މެދުއިރުމަތީގެ މަސްރަހު ގޯސްވުމާ ގުޅިގެން ސަލާމަތީ ސަބަބުތަކަށްޓަކައި، ގައުމީ އެއާލައިން މޯލްޑިވިއަނުން މާލެއިން ޖިއްދާއަށް ބުރާސްފަތި ދުވަހު ކުރުމަށް ހަމަޖެހިފައިވާ އުމްރާ ދަތުރު ފަސްކޮށްފައިވާ ކަމަށް ގައުމީ އެއާލައިން، މޯލްޑިވިއަން ހިންގާ އައިލެންޑް އޭވިއޭޝަން ސާވިސަސް ލިމިޓެޑް (އައިއޭއެސް) އިން ބުނެފިއެވެ.

އައިލެންޑް އޭވިއޭޝަނާއި މޯލްޑިވްސް ޙައްޖު ކޯޕަރޭޝަން ގުޅިގެން ކުރިއަށްގެންދިއުމަށް ރާވާފައިވާ މި ދަތުރަކީ މި މަހުގެ 29 ވާ ބުރާސްފަތި ދުވަހު (29 އޮކްޓޯބަރު 2026 ގައި) ކުރުމަށް ތާވަލުކޮށްފައިވާ ދަތުރެކެވެ. ނަމަވެސް އެ ސަރަހައްދުގެ ހާލަތަށް ރިއާޔަތްކުރުމަށްފަހު، މި ދަތުރު މިހާރު ވަނީ ފަހުގެ ތާރީޚަކަށް ފަސްކޮށްފައެވެ.

Ad
d

ބުދަ ދުވަހު ރޭ އައިލެންޑް އޭވިއޭޝަނުން ނެރުނު ނޫސްބަޔާނެއްގައި ބުނީ، މެދުއިރުމަތީގައި މިހާރު ހިނގަމުންދާ ހަމަނުޖެހުންތަކާ ގުޅިގެން، ސައުދީ އަރަބިއްޔާ ހިމެނޭ ސަރަހައްދުގެ ސަލާމަތީ ކަންކަން އެ ކުންފުނިން ވަރަށް ގާތުން ބަލަމުން އަންނަ ކަމަށެވެ. އަދި ފާއިތުވި 24 ގަޑިއިރުގެ ތެރޭގައި އެ ސަރަހައްދުގެ މަސްރަހު ވަރަށް ބޮޑަށް ގޯސްވެފައިވާ ކަމަށް ވެސް އެ ކުންފުނިން ފާހަގަކޮށްފައިވެއެވެ.

އެ ކުންފުނީގެ އެސެސްމެންޓްތަކުން ދައްކާ ގޮތުގައި، މިހާރު އޮތް ނުރައްކަލުގެ މިންވަރަކީ ފަސިންޖަރުންގެ ސަލާމަތާއި ރައްކާތެރިކަމަށް ނުރައްކާވެދާނެ ފަދަ ހާލަތެއް ކަމަށް ލަފާކުރެވޭ ކަމަށް ވެސް އައިލެންޑް އޭވިއޭޝަނުން ބުނެފައިވެއެވެ.

މީގެ އިތުރުން، މަސްރަހު ގޯސްވަމުންދާތީ ބައެއް އެއާލައިންތަކުން މިހާރު ވެސް ވަނީ ސައުދީ އަރަބިއްޔާއަށް ކުރާ ދަތުރުތައް މެދުކަނޑާލާފައެވެ. އަދި ބައިނަލްއަޤްވާމީ ވައިގެދަތުރުތަކާ ބެހޭ އިދާރާތަކުން ނެރެފައިވާ ބަޔާންތަކަށް ބަލާއިރު، ޖިއްދާގެ ވައިގެ ސަރަހައްދު ބޭނުންކުރުމުގައި ހުރަސްތަކެއް ކުރިމަތިވެފައިވާ ކަމަށް ވެސް ބަޔާނުގައިވެއެވެ.

Ad
df

މި ދަތުރު ފަސްކުރުމާ ގުޅިގެން ދަތުރުވެރިންނަށް ދިމާވެދާނެ ދަތިތަކަށްޓަކައި އައިލެންޑް އޭވިއޭޝަނާއި ޙައްޖު ކޯޕަރޭޝަނުން ވަނީ މާފަށް އެދިފައެވެ. އަދި ފަސިންޖަރުންގެ ރައްކާތެރިކަމަކީ އަބަދުވެސް އެންމެ ބޮޑު އަހަމިއްޔަތުކަމެއް ދޭ ކަންތައް ކަމަށާއި، މި ދަތުރުގައި ބައިވެރިވާ ފަރާތްތަކަށް ބޭނުންވާ އެހީތެރިކަން ދެ މުއައްސަސާއިން ވެސް ފޯރުކޮށްދޭނެ ކަމަށް ވަނީ ބުނެފައެވެ. އައިލެންޑް އޭވިއޭޝަނުން ބުނީ ސަރަހައްދުގެ މަސްރަހު ހަމައަކަށް އެޅި، ދަތުރުކުރުމުގެ ރައްކާތެރިކަން ކަށަވަރުވުމުން ދަތުރު ކުރާނެ އައު ތާރީޚެއް ފަސިންޖަރުންނަށް އަންގާނެ ކަމަށެވެ.