ޕްރޮޖެކްޓްތައް ނުހުއްޓި ގެންދިއުމަށް، އިތުރު ލޯނެއް ނެގުމަށްވުރެއް ޓެކްސް ބޮޑުކުރުން ރަނގަޅު: ރާޢީ

ސަރުކާރުން ހިންގާ ޕްރޮޖެކްޓްތައް ނުހުއްޓި ކުރިއަށް ގެންދިއުމަށް، އިތުރު ލޯނެއް ނެގުމަށްވުރެއް ޓެކްސް ބޮޑުކުރުން ރަނގަޅުކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެއެވެ.

ރާއީ ކުރެއްވި ޓުވިޓެއްގައި ވިދާޅުވީ މުޅި ދުނިޔޭގެ ގައުމު ތަކަށް ދިމާވެފައިވާ އިޤްތިސާދީ ފުންގަނޑުން އަދި ރާއްޖެ އަށްވެސް ދިމާވެދާނެ އުނދަގޫތަކުން އަރައިގަތުމަށް ސަރުކާރުން މިވަގުތު ޓެކްސް އަށް ބަދަލު ގެނައުމަކީ މިވަގުތަށް ކޮންމެހެން އަޅަންޖެހޭ މުހިއްމު ފިޔަވަޅެއްކަމުގަ އެވެ.

ރާޢީ އިތުރަށް ވިދާޅުވީ، މިސަރުކާރުން މުޅި ރާއްޖޭގައި ފަށާފައިވާ ތަރައްޤީގެ ހުރިހާ ޕީއެސްއައިޕީ ޕްރޮޖެކްޓްތައް ނުހުއްޓި ކުރިއަށް ގެންދިއުމަށް، ރާއްޖެއަށް ޓެކްސް ތަޢާރަފްވިތާ 10 އަހަރު ފަހުން ޖީއެސްޓީއަށް 2% އަދި ޓީޖީއެސްޓީ އަށް 4% އިތުރު ކުރުން މާބޮޑަށްވެސް ހެޔޮކަން ބޮޑުކަމަށެވެ. މިއީ އިތުރު ލޯނެއް ނެގުމަށްވުރެއް ރަނގަޅު ކަމެއް ކަމުގައި ފާހަގަ ކުރެއްވި އެވެ.

ސަރުކާރުން މިދިޔަ މަހު ވަނީ ޓީޖެސްޓީ 12 އިން 16 ޕަސަންޓަށް އަދި ޖީއެސްޓީ ހަ ޕަސަންޓުން އަށް ޕަސަންޓަށް ބޮޑުކުރަން ނިންމާފައިވާ ކަމަށް އިއުލާނުކޮށްފަ އެވެ.