އިނގިރޭސިވިލާތް، ކްރޮއޭޝިއާ، ޕެނަމާ އަދި ގާނާ ހިމެނޭ ގްރޫޕް އެލް އަކީ ވޯލްޑް ކަޕްގެ ފުރަތަމަ ބުރުގެ އެންމެ އުނދަގޫ އެއް ގްރޫޕެވެ.

48 ޓީމު ހިމެނޭ ބޮޑު މުބާރާތަކަށް ބަދަލުވުމާއެކު، މަތީ ފަންތީގެ ގިނަ ޓީމުތަކެއް އެއް ގްރޫޕެއްގައި ހިމެނިގެން އުފެދޭ "ގްރޫޕް އޮފް ޑެތް" އެއް އޮތުމުގެ ފުރުސަތު ވަނީ ވަރަށް ބޮޑަށް ކުޑަވެފައެވެ.

Ad
rt

ނަމަވެސް، ޖެހިޖެހިގެން ދެ ފަހަރު ޔޫރަޕިއަން ޗެމްޕިއަންޝިޕްގެ ރަނަރަޕްކަން ހޯދި އިނގިރޭސިވިލާތާއި، 2018 ގެ ވޯލްޑް ކަޕް ފައިނަލް އަދި 2022 ގެ ސެމީ ފައިނަލަށް ދަތުރުކުރި ކްރޮއޭޝިއާ ހިމެނުމާއެކު، ގްރޫޕް އެލް ގައި ދުނިޔޭގެ ފުޓްބޯޅައިގެ ދެ ގަދަބާރު އެބައޮތެވެ.

މީގެ އިތުރުން، ފީފާ ރޭންކިންގެ 33 ވަނައިގައި އޮތް ޕެނަމާ އާއި، އެންޓޮއިން ސެމެންޔޯ، އިނާކީ ވިލިއަމްސް އަދި ތޯމަސް ޕާޓޭ ފަދަ ޔޫރަޕްގެ މަތީ ފަންތީގައި ކުޅޭ ކުޅުންތެރިން ހިމެނޭ ގާނާ ވެސް މި ގްރޫޕުގައި ހިމެނެއެވެ.

އިނގިރޭސިވިލާތް

އިނގިރޭސިވިލާތުން އަމިއްލަ ގައުމުގައި 1966 ވަނަ އަހަރު ވޯލްޑް ކަޕް ކާމިޔާބުކުރި ފަހުން މިހާރު 60 އަހަރު ވެއްޖެއެވެ. މިއީ އެ ގައުމުން މިހާތަނަށް ހޯދި ހަމައެކަނި ބޮޑު ބައިނަލްއަގުވާމީ ތައްޓެވެ.

1990 ގެ އަހަރުތަކުން ފެށިގެން، އިނގިރޭސި ސަޕޯޓަރުން އަންނަނީ މަލާމާތުގެ ރޫހެއްގައި "އިޓްސް ކަމިން ހޯމް" މި ލަވަ ކިޔަމުންނެވެ. މިއީ އެ ގައުމުގެ އުންމީދުތަކާއި، އެތައް އަހަރެއްގެ އިންތިޒާރަށްފަހު ލިބޭ މާޔޫސްކަމަށް މަލާމާތްކޮށް ކިޔާ ލަވައެކެވެ.

އެހެންނަމަވެސް، ވޭތުވެދިޔަ އަށް އަހަރު ދުވަހުގެ ތެރޭގައި އިނގިރޭސިވިލާތުން ވަނީ ބޮޑެތި މުބާރާތްތަކުގެ ފަހު މަރުހަލާތަކުގައި ދެމެހެއްޓެނިވި ކާމިޔާބީތަކެއް ހޯދާފައެވެ. އެގޮތުން 2018 ގެ ވޯލްޑް ކަޕްގެ ސެމީ ފައިނަލަށް ދަތުރުކުރުމުގެ އިތުރުން، 2021 އަދި 2024 ވަނަ އަހަރުގެ ޔޫރަޕިއަން ޗެމްޕިއަންޝިޕްގެ ފައިނަލުގައި ވަނީ ކުޅެފައެވެ.

މި ކާމިޔާބީތައް ހޯދީ ކުރީގެ މެނޭޖަރު ގަރެތު ސައުތުގޭޓްގެ އިރުޝާދުގެ ދަށުންނެވެ. އޭނާ މަގާމުން ވަކިވީ ޔޫރޯ 2024 ގެ ފައިނަލުގައި ސްޕެއިން އަތުން ބަލިވުމުންނެވެ. އޭނާގެ ބަދަލުގައި މިހާރު ހަވާލުވެ ހުރީ ޖަރުމަނުގެ ކޯޗު ތޯމަސް ޓުޗެލްއެވެ.

