މާލޭގެ ގެސްޓްހައުސްއެއްގައި ހއ. މޮޅަދޫ މީހެއް މަރުވެފައި އޮއްވާ ފެނިއްޖެ އެވެ.

ފުލުހުން ހާމަކޮށްފައިވާ ގޮތުގައި، މާފަންނު ގެސްޓްހައުސްއެއްގައި މީހަކު މަރުވެފައި އޮތް ކަމުގެ ރިޕޯޓް ލިބިފައިވަނީ ހަވީރު 5:51 އެހާކަންހާއިރު އެވެ.

Ad
rt

މަރުވެފައި އޮއްވާ ފެނިފައިވަނީ ހއ. މޮޅަދޫ، އޯސަނިކްވިލާ، ޢުމުރުން 45 އަހަރުގެ އިބްރާހީމް ނަޢީމެވެ.

މި ކަމާ ގުޅޭގޮތުން ފުލުހުން ބުނީ މި މައްސަލަ މިހާރު ތަހުގީގު ކުރަމުން އަންނަ ކަމަށެވެ. މި ހާދިސާއާ ގުޅޭ އިތުރު އެއްވެސް ތަފުސީލެއް ފުލުހުން މިހާތަނަށް ހާމަކޮށްފައެއް ނުވެއެވެ.

ނިޔާވެފައި އޮއްވާ ފެނުނު ނައީމަކީ އެމްޓީސީސީގެ ފެރީ ފަޅުވެރިއެއްގެ ވަޒީފާ ފުރަމުން އައި މީހެކެވެ.

ނައީމް ނިޔާވުމުގެ ހިތާމާގައި މޮޅަދޫ ކައުންސިލާއި، އެ ކައުންސިލްގެ ރައީސް އަބުދުލް މުހްސިން ބައިވެރިވެ ޢާއިލާ އަށް ވަނީ ތައުޒިޔާ ފޮނުވާފައެވެ.