ޕޯޗުގަލްގެ ސްކޫލަކުން ދުނިޔޭގެ އެންމެ ބޮޑު ޕްރޮގްރާމިންގ ފިލާވަޅުގެ ރެކޯޑު ހަދައިފިއެވެ.
ޕޯޗުގަލްގެ ވެރިރަށް ލިސްބަންގައި ހުންނަ ޔުނިވަރސިޓީ އޮފް ލިސްބަންގެ އައި.އެސް.ޓީ ސްކޫލް އޮފް ޓެކްނޮލޮޖީގައި މިއަދު ބޭއްވި ހަރަކާތެއްގައި 1،668 ބައިވެރިން އެއްތަނެއްގައި ބައިވެރިވެ، ދުނިޔޭގެ އެންމެ ބޮޑު ޕްރޮގްރާމިންގ ފިލާވަޅުގެ ރެކޯޑު ހަދާފައިވާއިރު، މި ރެކޯޑު ކަށަވަރުކޮށްދިނީ ގިނިސް ވޯލްޑް ރެކޯޑްސްގެ އެޖުޑިކޭޓަރ ޕައުލީނާ ސަޕިންސްކާއެވެ.
12 އަހަރާއި 67 އަހަރާ ދެމެދުގެ އުމުރުފުރައިގެ މީހުން ބައިވެރިވި މި ހަރަކާތުގެ ކުރިން ދުނިޔޭގެ ރެކޯޑު އޮތީ 2016 ވަނަ އަހަރުގެ އޮކްޓޯބަރު 31 ވަނަ ދުވަހު އެމެރިކާގެ ޑަލަސްގައި ބޭއްވުނު 724 މީހުން ބައިވެރިވި ހަރަކާތަކަށެވެ.
އައި.އެސް.ޓީގެ ވެރިޔާ ރޮޖޭރިއޯ ކޮލާކޯ ވިދާޅުވި ގޮތުގައި މިއަދު ކޮމްޕިއުޓިންގ ލިޓަރަސީއަކީ 100 އަހަރު ކުރިން ލިޔަން ކިޔަން އެނގުން ފަދަ މުހިންމު ކަމެކެވެ. އަދި މިއަދުގެ ދުނިޔޭގައި ދިރިއުޅުމަށް ކޮމްޕިއުޓަރ ސައިންސްއާއި ޕްރޮގްރާމިންގއާ ބެހޭ ކޮންމެވެސް ވަރެއްގެ މައުލޫމާތު ކޮންމެ މީހަކަށްވެސް އެނގެން ޖެހޭނެ ކަމަށް އޭނާ ވިދާޅުވިއެވެ.
މި ހަރަކާތުގެ މަޤްޞަދަކީ ޕޯޗުގަލްއަކީ އިންފޮމޭޝަން ޓެކްނޮލޮޖީގެ ދާއިރާގައި ކުރިއަރަމުން އަންނަ މަރުކަޒެއްގެ ގޮތުގައި ބައިނަލްއަޤްވާމީ ސަމާލުކަން ހޯދުމާއި އަދި ޢާންމުކޮށް ކޮމްޕިއުޓިންގ މަޝްހޫރުކުރުމެވެ.
