އިންޑިއާގެ ތައުލީމީ ދާއިރާގައި ހުރި ނިޒާމީ މައްސަލަތަކާއި، މުހިންމު އިމްތިހާނުތަކެއްގެ ކަރުދާސް ލީކުވި މައްސަލައިގައި ކަންބޮޑުވުން ފާޅުކުރުމަށް، "ކޮކްރޯޗް ޖަންތާ ޕާޓީ" (ސީ.ޖޭ.ޕީ) އަށް ތާއީދުކުރާ އެތައް ސަތޭކަ ޒުވާނުންނެއް މިއަދު ނިއުދިއްލީގެ ޖަންތަރު މަންތަރުގައި މުޒާހަރާކޮށްފިއެވެ.
މިއީ ސޯޝަލް މީޑިއާގައި ބޮޑު މަގުބޫލުކަމެއް ހޯދާފައިވާ މި ހަރަކާތުން މަގުމައްޗަށް ނުކުމެ ކުރި ފުރަތަމަ ބޮޑު މުޒާހަރާއެވެ. މި މުޒާހަރާގެ ބައިވެރިން މައިގަނޑު ގޮތެއްގައި ގޮވާލާފައިވަނީ އިންޑިއާގެ ޔޫނިއަން އެޑިއުކޭޝަން މިނިސްޓަރު ދަރުމެންދުރަ ޕްރަދާން މަގާމުން އިސްތިއުފާ ދެއްވުމަށެވެ. މި މުޒާހަރާ އަމާޒުކޮށްފައިވަނީ 2026 ވަނަ އަހަރުގެ ނީޓް (ނީޓް-ޔޫޖީ) އިމްތިހާނުގެ ކަރުދާސް ލީކުވުމާއި، ސީ.ބީ.އެސް.އީ އިމްތިހާނުތަކުގެ މާކުސް ދިނުމުގައި ދިމާވި އިދާރީ މައްސަލަތަކަށެވެ.

ކޮކްރޯޗް ޖަންތާ ޕާޓީ ހަރަކާތަކީ 2026 ވަނަ އަހަރުގެ މެދުތެރޭގައި، ބޮސްޓަން ޔުނިވާސިޓީން ތައުލީމު ހާސިލުކޮށްފައިވާ އަދި އާމް އާދްމީ ޕާޓީގެ ކުރީގެ ސްޓްރެޓެޖިސްޓެއް ކަމަށްވާ އަބީޖީތު ދިޕްކޭ އިސްވެ ހުރެ އުފެއްދި ސިޔާސީ ކަންކަމަށް މަލާމާތްކުރާ ހަރަކާތެކެވެ.

Ad
rt
އިންޑިއާގެ ކުރަފި ޕާޓީގެ މުޒާހަރާ ތެރެއިން، ފޮޓޯ: އަލްޖަޒީރާ

"ކޮކްރޯޗް"ގެ ނަން މި ހަރަކާތަށް ދީފައިވަނީ އިންޑިއާގެ ސުޕްރީމް ކޯޓުގެ ފަނޑިޔާރަކު، ސަރުކާރަށް ފާޑުކިޔާ ޒުވާނުންނަށް ނިސްބަތްކޮށް "ފަނިތަކެއް" ފަދަ ބަހެއް ބޭނުންކުރެއްވި ކަމަށް ބުނާ ރިޕޯޓްތަކާ ގުޅިގެންނެވެ. މި ހަރަކާތުން ބުނާ ގޮތުގައި ކުރަތްޕަކީ ކޮންމެފަދަ ހާލަތެއްގައި ވެސް މަރުނުވެ، "ދިރިހުރުމުގެ ގާބިލުކަން" ލިބިފައިވާ އެއްޗެކެވެ.

މިއަދު މުޒާހަރާގެ ބައިވެރިންގެ ތެރޭގައި ގިނަ އަދަދެއްގެ ކިޔަވާކުދިން ބައިވެރިވިއިރު، އޭގެ ތެރެއިން ބައެއް ކުދިން ތިބީ ކުރައްތްޕެއްގެ ސިފަޖެހޭ މާސްކު އަޅައިގެންނެވެ. އެމެރިކާގައި ހުރުމަށްފަހު މުޒާހަރާގައި ބައިވެރިވުމަށް އިންޑިއާއަށް އައި އަބީޖީތު ދިޕްކޭގެ އިތުރުން، ތިމާވެށީގެ މަޝްހޫރު އެކްޓިވިސްޓް ސޯނަމް ވަންގްޗުކް ވެސް ވަނީ މުޒާހަރާގެ ބައިވެރިންނާ ގުޅިފައެވެ.

އިންސްޓަގްރާމްގައި 20 މިލިއަނަށް ވުރެ ގިނަ ފޮލޯވަރުން ތިބި މި ހަރަކާތުން މަގުމައްޗަށް ނުކުތުމަކީ، އިންޑިއާގެ ޒުވާނުންގެ މެދުގައި އޮތް ވަޒީފާ ނެތުމުގެ މައްސަލައާއި ތައުލީމީ ނިޒާމަށް އޮތް ބޮޑު ނުރުހުން ހާމަކޮށްދޭ ކަމެކެވެ.

ސަރުކާރަށް ތާއީދުކުރާ ފަރާތްތަކުން މި ހަރަކާތަކީ އިދިކޮޅު ސިޔާސީ ފަރާތްތަކުގެ ރޭވުމެއް ކަމަށް ބުނެ ފާޑުކިޔަމުން ދާއިރު، މިއަދުގެ މުޒާހަރާއާ ގުޅިގެން ނިއުދިއްލީގެ ސަލާމަތީ ކަންކަން ވަނީ ވަރުގަދަކޮށްފައެވެ. ނަމަވެސް، މުޒާހަރާ ކުރިއަށް ގޮސްފައިވަނީ ސުލްހަވެރިކަމާއެކުގައެވެ. މި ހަރަކާތަކީ އަދި ރަސްމީކޮށް ރަޖިސްޓްރީކޮށްފައިވާ ސިޔާސީ ޕާޓީއަކަށް ނުވި ނަމަވެސް، މިއީ އިންޑިއާގެ މިހާރުގެ ސިޔާސީ މަޝްރަހުގައި ބޮޑު ސަމާލުކަމެއް ލިބެމުންދާ ހަރަކާތެކެވެ.