ޕޮލިސް ރިކޯޑު ބެލެހެއްޓުމާ ގުޅޭ ގޮތުން އަމަލުކުރާ ގަވާއިދަށް މުހިއްމު އިސްލާހެއް ގެނެސް، އަމަލުކުރަން ފަށައިފިއެވެ.

މި އިސްލާހުތައް އެކުލެވޭ ޕޮލިސް ރިކޯޑު ބެލެހެއްޓުމާއި ދޫކުރުމުގައި ޢަމަލުކުރާނެ ގޮތުގެ ގަވާއިދަށް 1 ވަނަ އިޞްލާޙު ގެނައުމުގެ ގަވާއިދު ގެޒެޓްކޮށް، އަމަލުކުރަން ފަށާފައިވަނީ 2025 ވަނަ އަހަރުގެ އޮކްޓޫބަރު މަހުގެ 21 ވަނަ ދުވަހުން ފެށިގެންނެވެ.

Ad
rt

މި އިސްލާހުގެ އެންމެ ބޮޑު މަގުސަދަކީ، ބައެއް ޝަރުތުތަކުގެ ދަށުން، ޖިނާއީ މައްސަލަތަކުގެ ރިކޯޑު ނައްތާލުމުގެ އުސޫލުތައް ކަނޑައެޅުމެވެ.

މި އިސްލާހުގެ ދަށުން، އަސްލު ގަވާއިދުގެ 21 ވަނަ މާއްދާ (ރައްކައުކުރަންޖެހޭ ލިޔެކިޔުމާއި މައުލޫމާތުތައް) އަށް (ނ) އާއި (ރ)ގެ ގޮތުގައި ދެ އަކުރެއް ވަނީ އިތުރުކޮށްފައެވެ. މި އާ އިސްލާހުތަކުގެ ސަބަބުން، ޕޮލިސް ރިކޯޑު ބެލެހެއްޓުމުގެ ޒިންމާ ހަވާލުކޮށްފައިވާ އިދާރީ ބަހާގެ ވެރިޔާއަށް، ވަކި ހާލަތްތަކެއްގައި މައްސަލަތަކުގެ ލިޔެކިޔުންތައް ނައްތާލުމުގެ ބާރު ލިބިގެންދެއެވެ.

އިތުރުކުރެވުނު އަކުރު (ނ) ގައި ބަޔާންކޮށްފައިވާ ގޮތުގައި، ޖިނާއީ މައްސަލައެއްގައި ދައުވާ ނުކުރެވޭނެކަމަށް ޕްރޮސިކިއުޓަރ ޖެނެރަލްގެ އޮފީހުން ނިންމައިފި ނަމަ، އެ ނިންމުން ނިންމި ތާރީހުން ފެށިގެން އެއް އަހަރު ދުވަހުގެ ތެރޭގައި، ގަވާއިދުގެ 23 ވަނަ މާއްދާގެ ދަށުން އަމަލުކުރުމަށްފަހު، އެ މައްސަލައެއްގެ ލިޔުންތައް ނައްތައިލުމުގެ ނިންމުން ޕޮލިސް ރިކޯޑު ބެލެހެއްޓުމުގެ ވެރިޔާއަށް ނިންމިދާނެއެވެ. މިއީ ދައުލަތުގެ ބަޖެޓަށް ވެސް ފައިދާ ކުރާނެ އަދި ރައްކާކުރާނެ މައުލޫމާތުގެ ބާވަތްތައް ކުޑަކުރާނެ ކަމެކެވެ.

އަދި އަކުރު (ރ) ގައި ބަޔާންކޮށްފައި ވަނީ، ތަހުގީގު ނިމިފައިވާ ޖިނާއީ ބޮޑެތި ކުށްތަކުގެ ތެރޭގައި ނުހިމެނޭ އަދި ދައުވާ އުފުލޭ ވަރަށް ހެކި ލިބިފައިނުވާ މައްސަލަތަކުގެ ވާހަކައެވެ. މިފަދަ މައްސަލަތަކުގައި، އެ މައްސަލައެއް ތަހުގީގުކުރި ފަރާތާއި ސުޕަވައިޒަރަށް އަލުން ހެކި ލިބޭނެ ކަމަށް ނުބެލެވޭކަން އެންޑޯޒްމަންޓްކޮށް ގަބޫލުކުރެވޭ ނަމަ، އެ މައްސަލައެއް ފައިލްކުރެވުނު ތާރީހުން ފެށިގެން އެއް އަހަރު ދުވަހުގެ ތެރޭގައި (23 ވަނަ މާއްދާގެ ދަށުން އަމަލުކުރުމަށްފަހު) ލިޔުންތައް ނައްތައިލުމުގެ އިޚްތިޔާރު ޕޮލިސް ރިކޯޑުބެލެހެއްޓުމުގެ ވެރިޔާއަށް ލިބިގެންދެއެވެ. މި އިސްލާހުގެ ސަބަބުން، ހާއްސަކޮށް ބޮޑެތި ނޫން އަދި ހެކި ނެތް މައްސަލަތަކުގެ ރިކޯޑު މެނޭޖްކުރުން ފަސޭހަވެގެން ދާނެއެވެ.

އާ އިސްލާހަށް އަމަލުކުރަން ފަށާފައިވަނީ، ދިވެހި ސަރުކާރުގެ ގެޒެޓުގައި މި ގަވާއިދު ޝާއިއުކުރި ތާރީހުން، (2025 އޮކްޓޫބަރު 21 ވަނަ ދުވަހުން) ފެށިގެންނެވެ.