ދުނިޔޭގެ ގައުމުތަކަށް ބަލާއިރު ގިނަ ގައުމު ތަކަކީ ސިޔާސީ ޕާޓީ ތަކަށް ދައުލަތުގެ ބަޖެޓުން ފައިސާ ދޭ ގައުމުތަކެއް ނޫން ކަމަށް އިލެކްޝަންސް ކޮމިޝަނުންގެ ނައިބް ރައީސް އަހުމަދު އަކްރަމް ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން އީސީގެ ނައިބް ރައީސް އަހުމަދު އަކްރަމް ވިދާޅުވީ ފައިސާ ދޭ މަދު ގައުމު ތަކުގައި ވެސް އެ ފައިސާ ދެނީ ސިޔާސީ ގޮތުން ހަރަކާތްތެރިވާ މިންވަރަށް ބަލާފައި ކަމަށާއި އެގޮތުން ރާއްޖޭގައިވެސް ސިޔާސީ ޕާޓީތަކަށް ފައިސާ ދޫކުރާގޮތް ބަދަލު ކުރުމަށް އިލެކްޝަންސް ކޮމިޝަނުން ވިސްނަމުންދާ ކަމަށެވެ.
ސިޔާސީ ޕާޓީތަކުގެ ޤާނޫނަށް ގެނެވޭ އިސްލާހުގެ ދަށުން ޕާޓީތަކަށް ދޫކުރާ ފައިސާ ދޫކުރާ ގޮތް ބަދަލުކުރުމަށް، އެ އިސްލާހު ބަންޑާރަ ނައިބް އޮފީހަށް ފޮނުވާނެ ކަމަށާއި ހުށަހެޅޭ އިސްލާހުގައި ފައިސާ ދޫކުރުމަށް ހަމަޖެހިފައިވަނީ ތިން ގިންތިއަކަށް ބަލާފައި ކަމަށް އަކްރަމް ވިދާޅުވިއެވެ.
މި އިސްލާހުގައި ފައިސާ ދޭ އުސޫލަށް ބަލާއިރު އެންމެ ބޮޑު ޕަސެންޓެއް އޮންނަނީ ސިޔާސި ގޮތުން ޕާޓީ ހަރަކާތްތެރިވާ މިންވަރަށް ބެލުމަށްފަހު ފައިސާ ދިނުމަށް ކަމަށެވެ. އެ މިންގަޑުގެ ގޮތުގައި ބަލަނީ ރައްޔިތުންގެ މަޖިލީހުގެ އިންތިޚާބުގައި ޕާޓީތަކުން ބައިވެރިވެ އެޕާޓީން ހޯދާ ވޯޓުގެ ނިސްބަތް ކަމަށްވެސް އަކްރަމް ވިދާޅުވިއެވެ.
ދެވަނަ ކަމަކަށް ފައިސާ ދޫކުރަނީ ދައުލަތުގެ ބަޖެޓުން ދޫކުރާ ފައިސާގެ ތެރެއިން ޕާޓީ ހިންގުމަށް ދޫކުރާ ވަކި ޕަސެންޓެއް ކަމަށް އަކްރަމް ވިދާޅުވިއެވެ. ތިންވަނަ އިސްލާހަކީ މިހާރުވެސް އޮންނަ އުސޫލުން 10000 މެމްބަރުންނަށް ވުރެ މަތީގެ ޕާޓީތަކަށް މެމްބަރޝިޕަށް ބަލާފައިދޭ ފައިސާ ކަމަށް އަކްރަމް ވިދާޅުވިއެވެ.
އަކްރަމް އިތުރަށް ވިދާޅުވީ ކޮންމެ އަހަރެއްގެ ވެސް ފުރަތަމަ ކުއާޓަރގައި އިލެކްޝަންސް ކޮމިޝަނުން ފައިސާ ނުދޭކަމަށް ބުނާ އަޑު އިވޭ ކަމަށާއި އެ ފައިސާ ފުރަތަމަ ތިން މަސް ދުވަހުގެ ތެރޭގައި ނުދެވޭ ސަބަބުތަކުގެ ތެރޭގައި އަކްރަމް ފާހަގަ ކުރައްވާފައިވާނީ މިހާރު ޤާނޫނުގައި އޮންނަ ގޮތުން ފައިސާ ދޭން ވާނީ އޮޑިޓް ރިޕޯޓާއި އަހަރީ ރިޕޯޓް ހުށަހެޅުމުން ކަމަށާއި ނަމަވެސް ގިނަ ޕާޓީތަކަށް އެ ރިޕޯޓް ހުށަހެޅެނީ އެންމެ ފަހު ދުވަހު ކަން އަކްރަމް ފާހަގަ ކުރަމުން ބުނީ އޮޑިޓް ރިޕޯޓް އޮޑިޓް އޮފީހަށް ހުށަހެޅުމަށް ފަހުގައި އޮޑިޓް އޮފީހުންދޭ ރައުޔަކަށް ފައިސާ ދިނުމުގެ ކުރިން ބައްލަވާނެ ކަމަށެވެ. އަދި އަހަރީ ރިޕޯޓް އައުމުން އެ ޕާޓީއެއް ހަރަކާތްތެރިވެފައިވާ މިންވަރު ބަލާނެ ކަމަށް އޭނާ ވިދާޅުވިއެވެ.
އެހެންކަމުން ތިން މަސް ދުވަސް ތެރޭގައި ފައިސާ ދެވޭނެ ގޮތަކާއި މެދު އަކްރަމް ވަނީ ސުވާލު އުފައްދަވާފައެވެ. އަދި ޤާނޫނަށް ބަދަލު އައުމުން މިކަހަލަ ފުށޫއެރުންތައް ބަދަލުވެގެންދާނެ ކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ އެބޭފުޅުން ގަސްތުކުރަމުންދަނީ ހަމައެކަނި މެމްބަރޝިޕަށް ބަލާފައި ފައިސާ ދިނުން ހުއްޓާލުމަށެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!