ރާއްޖޭގައި ބޭންކެއް ހިންގުމުގެ ހުއްދަ ''މޯލްޑިވްސް ޕްރިމިއާ ބޭންކް'' އަށް ދީފި

ދިވެހިރާއްޖޭގައި ބޭންކިންގ ވިޔަފާރިކުރުމުގެ ލައިސަންސް އިތުރު ބޭންކަކަށް، މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދީފިއެވެ.

މި ލައިސަންސް ދޫކޮށްފައިވަނީ މޯލްޑިވްސް ޕްރިމިއަރ ބޭންކް ޕްރައިވެޓް ލިމިޓެޑް އަށެވެ.

އެމްއެމްއޭގެ ފަރާތުން މި ލިޔުން ހަވާލުކޮށްދެއްވީ ގަވަރނަރު އަހްމަދު މުނައްވަރެވެ. މޯލްޑިވްސް ޕްރިމިއާ ބޭންކް ޕްރައިވެޓް ލިމިޓެޑުގެ ފަރާތުން މިލިޔުމާއި ހަވާލުވެފައި ވަނީ ޗެއާޕާސަން އައިޝާ ނޫރްއައިން ޖަނާހު އެވެ.

އެމްއެމްއޭ އިން ހާމަކޮށްފައިވާ ގޮތުގައި، 19 މެއި 2025 ގައި 'ޓިއަރ 1' ބޭންކެއް ގާއިމުކުރުމަށް ބޭނުންވާ ލައިސަންސް ދިނުމުގެ ކުރިން ދޫކުރި ހުއްދައިގެ ދަށުން އެ އޮތޯރިޓީން ކަނޑައެޅި ޝަރުތުތައް އެ ބޭންކުން ވަނީ ފުރިހަމަކޮށްފައެވެ. އަދި ބޭންކުގެ ނަމާއި މިލްކުވެރިކަމުގެ އޮނިގަނޑަށް ލައިސަންސަށް އެދި ހުށަހެޅި ފަރާތުން އެދުނު ބަދަލުތަކާއެކު، ރާއްޖޭގައި ކޮމަރޝަލް ބޭންކިންގ ވިޔަފާރިކުރުމަށް ބޭނުންވާ ލައިސަންސް އަދި އޮޕަރޭޝަނަލް އެޕްރޫވަލް 18 މޭ 2026 ގައި ވަނީ ދޫކޮށްފައެވެ.

MMA has granted banking licence and operational approval to Maldives Premier Bank Private Limited on 18 May 2026.

The licence was formally handed over at a ceremony held at MMA, attended by the Governor, Deputy Governor, members of the MMA Executive Committee, and the… pic.twitter.com/swrlpNN0XP

— MMA (@MMA_Maldives) May 18, 2026

މޯލްޑިވްސް ޕްރިމިއަރ ބޭންކަށް ލައިސަންސް ދިނުމަކީ ރާއްޖޭގެ މާލީ ދާއިރާ އިތުރަށް ވަރުގަދަކުރުމަށާއި، ބޭންކިންގ ސިނާއަތުގައި ވާދަވެރިކަން އިތުރުކޮށް، ރައްޔިތުންނަށް މާލީ ޚިދުމަތްތައް ފަސޭހައިން ލިބޭނެ މަގު ތަނަވަސްކޮށްދިނުމަށް އެމްއެމްއޭ އިން ކުރަމުންދާ މަސައްކަތަށް ލިބުނު މުހިންމު ކުރިއެރުމެއް ކަމަށް އެ އޮތޯރިޓީން ފާހަގަކުރެއެވެ.

އެމްއެމްއޭގެ މަޤްޞަދަކީ ހަރުދަނާ އުސޫލުތަކެއްގެ ދަށުން ލައިސަންސް ދޫކުރުމާއި ސުޕަވައިޒް ކުރުމުގެ ކަންކަން ކުރިއަށް ގެންގޮސް، ހުރިހާ ފަރާތްތަކަށް ޝާމިލުވެވޭ ފަދަ ވާދަވެރި މާލީ ނިޒާމެއް ދިވެހިރާއްޖޭގައި ދެމެހެއްޓުމެވެ.