ހއ. ފިއްލަދޫގެ މަގުތައް ޒަމާނީ ފެންވަރަށް ތަރައްޤީކުރުމުގެ އަމަލީ މަސައްކަތް ރަސްމީކޮށް ފަށައިފިއެވެ.
މި މަޝްރޫޢުގެ އަމަލީ މަސައްކަތް ފައްޓަވައިދެއްވީ އެކަމަށްޓަކައި އެ ރަށުގައި ބޭއްވި ޚާއްޞަ ރަސްމިއްޔާތެއްގައި ރައްޔިތުންގެ މަޖިލީހުގެ ކެލާ ދާއިރާގެ މެންބަރު ޢަބްދުﷲ ޝަރީފެވެ.
މި ރަސްމިއްޔާތުގައި މެންބަރު ޝަރީފްގެ އަރިހުގައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ މެނޭޖިންގ ޑިރެކްޓަރު އިބްރާހީމް ނަޡީމް އާއި ފިއްލަދޫ ކައުންސިލްގެ ރައީސް ފަތުޙުﷲ ޙަސަން ބައިވެރިވެވަޑައިގެންނެވިއެވެ.
ރަސްމިއްޔާތުގައި ވާހަކަފުޅު ދައްކަވަމުން މެންބަރު ޝަރީފް ވިދާޅުވީ، މަގުތައް ހެދުމަކީ ފިއްލަދޫގެ މުސްތަޤުބަލަށް ލިބޭނެ ވަރަށް ބޮޑު ކުރިއެރުމެއް ކަމަށެވެ.
އާރްޑީސީގެ މެނޭޖިންގ ޑިރެކްޓަރު އިބްރާހީމް ނަޡީމް ވިދާޅުވީ، ފިއްލަދޫގެ މަގު ހެދުމުގެ މަސައްކަތް އެ ކުންފުނިން ވަރަށް ގާތުން މޮނިޓަރު ކުރަމުންދާނެ ކަމަށެވެ. އަދި އުންމީދަކީ ވީހާވެސް އަވަހަކަށް މަސައްކަތް ނިންމާލައި، ރައްޔިތުންނަށް އޭގެ ފައިދާ ހޯދައިދިނުން ކަމަށް އޭނާ ވިދާޅުވިއެވެ. ނަޡީމް އިތުރަށް ހާމަކުރެއްވި ގޮތުގައި، މަސައްކަތް ހަލުވިކުރުމަށްޓަކައި އާރްޑީސީގެ ވޯކް ސައިޓް ބޮޑުކުރުމުގެ މަސައްކަތް މިހާރު ވަނީ ފަށާފައެވެ.
މަޝްރޫޢަށް ބޭނުންވާ ސާމާނާއި ވެހިކަލްތައް ކުރިއަށް އޮތް ދެ މަސްދުވަހުގެ ތެރޭގައި ރަށަށް ގެންދެވޭނެ ކަމުގެ ޔަޤީންކަން ދެއްވަމުން އެމްޑީ ވިދާޅުވީ، މިހާރުވެސް އާރްޑީސީގެ ފަސް ޕްރޮޖެކްޓެއް އެ ރަށުގައި ކުރިއަށްދާ ކަމަށެވެ.
މި މަޝްރޫޢު ނިމުމުން ފިއްލަދޫގެ އެއްގަމުގެ ދަތުރުފަތުރަށް ފަސޭހަކަން ލިބިގެންދާނެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!