މެދުއިރުމައްޗަށް އެމެރިކާގެ 3,500 އެއްހާ ސިފައިން އިތުރަށް ފޮނުވުމާ ގުޅިގެން، އެމެރިކާއިން އެއްގަމު މަގުން ދީފާނެ ހަމަލާއަކަށް އީރާނުން ތައްޔާރަށް އޮތް ކަމަށް އެގައުމުން ބުނެފިއެވެ.

އީރާނުގެ މަޖިލީހުގެ ރައީސް މުޙައްމަދު ބާގިރު ގާލީބާފް މިއަދު ވިދާޅުވީ، އެމެރިކާއިން ފާޅުގައި މަޝްވަރާގެ މެސެޖުތައް ފޮނުވަމުންދިޔަ ނަމަވެސް، ސިއްރިއްޔާތުގައި ރާވަމުންދަނީ މަކަރުވެރި ރޭވުމަކުން އީރާނަށް އަރައިގަތުމަށް ކަމަށެވެ.

Ad
rt

ގާލީބާފްގެ މި ވާހަކަތައް އަމާޒުވެފައިވަނީ މާރިޗު މަހުގެ ފަހުކޮޅު އެމެރިކާގެ އަސްކަރީ މަނަވަރު ޔޫ.އެސް.އެސް ޓްރިޕޮލީ (އެލްއެޗްއޭ 7) ސެންޓްކޮމްގެ ސަރަހައްދަށް އައުމާ ގުޅިގެންނެވެ. މި މަނަވަރުގައި 31 ވަނަ މެރިން އެކްސްޕެޑިޝަނަރީ ޔުނިޓްގެ 3,500 ސިފައިން ތިބިއިރު، މިއީ އެއްގަމާއި ކަނޑު މަގުން ހަމަލާދިނުމަށް ހާއްސަ ތަމްރީނު ލިބިފައިވާ ބައެކެވެ. ސެޓެލައިޓް ފޮޓޯތަކުން ފެންނަ ގޮތުގައި މި މަނަވަރުގައި އެފް-35ބީ ސްޓެލްތު ޖެޓްތަކާއި، އޮސްޕްރޭ މަތިންދާބޯޓުތަކުގެ އިތުރުން ސީހޯކް ހެލިކޮޕްޓަރުތައް އެބަހުއްޓެވެ.

އެމެރިކާގެ ސަރުކާރުގެ ތެރޭގައި އޮތް ހިޔާލުތަފާތުވުންތައް

ޕެންޓަގަނުން މި ހަރަކާތަކީ އާދައިގެ މަތިން ފޮނުވި އެހީއެއް ކަމަށް ބުނި ނަމަވެސް، ވޮޝިންގޓަން ޕޯސްޓުން ރިޕޯޓްކޮށްފައިވާ ގޮތުގައި މިއީ އީރާނުގެ މިސައިލް ސައިޓްތަކާއި އިންފްރާސްޓްރަކްޗަރަށް އަމާޒުކޮށް ދޭން އުޅޭ ހަމަލާއެއްގެ ފައިނަލް ޕްލޭނެކެވެ. މިއާ ހިލާފަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ 15 ނުކުތާގެ ސުލްހައިގެ ހުށަހެޅުމެއް ހުށަހަޅުއްވައި، އެއްގަމު ސިފައިންނާ ނުލައިވެސް މަގްސަދުތައް ހާސިލްކުރެވިދާނެ ކަމަށް ވިދާޅުވެފައެވެ.

ގާލީބާފް ތުހުމަތު ކުރައްވާ ގޮތުގައި އެމެރިކާގެ ހަގީގީ މަގްސަދަކީ ސުލްހައިގެ ވާހަކަ ދައްކާ ކަމަށް ހެދިގެން ތިބެ، "އޮޕަރޭޝަން ފައިނަލް ބްލޯ" ގެ ދަށުން އީރާނު މުޅިން ބޯލަނބަން މަޖުބޫރު ކުރުވުމެވެ.

"ހަނގުރާމައިން ހާސިލްނުކުރެވުނު ކަންކަން ދުޝްމަނުން މިހާރު މަސައްކަތް ކުރަމުންދަނީ ޑިޕްލޮމެސީގެ ތެރެއިން ހާސިލްކުރުމަށެވެ. އަހަރެމެން ދުވަހަކުވެސް ނިކަމެތިކަމެއް ގަބޫލެއް ނުކުރާނަމެވެ،" އޭނާ ވިދާޅުވިއެވެ.

ސަރަހައްދީ ނުތަނަވަސްކަން އިތުރުވުން

މި ނުތަނަވަސްކަމުގެ ތެރޭގައި، ބަހްރޭނާއި ޔޫ.އޭ.އީ ގެ ބޮޑެތި އެލުމިނިއަމް ކާރުހާނާތަކަށް ދިން ޑްރޯން ހަމަލާތަކުގެ ޒިންމާ އީރާނުގެ އައި.އާރް.ޖީ.ސީ އިން ވަނީ އުފުލާފައެވެ. އަދި ގަތަރުގައި ހުރި އެމެރިކާގެ އަސްކަރީ ބޭސްތަކުން ހަމަލާއެއް ދީފިނަމަ، އޭގެ ނޭދެވޭ އަސަރު މުޅި ސަރަހައްދަށް ކުރާނެ ކަމުގެ ބިރުވެރިކަން މިހާރު ވަނީ އުފެދިފައެވެ.

އީރާނުން ބުނަމުންދަނީ އެމެރިކާގެ ސިފައިން އެއްގަމު މަގުން އަރައިގަންނަން އުޅޭނަމަ، އެމީހުން އަންދާލައި، މި ސަރަހައްދުގައި ތިބި އެމެރިކާގެ ބައިވެރިންނަށް ދާއިމީ އަދަބެއް ދިނުމަށް އީރާނުގެ ސިފައިން ތިބީ ތައްޔާރަށް ކަމަށެވެ.