ބަންގްލަދޭޝްގެ ރޫޕޫރު ނިއުކްލިއާ ޕަވަރ ޕްލާންޓުގެ ފުރަތަމަ ޔުނިޓަށް ފިއުލް ލޯޑުކުރަން ފެށުމާއެކު، އެ ގައުމު ނިއުކްލިއާ ހަކަތަ އުފައްދާ ގައުމުތަކުގެ ސަފަށް ރަސްމީކޮށް ވަދެއްޖެއެވެ.

މި މަޝްރޫއަކީ ރަޝިޔާގެ އެންމެ ފަހުގެ ޖެނެރޭޝަން 3+ ގެ ޕްރެޝަރައިޒްޑް ވޯޓާ ރިއެކްޓަރ (VVER-1200) ޓެކްނޮލޮޖީ ބޭނުންކޮށްގެން ކުރިއަށްގެންދާ މަޝްރޫއެކެވެ.

Ad
rt

ވެރިރަށް ޑާކާއާ ގާތްގަނޑަކަށް 160 ކިލޯމީޓަރު ދުރުގައި އޮންނަ ޕަބްނާގައި ގާއިމުކޮށްފައިވާ މި ޕްލާންޓަކީ ރަޝިޔާގެ ދައުލަތުގެ ނިއުކްލިއާ ކޯޕަރޭޝަން، ރޮސާޓަމްއިން ބިނާކޮށްފައިވާ ތަނެކެވެ. ޖުމްލަ 2.4 ގިގާވޮޓްގެ ކެޕޭސިޓީ ހުންނަ މި ޕްލާންޓުގެ މަގްސަދަކީ ބަންގްލަދޭޝްއަށް ބޭނުންވާ ކަރަންޓުގެ 10 އިންސައްތައާއި 12 އިންސައްތައާ ދެމެދުގެ މިންވަރެއް ފޯރުކޮށްދިނުމެވެ.

ބަންގްލަދޭޝްގެ ސައިންސް އެންޑް ޓެކްނޮލޮޖީ މިނިސްޓަރު ފަކީރު މަހްބޫބް އަނާމް ވިދާޅުވި ގޮތުގައި، މި މަޝްރޫއަކީ ގައުމުގެ ހަކަތައިގެ ރައްކާތެރިކަން ކަށަވަރުކުރުމަށާއި، ސިނާއީ މަސައްކަތްތައް ފުޅާކުރުމަށް އެޅޭ މުހިންމު ފިޔަވަޅެކެވެ. ގާތްގަނޑަކަށް 13 ބިލިއަން ޑޮލަރުގެ މި މަޝްރޫއުގެ 90 އިންސައްތަ ހަރަދު ހަމަޖައްސާފައިވަނީ ރަޝިޔާގެ ލޯނު އެހީގެ ދަށުންނެވެ.

މިހާރު ފެށިފައިވާ ފިއުލް ލޯޑިންގ މަރުހަލާއަށްފަހު، ރިއެކްޓަރުގެ ބާރު ވަކި މިންވަރެއްގައި ހިފެހެއްޓުމުގެ މަސައްކަތް ކުރިއަށްދާނެއެވެ. ކަމާބެހޭ އޮފިޝަލުން ވިދާޅުވާ ގޮތުގައި، މި ޕްލާންޓުން ކަރަންޓު އުފައްދަން ފަށާނީ މަދު މިންވަރަކުން ކަމަށާއި، ފުރިހަމަ ކެޕޭސިޓީގައި މަސައްކަތް ކުރަން ފަށާނީ 2027 ވަނަ އަހަރުގައެވެ. އަދި 2026 ވަނަ އަހަރު ނިމުމުގެ ކުރިން މި ޕްލާންޓް ރަސްމީކޮށް ބަންގްލަދޭޝްއާ ހަވާލުކުރެވޭނެއެވެ.

ބަންގްލަދޭޝްގައި ބޭނުންކުރާ މި ޓެކްނޮލޮޖީއަކީ އަވަށްޓެރި އިންޑިއާއިންވެސް އެ ގައުމުގެ ކުރިމަގުގެ ނިއުކްލިއާ މަޝްރޫއުތަކަށް ބޭނުންކުރުމަށް ޝައުގުވެރިކަން ފާޅުކޮށްފައިވާ ޓެކްނޮލޮޖީއެކެވެ. އިންޑިއާގެ ކޫޑަންކުލާމްގައި މިހާރުވެސް ރަޝިޔާގެ އެހީގައި ދެ ރިއެކްޓަރު ހިންގަމުންދާއިރު، އިތުރު ޔުނިޓުތަކުގައި VVER-1200 ރިއެކްޓަރުތައް ބޭނުންކުރުމަށް ދަނީ ތައްޔާރުވަމުންނެވެ.