ޓުޗެލްގެ އިރުޝާދުގެ ދަށުން އިނގިރޭސިވިލާތް ވޯލްޑް ކަޕަށް ކޮލިފައިވީ ކުޅުނު ހުރިހާ މެޗަކުން މޮޅުވެ، ބައިކޮޅަށް ލަނޑެއް ވަނަނުދީއެވެ. އެހެންނަމަވެސް، ކުޅުންތެރިންގެ ފަރާތުން ފެންނަ ކުޅުމަކީ އަބަދު އެންމެ ހިތްހަމަޖެހޭ ފަދަ ކުޅުމެއް ނޫނެވެ. އަދި ޔޫރޯއަށްފަހު އިނގިރޭސި ސްކޮޑު އިތުރަށް ވަރުގަދަވިތޯ ނުވަތަ ފަހަތަށް ދިޔަތޯ މިއީ ސުވާލު އުފެދޭ ކަމެކެވެ.

ކްރޮއޭޝިއާ

ކްރޮއޭޝިއާ އަކީ ވޯލްޑް ކަޕްގައި ނަތީޖާ ނެރުމަށް އާދަވެފައިވާ ޓީމެކެވެ.

ޔޫގޮސްލާވިއާގެ ކިބައިން މިނިވަންވުމަށްފަހު، 1998 ވަނަ އަހަރު އެ ގައުމުން ކުޅުނު ފުރަތަމަ ވޯލްޑް ކަޕުން ވަނީ ތިންވަނަ ހޯދާފައެވެ.

އޭގެ ވިހި އަހަރު ފަހުން، 2018 ވަނަ އަހަރުގެ ވޯލްޑް ކަޕް ފައިނަލަށް ދަތުރުކުރި ނަމަވެސް، ފްރާންސް އަތުން ވަނީ ބަލިވެފައެވެ. މީގެ ހަތަރު އަހަރު ކުރިން ގަތަރުގައި ބޭއްވި ވޯލްޑް ކަޕްގައި، ބްރެޒިލް ކަޓުވާލުމަށްފަހު އެ ގައުމުން ވަނީ ސެމީ ފައިނަލުގައި ކުޅެފައެވެ.

އުމުރުން 40 އަހަރުގައި ވެސް، ގައުމީ ބަތަލު ލޫކާ މޮޑްރިޗް އަކީ ކްރޮއޭޝިއާގެ އެންމެ މުހިންމު ކުޅުންތެރިޔާއެވެ. ރެއާލް މެޑްރިޑްގައި ކާމިޔާބު ދުވަސްތަކެއް ހޭދަކުރި މި މިޑްފީލްޑަރު ވަނީ ހަ ފަހަރު ޗެމްޕިއަންސް ލީގު ކާމިޔާބުކޮށްފައެވެ. 2018 ވަނަ އަހަރު ކްރޮއޭޝިއާ ވޯލްޑް ކަޕް ފައިނަލަށް ގެންގޮސްދިނުމާ ގުޅިގެން، ދުނިޔޭގެ އެންމެ މޮޅު ކުޅުންތެރިޔާއަށްދޭ ބެލޮންޑިއޯ އެވޯޑު އޭނާއަށް ލިބުނެވެ.

މިހާރު ޔޫރަޕްގެ ބޮޑެތި ކްލަބުތަކުން ފެންނަ ކްރޮއޭޝިއާގެ ތަރިންގެ އަދަދު މަދުވި ނަމަވެސް، އެމެރިކާގެ އެމް.އެލް.އެސް ގައި ކުޅޭ ޕެޓާ މޫސާ އާއި މާކޯ ޕަސާލިޗް އަކީ އެމެރިކާގެ ސަޕޯޓަރުންނަށް ދަންނަ މޫނުތަކަކަށް ވާނެއެވެ.

މެންޗެސްޓަރ ސިޓީގެ މިޑްފީލްޑަރު މަޓެއޯ ކޮވަސިޗް އަނިޔާގެ ސަބަބުން މި ސީޒަނުގެ ބޮޑު ބައެއްގައި ނުކުޅެ ހުރި ނަމަވެސް، ވޯލްޑް ކަޕް ފެށޭއިރު އޭނާ ފިޓްވާނެ ކަމަށް ބެލެވެއެވެ.

ގާނާ

މެންޗެސްޓަރ ސިޓީގެ ފޯވާޑް ސެމެންޔޯ އަކީ ގާނާ ޓީމުން އެންމެ ފާހަގަކޮށްލެވޭ ކުޅުންތެރިޔާއެވެ. އޭނާ ވޯލްޑް ކަޕަށް ކުރިމަތިލަނީ ޕްރިމިއާ ލީގުގައި މޮޅު ކުޅުމެއް ދެއްކުމަށްފަހުއެވެ.

