އިންޑިއާ ކަނޑުގެ ސަރަހައްދު، މަލިކު ކައިރިން ހިފެހެއްޓި ދިވެހި މަސްދޯނި ދޫކޮށްލައިފި އެވެ.
ށ. ކޮމަންޑުއަށް ނިސްބަތްވާ އަންބަރީ ދޯނި މަލިކު ކައިރިން ހިފެހެއްޓީ މިމަހުގެ ހަތަރުވަނަ ދުވަހުގެ ރޭ އެވެ. ދޯނި ހިފެހެއްޓި އިރު އެ ދޯނި ދަތުރު ކުރަމުން ދިޔައީ 10 ވަރަކަށް ފަޅުވެރިންނާ އެކު އެވެ.
“Anbaree” dhoanyaai falhuverin miadhu dhookollaane kamah dhemme India Sarukaarun alhugan’dah angavaifi. Masverikan kurumugai ehen qawmthakuge sarahadhdhah nuvanumah ilthimaaskuran!
— Abdulla Shahid (@abdulla_shahid) October 7, 2019
ފޮރިން މިނިސްޓްރީން ބުނީ، އެ މިނިސްޓްރީން އިންޑިއާގެ މިނިސްޓްރީ އޮފް އެކްސްޓަރނަލް އެފެއަރޒްއާއި ގުޅައިގެން، އެދޯންޏާއި ދޯނީގެ ފަޅުވެރިން މިނިވަންކުރުމަށް ކުރި މަސައްކަތުން، މިއަދުގެ ވަގުތެއްގައި އެ ދޯންޏާއި، ދޯނީގައި ތިބި ފަޅުވެރިން ދޫކޮށްލުމަށް އިންޑިއާ ސަރުކާރުން ނިންމައި، އެކަން ފޮރިން މިނިސްޓަރު އަބްދުﷲ ޝާހިދަށް އަންގާފައިވާ ކަމަށެވެ.
މިނިސްޓްރީ އިން ބުނީ އަންބަރީ ދޯންޏާއި އެ ދޯނީގެ ފަޅުވެރި ދޫކޮށްލުމަށްއެދި ފޮރިން މިނިސްޓްރީ އިން އިންޑިއާގެ އެކްސްޓާނަލް އެފެއާޒް މިނިސްޓްރީގައި އެދުނު ކަމަށާއި ދެ މިނިސްޓްރީ އިން ކުރިއަށްގެންދިޔަ މަޝްވަރާތަކަށްފަހު ދޯންޏާއި ދޯނީގައި ތިބި ފަޅުވެރިން ދޫކޮށްލަން ނިންމައި އިންޑިއާ އިން އެކަން އެންގީ މިއަދު ކަމަށެވެ.
އެހެން ގައުމެއްގެ ކަނޑުގެ ސަރަހައްދުގައި ދިވެހި މަސްވެރި އުޅަނދުތައް ހަރަކާތްތެރިވުމަކީ ގާނޫނާއި ގަވައިދާ ހިލާފު ކަމެއް ކަމަށާއި އެފަދަ ކަންކަމަށް ސަމާލުވުމަށް ފޮރިން މިނިސްޓްރީ އިން ވަނީ މަސްވެރިކަންކުރާ އުޅަނދު ފަހަރުގެ ވެރިންނަށާއި، އުޅަނދުފަހަރު ދުއްވާ ފަރާތްތަކަށް އިލްތިމާސްކޮށްފައެވެ.
ދިވެހި މަސްވެރި އުޅަނދެއް އިންޑިއާ ކަނޑުގެ ސަރަޙައްދުގެ ތެރެއިން މަލިކާއި ގާތްގަނޑަކަށް 3 މޭލު ކައިރިންނެވެ.