު ރަސްމީކޮށް އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގެ މައިގަނޑު ބޭނުމަކީ، ފަވަރަ ނިޒާމުގެ ތެރެއިން އާންމުންނަށް ފަސޭހަކަމާއެކު މާލީ މުއާމަލާތްތައް ކުރުމުގެ ފުރުސަތު ފަހިޕޭ މެދުވެރިކޮށް ފަހިކޮށްދިނުމެވެ. އެމްއެމްއޭއާއެކު ވެވުނު މި އެއްބަސްވުމާއެކު، ފަހިޕޭއަށް އެ ނިޒާމުގެ ހިދުމަތްތައް ފޯރުކޮށްދިނުމުގެ ގާނޫނީ އަދި އިދާރީ ހުއްދަ ލިބިގެންދާނެއެވެ.

Ad
rt

މި އެއްބަސްވުމާ ގުޅޭގޮތުން އެމްއެމްއޭއިން ބުނީ، މިއަދު ސޮއިކުރެވުނު އެއްބަސްވުމަށްފަހު ދެން އޮންނާނީ ފަހިޕޭގެ ފަރާތުން ކުރިއަށްގެންދަންޖެހޭ ޕައިލެޓް ޓެސްޓިންގ މަރުހަލާ ކަމަށެވެ. އެގޮތުން، މި ނިޒާމުގެ ބައިވެރިއެއްގެ ގޮތުގައި ރަސްމީ ސިފައެއްގައި ހިދުމަތް ފެށުމަށްޓަކައި ވާންޖެހޭ އެންމެ ފަހުގެ ފަންނީ އަދި އޮޕަރޭޝަނަލް ތައްޔާރީތައް އެ ކުންފުނިން މިހާރު ދަނީ ފުރިހަމަކުރަމުންނެވެ.

މިފަދަ ޒަމާނީ ހިދުމަތްތަކުގެ ސަބަބުން ރާއްޖޭގައި ކުރެވޭ ޑިޖިޓަލް ފައިސާގެ މުއާމަލާތްތައް އިތުރަށް ހަލުވިވެ، އާންމު ރައްޔިތުންނަށް އެތައް ފަސޭހަތަކެއް ލިބިގެންދާނެއެވެ. މީގެއިތުރުން، ފައިސާގެ މުއާމަލާތް ކުރުމުގައި ބޭންކުތައް ނޫން ފަރާތްތަކަށް ވެސް މިފަދަ ގައުމީ ފެންވަރުގެ ނިޒާމުތަކުގެ ތެރެއިން ފުރުސަތު ފަހިވުމަކީ ރާއްޖޭގެ މާލީ ދާއިރާގައި ވާދަވެރިކަން އިތުރުވެ، ހިދުމަތްތައް ފުޅާ ދާއިރާއެއްގައި ކުރިއަރައިގެންދާނެ ކަމެކެވެ.

"ފަވަރަ" ނިޒާމަކީ މާލީ ހިދުމަތްތަކާ ދުރުގައި ތިބި ނުވަތަ ބީރައްޓެހި ފަރާތްތަކަށާއި، ބޭންކް އެކައުންޓެއް ނެތް މީހުންނަށްވެސް ފަސޭހައިން ބޭނުންކުރެވޭ ގޮތަށް ބައްޓަންކޮށްފައިވާ ނިޒާމެކެވެ. ހަމައެއާއެކު، ރާއްޖޭގައި ހިންގާ ކޮންމެ ބޭންކެއްގައި އެކައުންޓް ހުޅުވާފައިވީ ނަމަވެސް، އެއްވެސް ތަފާތުކުރުމެއް ނެތި އެއްހަމައެއްގައި އަވަސް ހިދުމަތް ހޯދުމުގެ މަގު މި ނިޒާމުން ވަނީ ތަނަވަސްކޮށްދީފައެވެ.

ރާއްޖޭގެ ފައިސާ ދެއްކުމުގެ ނިޒާމަށް ބޮޑު އިންގިލާބީ ބަދަލެއް ގެނުވި "ފަވަރަ" ނިޒާމު ރަސްމީކޮށް އިފްތިތާހުކޮށްފައިވަނީ 2023 ވަނަ އަހަރުގެ އޮގަސްޓް މަހުގެ 27 ވަނަ ދުވަހުއެވެ. އޭގެ ފަހުން އެމްއެމްއޭއިން ދަނީ މި ނިޒާމުގައި ބައިވެރިވާ މާލީ އިދާރާތަކުގެ ދައުރު ފުޅާކުރުމުގެ މަސައްކަތް ކުރަމުންނެވެ.