އެމްޓީސީސީ އިން ދިވެހިންނަށް ހާއްސަ 200 އަށް ވުރެ ގިނަ ވަޒީފާގެ ފުރުސަތު ހުޅުވާލައިފިއެވެ.
މިއަދު އެމްޓީސީސީގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެ ކުންފުނީގެ ސީއީއޯ އާދަމް އާޒިމް ވިދާޅުވީ އެ ކުންފުނިން ޕްރޮޖެކްޓުތައް ކުރިއަށްގެންދާ ރަށްރަށުގައި މަސައްކަތްކުރާނެ ސްކިލްޑް އަދި އަން ސްކިލްޑް މުވައްޒަފުން ބޭނުންވާ ކަމަށެވެ.
ނޫސް ކޮންފަރެންސް: ހުޅުވާލާފައިވާ ވަޒީފާގެ ފުރުސަތުތަކާއި ބެހޭ pic.twitter.com/yhJsEaGJCa
— MTCC Plc (@MTCCPlc) February 27, 2020
އެގޮތުން ޑްރައިވަރުންނާއި ސުޕަވައިޒަރުން، ވެލްޑަރުން، އެސްކެވޭޓާ ޑްރައިވަރުން އަދި ކައްކާއިންނާއި ކައްކާއިންގެ އެހީތެރިންގެ އިތުރުން ލޭބަރުންގެ ވަޒީފާއަށް މީހުން ބޭނުންވާކަމަށް އާޒިމް ވިދާޅުވިއެވެ.
"އަޅުގަނޑުމެން ބޮޑަށް ޓާގެޓު މިކުރަނީ ދިވެހިންނަށް ވަޒީފާ ދިނުމަށް. އަޅުގަނޑުމެން ވަރަށް ބޮޑަށް އެދެން ވަޒީފާ ބޭނުންވެފައި ތިބި ދިވެހިން ވަޒީފާތަކަށް ކުރިމަތިލާ ރަނގަޅު ހިދުމަތެއް ކޮށްދިނުން،"
އާޒިމް ވިދާޅުވިއެވެ.
އާޒިމް ވިދާޅުވީ އެކުންފުނިން ޕްރޮޖެކްޓުތައް ހިންގާ ރަށްރަށުގައި ވަޒީފާތައް އުފެއްދުމަށް މަސައްކަތް ކުރައްވާ ކަމަށެވެ. އެގޮތުން އަންނަ މަހު މަސައްކަތަށް މޮބިލައިޒްވާ 10 ރަށެއް ހިމެނޭކަން އޭނާ ފާހަގަ ކުރެއްވިއެވެ.
އެ ރަށްތަކަކީ އއ. ރަސްދޫ، ހދ. ނެއްލައިދޫ، ގދ. ތިނަދޫ، ހއ. އިހަވަންދޫ، ހދ. ހަނިމާދޫ، ކ. ގުރައިދޫ، ނ. މިލަންދޫ، ވ. ރަކީދޫ، ލ. މާވަށް އަދި ފުވައްމުލައް ސިޓީ އެވެ.
އާޒިމް އިތުރަށް ވިދަޅުވީ މި ހުރިހާ ރަށަކަށްވެސް ސުޕަވައިޒަރުންނާއި އެޑްމިނިސްޓްރޭޓިވް މަސައްކަތް ކުރާނެ މީހުން އަދި އިންވެންޓްރީ ބަލަހައްޓާނެ މީހުން ބޭނުންވާ ކަމަށެވެ.
"މިގޮތަށް ކޮންމެ ރަށެއްގައި އެބަ އުފައްދަން 10 އާއި 13 އާއި ދެމެދުގެ އަދަދަކަށް ވަޒީފާ. އެރަށެއްގެ ބޮޑުމިނާ ޕްރޮޖެކްޓުގެ ބޮޑުމިނަށް ބަލާފައި މިހާރުން މިހާރަށްވެސް އެބަ ބޭނުންވޭ މިވަރަށް ވަޒީފާ އުފައްދަން،"
އާޒިމް ވިދާޅުވިއެވެ.
މީގެ ތެރެއިން ބައެއް ވަޒީފާތަކަށް މީހުން ހޯދަން މިހާރުވެސް އިއުލާނު ކޮށްފައިވާ ކަމަށާއި އިއުލާނު ނުކޮށް ހުރި ރަށްތަކުގައި ކައުންސިލްތައް މެދުވެރިވެގެން ވަޒީފާތަކަށް އިއުލާނު ކުރާނެ ކަމަށްވެސް ވިދާޅުވިއެވެ.
އާޒިމް ވިދާޅުވީ އެމްޓީސީގެ މަގުސަދަކީ މިހާރު އެކުންފުނީގެ ވަޒީފާތަކުގައި ތިބި ބިދޭސިންގެ އަދަދު މަދުކޮށް ދިވެހިންނަށް ވަޒީފާގެ ފުރުސަތުތައް ފަހިކޮށްދިނުން ކަމަށާއި އެކުންފުނީގެ މުވައްޒަފުންގެ 50 ޕަސެންޓަކީ ބިދޭސީން ކަމަށް އެމްޓީސީސީ އިން ބުނެފައިވެއެވެ.
މި ވަޒީފާތަކަށް ކުރިމަތިލާ މީހުންނަށް ދޭންޖެހޭ ތަމްރީނުތައްވެސް އެމްޓީސީސީ އިން ދޭނެ ކަމަށާއި ޕްރޮޖެކްޓު ނިމުމުން މުވައްޒަފު ބޭނުންނަމަ އެ ކުންފުނީގެ އެހެން ޕްރޮޖެކްޓުތަކުގައި މަސައްކަތް ކުރުމުގެ ފުރުސަތުވެސް ދޭނެ ކަމަށާއި ކުރިއަށް އޮތްތަނުގައި އިތުރު 150 ވަޒީފާ އަށް އިއުލާނު ކުރާނެ ކަމަށް އާޒިމް ވިދާޅުވިއެވެ.
"އޭގެ މާނައަކީ އެމްޓީސީސީގައި މިވަގުތު ތިބި 1،800 މުވައްޒަފުންގެ އިތުރަށް އަޅުގަނޑުމެން ރަށްރަށުގައި ހިންގާ ޕްރޮޖެކްޓުތަކަށް އެރަށުން ވަޒީފާ އުފައްދާނަން. އެގޮތުން ކުރިއަށް އޮތް ތިނެއް ނޫނީ ހަ މަސް ތެރޭ 350 އެއްހައި ވަޒީފާ އުފައްދަމުން ދާނެ،"
އާޒިމް ވިދާޅުވިއެވެ.
އާޒިމް ވިދާޅުވީ އެމްޓީސީސީ އިން 49 ޕްރޮޖެކްޓެއް ފަށަން ތައްޔާރުވެފައިވާ ކަމަށާއި އޭގެ ތެރެއިން 10 ނޫނީ 11 ޕްރޮޖެކްޓެއް އަންނަ މަހު ފަށާނެ ކަމަށާއި މާޗު މަސް ތެރޭ 47 ޕްރޮޖެކްޓެއްގެ މަސައްކަތް ކުރިއަށް ގެންދާނެ ކަމަށެވެ.
މި ވަޒީފާތަކާ ބެހޭ އިތުރު މައުލޫމާތު ހޯދުމަށް އެމްޓީސީސީގެ ނަންބަރު 3001141 އާ ގުޅުމަށް އެ ކުންފުނިން އެދެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!