2030 ވަނަ އަހަރާ ހަމައަށް އެއް މިލިއަން މީހުން އިނގިރޭސިވިލާތުން އިސްލާމްދީނަށް ވެއްދުމަށް އެ ގައުމުގައި އިސްލާމްދީން ފެތުރުމަށް މަސައްކަތްކުރާ ސަތޭކަ އެތައް ދަޢުވާ ޕްރެކްޓިޝަނަރުން މަސައްކަތް ފަށައިފި އެވެ.
މިމަސައްކަތް ފެށީ، އިސްލާމިކް އެޑިޔުކޭޝަން އެންޑް ރިސާރޗް އެކެޑަމީ (އީރާ) އިން އިންތިޒާމްކޮށްގެން ލެސްޓަރގައި ބޭއްވި ފުރަތަމަ ނެޝަނަލް ދަޢުވާ ކޮންވެންޝަންގައެވެ.
އިނގިރޭސިވިލާތުގެ އެކި ކަންކޮޅުތަކުން ސަތޭކައަށްވުރެ ގިނަ އިސްލާމީ ޖަމްޢިއްޔާތަކުގެ މަންދޫބުން ބައިވެރިވިއެވެ. މި ކޮންވެންޝަންގެ މަޤްޞަދަކީ ބްރިޓެއިންގައި ތިބި މުސްލިމުން ނޫން ފަރާތްތަކަށް އިސްލާމްދީނަށް ދަޢުވަތު ދިނުމުގެ މަސައްކަތް ވިލަރެސްކުރުމެވެ.
މި ކޮންވެންޝަންގައި ބައިވެރިވި ފަރާތްތަކުން އެންމެ އިސް އަމާޒެއްގެ ގޮތުގައި ކަނޑައަޅާފައިވަނީ، އިނގިރޭސިވިލާތުގައި އިސްލާމްދީން ފެތުރުމަށް މިހާތަނަށް ކުރެވޭ އެންމެ ފުޅާ މަސައްކަތުގެ ގޮތުގައި 2030 ވަނަ އަހަރާ ހަމައަށް އެއް މިލިއަން މީހުން އިސްލާމްދީނަށް ވެއްދުމެވެ. އިނގިރޭސިވިލާތުގައި އިސްލާމްދީނަށް ވަންނަ މީހުންގެ އަދަދު އަހަރުން އަހަރަށް އިތުރުވަމުން އަންނަކަން ފާހަގަކުރެވެއެވެ. މި ކޮންވެންޝަންގައި ބައިވެރިވި ފަރާތްތަކުން ފާހަގަކުރި ގޮތުގައި، އިސްލާމްދީނުގެ ޙަޤީޤަތްތައް ރަނގަޅަށް އޮޅުން ފިލުވައިދިނުމަކީ މުހިންމު ކަމެކެވެ.
މި ކޮންވެންޝަންގައި ބައިވެރިވި ފަރާތްތަކުން އެއްބަސްވެފައިވަނީ، އިސްލާމްދީނަށް ދަޢުވަތު ދިނުމުގެ މަސައްކަތުގައި އެކި ޖަމްޢިއްޔާތަކުގެ މެދުގައި ގުޅުން ބަދަހިކޮށް، އެއް އަމާޒަކަށް މަސައްކަތް ކުރުމަށެވެ. އަދި މި މަސައްކަތުގައި ޒަމާނީ ވަސީލަތްތައް ބޭނުންކުރުމަށާއި، ޚާއްޞަކޮށް ޒުވާނުންނަށް އަމާޒުކޮށްގެން ޕްރޮގްރާމްތައް ހިންގުމަށް ވަނީ އެއްބަސްވެފައެވެ.
މި ކޮންވެންޝަންގައި އެކި ދަޢުވާ ޖަމްޢިއްޔާތަކުން ހިއްސާކުރި ތަޖުރިބާތަކާއި، ކާމިޔާބު ވި ގޮތްތަކުގެ މައްޗަށް މަޝްވަރާކުރެވުނެވެ. އަދި ކުރިއަށް އޮތް އަހަރުތަކުގައި އިސްލާމްދީނަށް ދަޢުވަތު ދިނުމުގެ މަސައްކަތް އިތުރަށް ހަރުދަނާކުރުމަށް ކުރެވިދާނެ ކަންކަމާ މެދު މަޝްވަރާކުރެވުނެވެ.
އީރާގެ ޓްރަސްޓީ ސަޤީބް ސައްތާރު ވިދާޅުވި ގޮތުގައި، އިނގިރޭސިވިލާތުގައި އިސްލާމޮފޯބިއާ އާއި ހައްދުފަހަނައަޅާފައިވާ ކަނާތްފިކުރު އިތުރުވަމުން ދިޔަ ނަމަވެސް، މިއީ އިސްލާމްދީނުގެ ޙަޤީޤީ މެސެޖް ފޯރުކޮށްދިނުމުގެ ފުރުޞަތެކެވެ. އަދި މި ކޮންވެންޝަނަކީ އިނގިރޭސިވިލާތުގައި ދަޢުވާގެ މަސައްކަތް ކުރިއެރުވުމަށް އަލަށް ފެށޭ ޤައުމީ ޙަރަކާތެއްގެ ފެށުމެވެ.
2009 ވަނަ އަހަރު ޝައިޚް ޢަބްދުއްރަޙީމް ގްރީން އުފެއްދެވި އީރާއިން ވޭތުވެދިޔަ އަހަރު 100 އަށްވުރެ ގިނަ ޤައުމުތަކުގައި 201,288 މީހުން އިސްލާމްދީނަށް ވައްދާފައިވެއެވެ. ޝައިޚް ގްރީން ވިދާޅުވި ގޮތުގައި ދަޢުވާގެ މަސައްކަތުގައި އެންމެ މުހިންމީ ވާހަކަދެއްކުމެވެ.
އީރާގެ ޔޫސުފް ޗެމްބަރސް ވިދާޅުވި ގޮތުގައި ދަޢުވާއަކީ ލޯބިވުމާއި، އިންސާނީ ހިތްތައް އެއްބައިވަންތަކަމުގައި ގުޅުވައިދިނުމާއި، އެންމެ ރަނގަޅު ބަހުން މީސްތަކުން ކުފުރާއި ޝިރުކުން ދުރުކޮށް، ތެދުމަގަށް އިރުޝާދު ދިނުމެވެ. މި ކޮންވެންޝަންގައި ޢަލީ ދަޢުވާ، ޢަދްނާން ރަޝީދު، ޙަމްޒާ ޒޯރްޒިސް ފަދަ ދަޢުވާގެ މައިދާނުގެ ފާހަގަކޮށްލެވޭ ޝަޚްޞިއްޔަތުތައްވެސް ބައިވެރިވިއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!