އާބާދީ ކުޑަ ރަށްރަށުގެ ކައުންސިލް އިދާރާތަކަށް ބޭނުންވާ މުވައްޒަފުން އެ ރަށަކުން ނުލިބޭ ހާލަތްތަކުގައި، އެ އަތޮޅެއްގެ އެހެން ރަށެއްގައި ތިބެގެން މަސައްކަތް ކުރެވޭނެ ގޮތުގެ ހާއްސަ އުސޫލެއް ސިވިލް ސަރވިސް ކޮމިޝަން (ސީއެސްސީ) އިން އާންމުކޮށްފިއެވެ.
ސީއެސްސީން ބުނީ މި އުސޫލުގެ މައިގަނޑު ބޭނުމަކީ އާބާދީ ކުޑަ ރަށްރަށުގެ ކައުންސިލް އިދާރާތަކުން ދޭންޖެހޭ އަސާސީ ހިދުމަތްތައް ދިނުމަށް ބޭނުންވާ މުވައްޒަފުން އެ ރަށަކުން ނުލިބޭ ހާލަތުގައި، އެ އަތޮޅެއްގެ އެހެން ރަށެއްގައި ހުރެގެން (އެ ރަށެއްގެ ކައުންސިލް އިދާރާގައި) މަސައްކަތް ކުރެވޭނެ ގޮތަށް މުވައްޒަފުން ހޯދައި ވަޒީފާ ހަމަޖެއްސުމެވެ.
މި އުސޫލުގެ ދަށުން މުވައްޒަފުން ހޯދުމަށް ހުޅުވާލެވޭނީ އެ އިދާރާއަކަށް ފާސްކޮށްދީފައިވާ އިދާރީ އޮނިގަނޑުގައި ހިމެނޭ، އަދި ބޭނުންވާ ފައިސާ ހަމަޖެހިފައިވާ މަގާމުތަކަށް އެކަންޏެވެ. އަދި ވަޒީފާގެ ފުރުސަތު ހުޅުވާލެވޭނީ އެ އަތޮޅެއްގެ ހުރިހާ ރަށެއް ހިމެނޭ ގޮތަށް ކަމަށާއި، ވަޒީފާ ލިބޭ ފަރާތަކީ އެ އަތޮޅެއްގެ ރަށެއްގައި ދިރިއުޅޭ މީހަކަށް ވާންޖެހޭނެ ކަމަށްވެސް ސީއެސްސީން ބުންޏެވެ.
ވަޒީފާ ހަމަޖެހޭ މީހާ ދިރިއުޅޭ ރަށުގެ ކައުންސިލުން، އޭނާއަށް އެ ރަށުގައި ހުރެގެން ވަޒީފާއަދާކުރުމުގެ ފުރުސަތު ފަހިކޮށްދޭންޖެހޭނެއެވެ. ސީއެސްސީން ބުނި ގޮތުގައި މި ފުރުސަތު ހަމަޖެހިފައިވާކަން ވަޒީފާއަށް މީހަކު ހަމަޖެއްސުމުގެ މަރުހަލާތަކުގެ ތެރެއިން ކަށަވަރު ކުރަންޖެހޭނެއެވެ.
މި އުސޫލުގެ ދަށުން ނަގާ މުވައްޒަފުގެ މުސާރައާއި އިނާޔަތްތަކުގެ އިތުރުން، މަސައްކަތް ކުރުމަށް ބޭނުންވާ ވަސީލަތްތަކާއި މުވައްޒަފުން މަސައްކަތް ކުރުމަށް ހިނގާނެ އެންމެހައި ހަރަދުތައް ހަމަޖައްސާނީ ވަޒީފާ އޮތް ނުވަތަ މުވައްޒަފު ނަގަން ބޭނުންވާ ކައުންސިލް އިދާރާއިންނެވެ. މުވައްޒަފުންނަށް މުސާރައާއި އިނާޔަތްތައް ދިނުމުގައި އަމަލުކުރާނީ ދައުލަތުގެ "ޕޭ ފްރޭމްވަރކް" ގައިވާ ގޮތުގެ މަތިންނެވެ.
ވަޒީފާ ދިނުމާއި، ވަކިކުރުމާއި، ވަޒީފާގެ ކުރިއެރުން ދިނުން ފަދަ ވަޒީފާއާ ގުޅޭ އެންމެހައި ކަންކަން ކުރިއަށްދާނީ ދިވެހި ސިވިލް ސަރވިސްގެ ގާނޫނާއި ގަވާއިދުތަކުގެ އިތުރުން ކޮމިޝަނުން އެކުލަވާލާފައިވާ އުސޫލުތަކާ އެއްގޮތަށެވެ. އަދި މި އުސޫލުގެ ދަށުން މުވައްޒަފުން ހަމަޖެއްސުމުގެ ކަންކަން ކުރިއަށްގެންދާނީ ސީއެސްސީން ނުވަތަ އެ ކޮމިޝަނުން ކަނޑައަޅާ އިދާރާއަކުންނެވެ.
އިތުރަށް ކިޔާލަން
• މި އުސޫލު ސީއެސްސީން ފާސްކޮށްފައިވަނީ 19 އޯގަސްޓު 2026 ގައެވެ.
• މި އުސޫލަށް އަމަލުކުރަން ފަށާފައިވަނީ 24 އޯގަސްޓު 2026 ގައެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!