ހދ.އަތޮޅު ކައުންސިލުން އިންތިޒާމް ކޮށްގެން އެ އަތޮޅުގެ ރަށްތަކަށް ހުޅުވާލައިގެން ބޭއްވި "ތިލަދެކުނު ޤުރުއާން މުބާރާތް 2024" ފަހުރުވެރި އެއްވަނަ ކުޅުދުއްފުށީ ޖަލާލުއްދީން ސްކޫލްގެ އިބްރާހީމް މަލްސޫން މުހައްމަދު ހޯދައިފިއެވެ.
މި މުބާރާތުގެ ނަތީޖާ ފާޅުކުރުމުގެ ޖަލްސީ މިރޭ ހަނިމާދޫ އިޖްތިމާއީ މަރުކަޒުގެ ހޯލުގައި ބާއްވާފައިވާއިރު، ޖަލްސާ ޝަރަފްވެރި ކޮށްދެއްވާފައިވަނީ މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް އާދަމް ޝަރީފް އުމަރެވެ.
މުޅި މުބާރާތުން އެއްވަނަ އަށް ޖަލާލުއްދީން ސްކޫލްގެ ދަރިވަރު އިބްރާހީމް މަލްސޫން މުހައްމަދު ހޮވުނުއިރު، އޭނާ ވަނީ ބަލައިގެން ކިޔުމުގެ ގޮފިން ވެސް އެއްވަނަ ހޯދާފައެވެ.
މުޅި މުބާރާތުން ދެވަނައަށް ހޮވިފައިވަނީ މަކުނުދޫ ސްކޫލްގެ ދަރިވަރު، ނާޔާ ބިންތު އަޒުހަރެވެ. އޭނާ ވަނީ ބަލައިގެން ކިޔުމުގެ ގޮފިން ވެސް ދެވަނަ ހޯދާފައެވެ.
މުޅި މުބާރާތުން ތިންވަނައަށް ހޮވުނީ އަފީފުއްދީން ސްކޫލްގެ ދަރިވަރު މުހައްމަދު ލަސަންއެވެ. އޭނާ ވަނީ ނުބަލާ ކިޔުމުގެ ގޮފިން މުޅި މުބާރާތުން އެއްވަނަ ހޯދާފައެވެ.
މުބާރާތުގެ އެންމެ މޮޅު ސްކޫލަކަށް މަކުނުދޫ ސްކޫލް ހޮވުނުއިރު، ދެވަނަ ހޯދީ ނޮޅިވަރަމް ސްކޫލެވެ. ތިންވަނަ ހޯދީ ކުޅުދުއްފުށީ ޖަލާލުއްދީން ސްކޫލެވެ.
މި އަހަރު މުބާރާތް ކުރިއަށް ގެންގޮސްފައި ވަނީ އޮކްޓޯބަރ 31 އިން ނޮވެމްބަރ 2 އަށް ހަނިމާދޫގައެވެ. މި މުބާރާތުގައި 15 ސްކޫލަކުން 203 ދަރިވަރުން ވަނީ ބައިވެރިވެފައެވެ.
މި އަހަރު މުބާރާތުގައި ބައިވެރިވެފައިވާ ސްކޫލްތަކަކީ ހިރިމަރަދޫ ސްކޫލް، ހދ.އަތޮޅު މަދަރުސާ (ވައިކަރަދޫ)، ކުރިނބީ ސްކޫލް، އަފީފުއްދީން ސްކޫލް، ޖަލާލުއްދީން ސްކޫލް، މަކުނުދޫ ސްކޫލް، ފިނޭ ސްކޫލް، ނެއްލައިދޫ ސްކޫލް، ނައިވާދު ސްކޫލް، ނޮޅިވަރަން ސްކޫލް، ނޮޅިވަރަންފަރު ސްކޫލް، ނޭކުރެންދޫ ސްކޫލް، ކުމުންދޫ ސްކޫލް، ހދ.އަތޮޅު ތައުލީމީ މަރުކަޒުގެ އިތުރުން ހަނިމާދޫ ސްކޫލެވެ.
