ސަމާލުވޭ! ބީއެމްއެލްގެ ނަމުގައި ފޭކް މެއިލްތަކެއް ފޮނުވަނީ

ބޭންކް އޮފް މޯލްޑިވްސް (ބީއެމްއެލް)ގެ ނަމުގައި ބަޔަކު އާންމުނަށް ފިޝިން ނުވަތަ ފޭކް މެއިލް ފޮނުވާ ކަމަށް އެ ބޭންކުން ބުނެފި އެވެ.

ބީއެމްއެލް އިން ބުނެފައި ވަނީ ބީއެމްއެލް ބޭނުންކުރާ ފަރާތައް ރޫޓީން ސެކިއުރިޓީ ޗެކު ކުރުމުގެ ނަމުގައި ބަޔަކު ފިޝިން މެއިލް ފޮނުވާ ކަމަށެވެ.

އެ މެއިލްގައި އަންގަނީ އިންޓަނެޓް ބޭންކު އެކައުންޓު އޯތެންޓިކޭޓް ކުރުމަށް ލިންކަކަށް ދާށެވެ.

އެކަމާ ގުޅިގެން ބީއެމްއެލް އިން ކުރި ޓްވީޓެއްގައި ބުނެފައި ވަނީ އެއްވެސް އެކައުންޓެއް ވެރިފައި ކުރަން ނުވަތަ އިންޓަނެޓް ބޭންކިން މައުލޫމާތު ހޯދުމަށް ޓަކައި އެކުންފުނީން މެއިލް މެދުވެރިކޮށް ނާންގާނެ ކަމަށެވެ.

އީމެއިލް މެދުވެރިކޮށް ބީއެމްއެލްގެ އެކައުންޓް ވެރިފައި ކުރުމަށް ބުނެ މިދިޔަ އަހަރުގެ ފަހުކޮޅުގައި ވެސް ވަނީ ހަމަ އެފަދަ މައްސަލަތަކެއް ފެންމަތިވެފަ އެވެ.

Please note that this is a phishing email. We advise all our customers to block the sender in the “from” field and delete the email. BML will never get in touch with our customers with email links to verify account or internet banking details. #Samaaluvey pic.twitter.com/09DNGj37I5

— Bank of Maldives (@bankofmaldives) July 20, 2020

ބޭންކުގެ ކަސްޓަމަރުންނަށް އޮޅުވާލުމަށްޓަކައި އެކި ފަރާތްތަކުން ދަނީ ތަފާތު މަސައްކަތްތައް ކުރަމުންނެވެ. އަދި އެފަދަ މައްސަލަތައް އާންމުންނަށް ދިމާވުން ހުއްޓުވުމަށްޓަކައި ބީއެމްްއެލް އިން އާންމުން ހޭލުންތެރިކުރުމަށް ވެސް ގިނަ މަސައްކަތްތައް ކުރަމުންނެެވެ.

ބޭންކުގެ ނަމުގައި އެފަދަ މައުލޫމާތެއް ހޯދަން އެދުނަސް ހިއްސާނުކުރަން މީގެ ކުރިންވެސް ބީއެމްއެލް އިން ވަނީ އެދިފައެވެ.

މިއީ މީހުންގެ ބޭންކް އެކައުންޓް މެދުވެރިކޮށް ފައިސާ ހޯދުމުގެ ނިޔަތުގައި ކުރަމުން އަންނަ މަސައްކަތެކެވެ. މީގެ ކުރިންވެސް މިގޮތަށް ބީއެމްއެލްގެ ކަސްޓަމަރުން ކައިރީ އީމެއިލް މެދުވެރިކޮށް އެކައުންޓުގެ މައުލޫމާތު ހިއްސާކުރަން އެދި ފޭކް މެއިލްތަކެއް ކުރަމުން ދާތީ އާއްމުން ސަމާލުވެތިބުމަށް ބީއެމްއެލް އިން ވަނީ އެދިފައެވެ.

އޮންލައިން ބޭންކިން ބޭނުންކުރާއިރު ސީދާ ބީއެމްއެލްގެ ރަސްމީ ވެބްސައިޓް ކަމަށްވާ www.bankofmaldives.com.mv އަށް ވަނުމަށް ފަހު އޮންްލައިން ޕޯޓަލް އަށް ވަނުމަށް ސަމާލުކަން ދިނުމަށް ވެސް ބޭންކުން އެދެ އެވެ.

ގައުމީ ބޭންކުގެ ނަމުގައި ފޭކް އީމެއިލްތައް ފޮނުވުން އިތުރުވި އިރު، އެ ކުންފުނިން ވަރަށް ފަހުން ވަނީ އޮންލައިން ބޭންކިން މެދުވެރިކޮށް އިތުރު ޚިދުމަތްތައް ދޭން ފަށައިފަ އެވެ.