ދުނިޔޭގެ ހަކަތައިގެ މައި ދޮރާށި ކަމަށްވާ ހޯރްމޫޒް ކަނޑުއޮޅި ކައިރީގައި 426 ތެޔޮ ޓޭންކަރާއި 53 ގޭސް ޓޭންކަރު ހިމެނޭހެން ސަތޭކައަށްވުރެ ގިނަ އުޅަނދުފަހަރު ތާށިވެފައިވާ ކަމަށް ރިޕޯޓްތައް ބުނެފިއެވެ.

އިންޓަރނޭޝަނަލް މެރިޓައިމް އޯގަނައިޒޭޝަން (އައިއެމްއޯ) އާއި ކެޕްލަރ އިން އިއްޔެ ނެރުނު ތަފާސްހިސާބުތަކުން ދައްކާގޮތުގައި، ދުނިޔޭގެ ހަކަތައިގެ ސަޕްލައިގައި ބޭނުންކުރާ ވަރަށް ގިނަ އަދަދެއްގެ އުޅަނދުތައް މިވަގުތު ވަނީ އެ ސަރަހައްދުގައި ހުއްޓިފައެވެ. މީގެ ތެރޭގައި 426 ތެޔޮ ޓޭންކަރުގެ އިތުރުން 53 ގޭސް ޓޭންކަރު (34 އެލް.ޕީ.ޖީ އަދި 19 އެލް.އެން.ޖީ) ހިމެނެއެވެ.

Ad
rt

ސަރަހައްދުގައި ހަނގުރާމަ ހުއްޓާލުމުގެ އެއްބަސްވުމެއް އޮތް ނަމަވެސް، މި އުޅަނދުތައް ދޫކޮށްލުމަކީ ލޮޖިސްޓިކް އަދި ޑިޕްލޮމެޓިކް ގޮތުން ކުރިމަތިވެފައިވާ ބޮޑު ގޮންޖެހުމެކެވެ.

އީރާނުން ވަނީ އެ ސަރަހައްދުން ދަތުރުކުރާ ކޮންމެ އުޅަނދަކުން "އާބާތުރަ ފިލުވުމާއި ރައްކާތެރިކަމުގެ ޚިދުމަތްތަކަށް" 2 މިލިއަން ޑޮލަރުގެ ފީއެއް ނަގަން ހުށަހަޅާފައެވެ. އެމެރިކާއިން މި ފީއަކީ "ޣައިރުޤާނޫނީ" ފީއެއް ކަމަށް ބުނި ނަމަވެސް، އުޅަނދުތަކުގެ ވެރިން ބޭނުންވަނީ ކޮންމެ ގޮތަކުން ނަމަވެސް ފައިސާ ދައްކައިގެން ފަޅުވެރިން ސަލާމަތްކުރުމަށެވެ. މީގެ އިތުރުން މި ފީގެ ބައެއް އޮމާނަށް ދިނުމަށް އީރާނުން ވަނީ ހުށަހަޅާފައެވެ.

އިސްރާއީލުން ބެއިރޫތަށް ދިން ހަމަލާތަކާ ގުޅިގެން، އިހުތިޖާޖެއްގެ ގޮތުން އީރާނުން ވަނީ ޓޭންކަރުތަކުގެ ދަތުރުފަތުރު އަނެއްކާވެސް މެދުކަނޑާލާފައެވެ. އަދި 21 މޭލުގެ ހަނި ކަނޑުއޮޅިއަކުން 800 އަށްވުރެ ގިނަ އުޅަނދު އެއްފަހަރާ ނެރުމަކީ ފަންނީ ގޮތުންވެސް ބޮޑު އުނދަގުލެކެވެ.

މިވަގުތު އައިއެމްއޯ އިން އިސްކަންދެނީ ތެޔޮ ބަރުކޮށްފައިވާ ޓޭންކަރުތައް ނެރެ، ދުނިޔޭގެ ބާޒާރުގައި ތެލުގެ އަގު ހަމައަކަށް އެޅުވުމަށެވެ. ނަމަވެސް އިންޝުއަރެންސް ކުންފުނިތަކުން ނަގާ ބޮޑު ފީއާއި، ހުޅަނގުގެ އުޅަނދުތަކުން އެމެރިކާގެ އަސްކަރީ އެހީތެރިކަން ހޯދަން ބޭނުންވުމަކީ އީރާނުން ގަބޫލުކުރާ ކަމަކަށް ނުވާތީ މައްސަލަ ވަނީ އިތުރަށް ގޯސްވެފައެވެ.

މި މައްސަލައަށް ހައްލެއް ހޯދުމަށް އޭޕްރިލް 10 ވާ ހުކުރު ދުވަހު ޕާކިސްތާނުގެ އިސްލާމްއާބާދުގައި މުހިންމު މަޝްވަރާތަކެއް ބޭއްވުމަށް ވަނީ ހަމަޖެހިފައެވެ. އެމެރިކާއިން ފީއަށް އިންކާރުކޮށްފިނަމަ، މި އުޅަނދުތައް ކުރިއަށް އޮތް 14 ދުވަހުވެސް ތާށިވެފައި އޮތުން އެކަށީގެންވެއެވެ. ނަމަވެސް "ނިއުޓްރަލް" އެކައުންޓެއް މެދުވެރިކޮށް ފައިސާ ދެއްކުމަށް އެއްބަސްވެވިއްޖެނަމަ، އަންނަ ހޮނިހިރު ދުވަހު އުޅަނދުތަކަށް ދަތުރު ފެށޭނެ ކަމަށް އުންމީދު ކުރެވެއެވެ.