ބޯންމައުތުގައި އޭނާ ދެއްކި މޮޅު ކުޅުމުގެ ސަބަބުން އިނގިރޭސިވިލާތުގެ ބޮޑެތި ކްލަބުތަކުގެ ސަމާލުކަން ލިބި، ޖެނުއަރީ މަހު 87 މިލިއަން ޑޮލަރަށް އޭނާ ވަނީ ސިޓީއާ ގުޅިފައެވެ.މިދިޔަ ހަ ވޯލްޑް ކަޕްގެ ތެރެއިން ފަސް މުބާރާތަކަށް ގާނާ ކޮލިފައިވެފައިވާއިރު، އެ ގައުމުގެ އެންމެ ކާމިޔާބު ނަތީޖާއަކީ 2010 ވަނަ އަހަރު ކުއާޓާ ފައިނަލަށް ދަތުރުކުރުމެވެ.

އެ މުބާރާތުގެ ކުއާޓާ ފައިނަލުގައި އުރުގުއޭގެ ލުއިސް ސުއަރޭޒް، އިތުރު ވަގުތުގެ އެންމެ ފަހު މިނެޓުގައި ޑޮމިނިކް އަޑިޔާ ބޮލުން ޖެހި ބޯޅައެއް އަތުން މަތަކުރުމުން ގާނާ ބަލިވި ބަލިވުމަކީ، ވޯލްޑް ކަޕްގެ ތާރީޚުގައި ހިނގި އެންމެ ބޮޑު އެއް ބޭއިންސާފު ކަމުގައި ބެލެވެއެވެ. އެ ހާދިސާއާ ގުޅިގެން ސުއަރޭޒަށް ރަތް ކާޑު ދައްކައި ގާނާއަށް ޕެނަލްޓީއެއް ދިން ނަމަވެސް، އަސާމޯއާ ގިއާން އަތުން އެ ޕެނަލްޓީ ކާމިޔާބެއް ނުވިއެވެ. ނަތީޖާ ނެރުމަށް ޖެހި ޕެނަލްޓީ ޝޫޓްއައުޓުން މޮޅުވީ އުރުގުއޭއެވެ.

އޭގެ ފަހުން ގާނާއަށް ގްރޫޕް ސްޓޭޖުން ކުރިއަށް ދެވިފައެއް ނުވެއެވެ. އަދި މިފަހަރުގެ ވޯލްޑް ކަޕަށް ކޮލިފައިވި ނަމަވެސް، އެންމެ ފަހުން ބޭއްވި އެފްރިކަން ކަޕް އޮފް ނޭޝަންސްއަށް އެ ގައުމު ކޮލިފައިވެފައެއް ނުވެއެވެ.

ޖެހިޖެހިގެން ހަތަރު މެޗުން ބަލިވުމާ ގުޅިގެން މިދިޔަ މާޗް މަހު ކޯޗު އޮޓޯ އެޑޯ މަގާމުން ވަކިކުރުމާއެކު، ވޯލްޑް ކަޕަށް ގާނާގެ ތައްޔާރުވުންތައް ދިޔައީ ވަރަށް ހަލަބޮލިކޮށެވެ. މިހާރު އެ ޓީމާ ހަވާލުވެފައިވަނީ ރެއާލް މެޑްރިޑްގެ ކުރީގެ ކޯޗު ކާލޯސް ކުއިރޯޒްއެވެ.

ޕެނަމާ

ޕެނަމާ މިފަހަރު ވާދަކުރާނީ އެ ގައުމުގެ ދެވަނަ ވޯލްޑް ކަޕްގައެވެ. މީގެ ކުރިން އެ ގައުމު ކޮލިފައިވީ 2018 ވަނަ އަހަރެވެ.

ކޮލިފައިން ގްރޫޕްގެ އެއްވަނަ ހޯދުމުގެ އިތުރުން، އެ ގައުމުން ވަނީ ފަހުގެ މުބާރާތްތަކުގައި ރަނގަޅު ކުޅުމެއް ދައްކާފައެވެ. އެގޮތުން 2023 ވަނަ އަހަރުގެ ގޯލްޑް ކަޕް އަދި 2025 ވަނަ އަހަރުގެ ކޮންކާކަފް ނޭޝަންސް ލީގުގެ ފައިނަލަށް އެ ގައުމު ދަތުރުކުރިއެވެ.

ލީޑްސް ޔުނައިޓެޑްގެ ކުރީގެ ކޯޗު ތޯމަސް ކްރިސްޓިއަންސަން 2020 ވަނަ އަހަރުން ފެށިގެން ޕެނަމާއާ ހަވާލުވެ، އެ ގައުމުގެ ފުޓްބޯޅަ ކުރިއެރުވުމަށްފަހު މިވަނީ ވޯލްޑް ކަޕަށް ގެންގޮސްދީފައެވެ.

މި ގްރޫޕުން ކުރިއަށް ދާނެ ކަމަށް އެންމެ ބޮޑަށް ބެލެވެނީ އިންގްލެންޑާއި ކްރޮއޭޝިއާ ނަމަވެސް، ގްރޫޕްގެ ތިންވަނަ ހޯދައި ގަދަ 32 ގެ ބުރަށް ދިއުމަށް ޕެނަމާއިން ވަރުގަދަ ފައިޓެއް ދޭނެ ކަމަށް ބެލެވެއެވެ.