އާ ދިރާސީ އަހަރަށް ފޮތްތައް ރަށްރަށަށް ފޮނުވަން ފަށައިފި

އަންނަ ދިރާސީ އަހަރަށް ދަރިވަރުންނަށް ބޭނުންވާ ޓެކްސްޓް ފޮތްތައް ރަށްރަށަށް ފޮނުވުމުގެ މަސައްކަތް ތަޢުލީމާބެހޭ ވުޒާރާއިން ފަށައިފިއެވެ.

ތަޢުލީމީ ވުޒާރާއިން ހާމަކުރައްވާފައިވާ ގޮތުގައި، އަތޮޅުތަކުގެ ރަށްރަށަށް ފޮތްތައް ފޮނުވުމުގެ މަސައްކަތް މިހާރު ކުރިއަށްދާއިރު، އައު ދިރާސީ އަހަރު ފެށުމުގެ ކުރިން ހުރިހާ ދަރިވަރުންނަށް ފޮތްތައް ފުރިހަމައަށް ލިބިފައިވާކަން ކަށަވަރުކުރުމަށް، ސްކޫލްތަކާ ގުޅިގެން ގިނަ މަސައްކަތްތަކެއް ދަނީ ކުރަމުންނެވެ. ވުޒާރާގެ އަމާޒަކީ ސްކޫލްތައް ހުޅުވުމުގެ ކުރިން ހުރިހާ ދަރިވަރުންނަށް ޓެކްސްޓް ފޮތްތައް ދޫކޮށް ނިންމާލުމެވެ.

ގިނަ އަހަރުތަކަކަށްފަހު، ކުރިއެކޭ އެއްގޮތަށް އަންނަ އަހަރުގެ ދިރާސީ ކިޔެވުން ފެށޭނީ ޖެނުއަރީ މަހުއެވެ. ދިރާސީ އަހަރު ފެށުމުގެ ކުރިން ދަރިވަރުންނަށް ބޭނުންވާ އެހެނިހެން ކަންކަން ފުރިހަމަކުރުމުގެ މަސައްކަތްވެސް ވުޒާރާއިން ކުރަމުން އަންނަކަމުގައި ހާމަކުރެއެވެ. މީގެ ތެރޭގައި ޓެކްސްޓް ފޮތްތައް ފޯރުކޮށްދިނުމުގެ އިތުރުން، މުދައްރިސުން ހަމަކުރުމާއި ސްކޫލްތައް މަރާމާތުކޮށް އާބާތުރަ ފިލުވުމުގެ މަސައްކަތް ހިމެނެއެވެ. އަންނަ ދިރާސީ އަހަރަށް ތައްޔާރުވުމަށް ސްކޫލްތައް މަރާމާތުކުރުމަށް 40 މިލިއަން ރުފިޔާ ޚަރަދުކުރުމަށް ނިންމާފައިވާކަމަށް ތަޢުލީމީ ވަޒީރު ވަނީ ވިދާޅުވެފައެވެ.

އައު ދިރާސީ އަހަރަށް ތައްޔާރުވަމުންދާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކިޔެވުން ފެށުމުގެ ކުރިން ރާއްޖޭގެ ހުރިހާ ސްކޫލްތަކެއްގެ ކްލާސްރޫމްތައް އޭސީކޮށް ނިންމާލުމަކީ އަމާޒެއްކަމަށާއި، އަދި އައު އަހަރު ދަރިވަރުން ކިޔަވާނީ އޭސީ ކޮށްފައިވާ ކްލާސްރޫމްތަކެއްގައި ކަމަށް ވިދާޅުވެފައެވެ. މީގެ އިތުރުން، ހުޅުމާލެ ދެވަނަ ފިޔަވަހީގައި މި ސަރުކާރުން އަލަށް ތަރައްޤީކުރާ "ޝަހީދު އަލީ" ސްކޫލްގައިވެސް އައު ދިރާސީ އަހަރު ކިޔެވުން ފަށާނެއެވެ.

މިހާރު ހިނގަމުންދާ ދިރާސީ އަހަރުގެ ކިޔެވުން ނިމި ބޮޑު ޗުއްޓީ ފަށާނީ މިމަހުގެ 25 ވަނަ ދުވަހުއެވެ. އަދި ޗުއްޓީ ނިމުމަށްފަހު އަންނަ އަހަރުގެ ދިރާސީ އަހަރުގެ ކިޔެވުން ފެށޭނީ ޖެނުއަރީ 27 ގައެވެ. އެކަޑަމިކް ކަލަންޑަރުގައިވާ ގޮތުން، ފުރަތަމަ ޓާމްގެ މެދު ބްރޭކް މެއި 24 އިން 30 އަށް ލިބޭނެއެވެ. އަދި ފުރަތަމަ ޓާމްގެ ކިޔެވުން ނިންމާ ޗުއްޓީ ޖުލައި 17 އިން އޮގަސްޓް 1 އާ ހަމައަށް ދިގުދެމިގެންދާނެއެވެ. ދެވަނަ ޓާމް ފަށާނީ އޮގަސްޓް 2 ގައެވެ. ދެވަނަ ޓާމް ނިންމާ ބޮޑު ޗުއްޓީ ލިބޭނީ ޑިސެމްބަރު 18 އިން 2027 ވަނަ އަހަރުގެ ޖެނުއަރީ 12 އާ ހަމައަށެވެ. 2027 ވަނަ އަހަރުގެ ކިޔެވުން ފެށޭނީ ޖެނުއަރީ 17 ގައެވެ.

މިފަހަރުގެ ކަލަންޑަރުގައި ވަނީ އަލަށް ސްކޫލަށް ދަރިވަރުން ވައްދާނެ ތާރީޚާއި، އެއް ސްކޫލުން އަނެއް ސްކޫލަށް ދަރިވަރުން ބަދަލުކުރެވޭނެ މުއްދަތުތައްވެސް ހިމަނާފައެވެ. ދަރިވަރުން ބަދަލުކުރުމަށް މެއި 17 އިން ޖޫން 15 އަށް އަދި އޮކްޓޫބަރު 18 އިން ނޮވެމްބަރު 17 އަށް ދެ މުއްދަތެއް ކަނޑައަޅާފައިވެއެވެ. އަލަށް ސްކޫލަށް ކުދިން ވެއްދުމަށް ކަނޑައަޅާފައިވާ މުއްދަތަކީ ޖުލައި 12 ގެ ފަހުގެ ތާރީޚުތަކެވެ.