އީސީގެ މެންބަރުކަމަށް ކުރިމަތިލާން ހުޅުވައިލައިފި

އިލެކްޝަންސް ކޮމިޝަން (އީސީ) މެންބަރުކަމުގެ މަގާމަށް ކުރިމަތިލުމުގެ ފުރުޞަތު ރައީސް އޮފީހުން މިއަދު ހުޅުވާލައްވައިފިއެވެ.

އީސީގެ މެންބަރުކަމަށް ކުރިމަތިލާން މި ހުޅުވައިލީ އެ ކޮމިޝަންގެ ނައިބު ރައީސްގެ މަގާމުގައި ހުންނެވި އިސްމާއީލް ހަބީބުގެ ދައުރު ހަމަވާތީއެވެ.

އީސީގެ މެންބަރުކަމަށް އެދި ހުށަހެޅުމުގެ ފުރުޞަތު މިއަދުން ފެށިގެން 30 ޖަނަވަރީ 2024 ވާ އަންގާރަ ދުވަހުގެ 12:30 ގެ ނިޔަލަށް ރައީސް އޮފީހުން ވަނީ ހުޅުވާލާފައެވެ.

އެ ކޮމިޝަނުގެ މެންބަރުކަމަށް ކުރިމަތިލުމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، 2024 ޖަނަވަރީ 29 އަދި 30 ވަނަ ދުވަހު، ހެނދުނު 08:30 އިން މެންދުރު 12:30 އާ ދެމެދު ރައީސް އޮފީހުންނެވެ.

އީސީ މެންބަރުކަމުގެ މަޤާމަށް ކުރިމަތިލުމަށް އެދޭ ފޯމު ރައީސް އޮފީހުގެ ރިސެޕްޝަނުން ލިބެންހުންނާނެއެވެ. އަދި އެ އޮފީހުގެ ވެބްސައިޓް https://presidency.gov.mv އިން ޑައުންލޯޑް ވެސް ކުރެއްވޭނެއެވެ.

އެ ކޮމިޝަންގައި ހަބީބުގެ އިތުރުން ދެން ތިއްބަވަނީ ރައީސް ފުއާދު ތައުފީޤާއި، ތިން މެންބަރުން ކަމަށްވާ މުހައްމަދު އާސިފް އާއި ޢަލީ ނަޝާތު އަދި ޑރ. މުޙައްމަދު ޒާހިރު އެވެ.