އީރާނުގެ ހޮރްމުޒްގާން ޕްރޮވިންސްގެ ވައިގެ ސަރަހައްދުން ދަތުރުކުރަމުންދިޔަ އިސްރާއީލުގެ ޖާސޫސީ އަދި ސަވައިލަންސް ޑްރޯނެއް އީރާނުގެ އަސްކަރިއްޔާއިން ވައްޓާލައިފި ކަމަށް އެ ގައުމުގެ މެހެރު ނިއުސް އެޖެންސީން އާދީއްތަ ދުވަހު ރިޕޯޓްކޮށްފިއެވެ.
މި ހާދިސާ ހިނގާފައި މިވަނީ އީރާނާއި އެމެރިކާއާ ދެމެދު ސުލްހައިގެ އެއްބަސްވުމެއްގައި ސޮއިކުރުމުގެ ތައްޔާރީތައް ވަމުންދާ ދަނޑިވަޅެއްގައެވެ.
މެހެރު ނިއުސް އެޖެންސީން ބުނި ގޮތުގައި، ވައްޓާލާފައިވަނީ އިސްރާއީލުގައި އުފައްދާ "އޯބިޓާ" މަރުކާގެ ޑްރޯނެކެވެ. މި ޑްރޯންގެ ބައިތައް ފެނިފައިވަނީ އީރާނުގެ ކަނޑުގެ ސިފައިންނާ ގުޅިގެން ހިންގި އޮޕަރޭޝަނެއްގެ ތެރެއިން ކަމަށްވެސް އެ އެޖެންސީން މައުލޫމާތުދެއެވެ.
މި ހާދިސާ ހިނގާފައިވަނީ ސަރަހައްދީ މަސްލަހަތު ނުހަނު ނާޒުކުވެފައިވާ ވަގުތެއްގައެވެ. މިއަހަރުގެ ފެބްރުއަރީ 28 އިން ފެށިގެން އެމެރިކާ އާއި އިސްރާއީލުން އީރާނާއި ދެކޮޅަށް ފަށާފައިވާ ހަނގުރާމަ އާއި ގުޅިގެން ހޮރްމުޒް ކަނޑުއޮޅި ވަގުތީގޮތުން ބަންދުކުރަން ޖެހުމުން، ސަރަހައްދުގެ ނުތަނަވަސްކަން ވަނީ ވަރަށް ބޮޑަށް އިތުރުވެފައެވެ.
ނަމަވެސް، ޕާކިސްތާނުން މެދުވެރިއެއްގެ ދައުރު އަދާކޮށްގެން އޭޕްރިލް 8 ވަނަ ދުވަހުން ފެށިގެން ވަނީ ހަމަލާ ބަދަލުކުރުން ހުއްޓާލުމުގެ އެއްބަސްވުމެއް ގާއިމުކޮށްފައެވެ. މި ޑްރޯން ވައްޓާލި ހާދިސާ ހިނގާފައިވަނީ އިސްލާމްއާބާދުގައި ކުރިއަށްދާ މަޝްވަރާތައް ވަރުގަދަވެފައިވާ ދަނޑިވަޅެއްގައެވެ.
އެމެރިކާ އަދި އީރާނުގެ އޮފިޝަލުން ހާމަކުރައްވާ ގޮތުގައި، ދާއިމީ ސުލްހައިގެ އެއްބަސްވުމަކަށް އައުމަށާއި ހޮރްމުޒް ކަނޑުއޮޅި ދާއިމީކޮށް ހުޅުވުމާ ގުޅޭ ގޮތުން ކުރެވޭ މަޝްވަރާތައް މިހާރު ވަނީ ނިމުމަކާ ގާތްވެފައެވެ. އަދި މިކަމާ ގުޅޭ ފަހުގެ ނިންމުންތައް ނިންމުމަށް މިހާރު އޮތީ ފައިނަލް އެޕްރޫވަލްގެ މަރުހަލާގައި ކަމަށްވެސް ރިޕޯޓްތައް ބުނެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!