އީރާނުގެ އަސްކަރިއްޔާއިން އަމާޒުފަތްގަނޑަކަށްވާނީ ހަމައެކަނި އީރާނަށް ހަމަލާދިނުމަށް އެމެރިކާއިން ބޭނުންކުރާ މަރުކަޒުތަކަށް އެކަނި ކަމަށް އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ.
އަރަގްޗީ ފާހަގަކުރެއްވި ގޮތުގައި، އީރާނަށް އެމެރިކާގެ މައި ބިމަށް ސީދާ ހަމަލާދިނުމުގެ ގާބިލުކަން ނެތުމުން، އެމެރިކާއިން ސަރަހައްދުގައި ގާއިމުކޮށްފައިވާ އަސްކަރީ މަރުކަޒުތަކާއި ވަސީލަތްތަކަކީ ބަދަލުހިފުމުގެ ގޮތުން ހަމަލާދެވޭނެ ސީދާ އަމާޒުތަކެކެވެ. އީރާނާ ދެކޮޅަށް ހިންގާ އެއްވެސް އޮޕަރޭޝަނެއްގައި ބައިވެރިވާ ނުވަތަ އެހީތެރިވާ ކޮންމެ މަރުކަޒަކީ ޝަރުއީ އަމާޒެއްގެ ގޮތުގައި ތެހެރާނުން ބަލާނެކަމަށް ހަނގުރާމަ ފެށުމުގެ ކުރިން ވެސް އީރާނު އޮތީ ބުނެ، އިންޒާރު ދީފައެވެ.
މި ސިޔާސަތުގެ ދަށުން، ދާދިފަހުން އެމެރިކާއިން އީރާނުގެ ޑްރޯން އަދި ރާޑާ ސައިޓްތަކަށް ދިން ހަމަލާތަކަށް ރައްދުދިނުމުގެ ގޮތުން، ކުވެއިތުގައި ހުރި އަސްކަރީ ބޭހަކަށް އީރާނުން ވަނީ ހަމަލާދީފައެވެ. އެ ހަމަލާއާއި ގުޅިގެން އީރާނުން ބުނީ އެ ބޭހަކީ އެމެރިކާގެ އޮޕަރޭޝަންތަކުގައި އަމަލީ ގޮތުން ބައިވެރިވި ތަނެއް ކަމަށެވެ. މިއީ ހަމަލާތައް އިތުރަށް ފުޅާވުމުގެ ޒިންމާއިން ރެކުމަށް އީރާނުން ގެންގުޅޭ އުސޫލެކެވެ.
ޚާރިޖީ ވަޒީރު އަރަގްޗީ ތަކުރާރުކޮށް ވިދާޅުވަމުން ގެންދަވަނީ އެމެރިކާއާއެކު ވެވޭ ކޮންމެ އެއްބަސްވުމަކީ ހުރިހާ ފްރަންޓްތަކެއް ހިމެނޭ އެއްބަސްވުމަކަށް ވާންޖެހޭނެ ކަމަށެވެ. އީރާނުން ދެކޭގޮތުގައި ފަލަސްތީނާއި ލުބުނާނު ފަދަ ގައުމުތަކުގައި އެމެރިކާ ނުވަތަ އިސްރާއީލުން ހިންގާ އަސްކަރީ ހަރަކާތްތަކަކީ ހަނގުރާމަ ހުއްޓާލުމުގެ އެއްބަސްވުމާ ޚިލާފުވުމެވެ. މިފަދަ ހާލަތްތަކުގައި "ދިފާއީ" ރައްދު ދިނުމުގެ ހައްގު އީރާނަށް އޮންނާނެ ކަމަށް އޭނާ ވިދާޅުވިއެވެ.
ވޮޝިންގްޓަނާއެކު ކުރެވުނު "ހިތްދަތި ތަޖުރިބާގެ" ސަބަބުން، ކުރިއަށް އޮތް ތަނުގައި ސުލްހައިގެ މަޝްވަރާތައް އެޖެންޑާގައި ނެތް ކަމަށް އަރަގްޗީ ވަނީ އިޝާރާތް ކުރައްވާފައެވެ. މި ނިންމުމާއެކު، މެދުއިރުމަތީގައި އެމެރިކާ ނުވަތަ އިސްރާއީލުން ދޭ ކޮންމެ ހަމަލާއަކަށް، މުޅި ސަރަހައްދަށް ފެތުރިގެންދާ ފަދަ ވަރުގަދަ ރައްދެއް އީރާނުން ދޭނެކަމުގެ ބިރު ވަނީ ބޮޑުވެފައެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!