ހަނގުރާމަތަކާއި ހަމަނުޖެހުންތަކުގައި ޖިންސީ އަނިޔާ ހިންގާ ފަރާތްތަކުގެ އދ. ގެ އަހަރީ ބްލެކްލިސްޓަށް އިސްރާއީލުގެ ދައުލަތުގެ އިދާރާތައް ރަސްމީކޮށް އިތުރުކޮށްފިއެވެ.
އދ. ގެ ސެކްރެޓަރީ ޖެނެރަލް އެކުލަވާލެއްވި މި ރިޕޯޓުގައި ވަކިން ހާއްސަކޮށް އިސްރާއީލުގެ ޕްރިޒަން ސާވިސް ހިމަނާފައިވާއިރު، އެ ގައުމުގެ އެހެން ބައެއް އިދާރާތައް ވެސް މިހާރު ވަނީ މޮނިޓަރިންގެ ދަށަށް ގެނެސްފައެވެ.
މި ނިންމުމަކީ ފަލަސްތީނުގެ ހައްޔަރު ކުރެވިފައިވާ މީހުންނަށް ޖަލުތަކާއި، އަސްކަރީ މަރުކަޒުތަކުގައި ޖިންސީ ގޯނާ އާއި އަނިޔާ ކުރާ ކަމަށް ބުނެ އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް މީގެ ކުރިން ދެއްވާފައިވާ އިންޒާރުތަކަށް ފަހު ނިންމި ނިންމުމެކެވެ.
އދ. ގެ އުސޫލުތައް ބުނާގޮތުން މިފަދަ ލިސްޓެއްގައި ހިމެނޭ ފަރާތެއް މަދުވެގެން އެއް އަހަރު ދުވަހު އެ ލިސްޓުގައި ދެމިއޮންނާނެއެވެ.
މި ނިންމުމާ ގުޅިގެން އިސްރާއީލުގެ ލީޑަޝިޕުން ވަނީ ވަރަށް ބޮޑަށް ރުޅިވެރިކަން ފާޅުކޮށްފައެވެ. އިސްރާއީލުން ބުނަނީ މިއީ އެއްވެސް އަސާސެއް ނެތް ދޮގު ތުހުމަތުތަކެއް ކަމަށާއި، މިއީ ސިޔާސީ މަގްސަދެއްގައި ނިންމާފައިވާ ނިންމުމެއް ކަމަށެވެ. މިކަމުގެ ރައްދުގައި އިސްރާއީލުން ވަނީ އދ. ގެ ސެކްރެޓަރީ ޖެނެރަލްއާ އެކު އޮތް ހުރިހާ ޑިޕްލޮމެޓިކް ގުޅުންތަކެއް ކަނޑާލާފައެވެ.
އދ. އަށް ކަނޑައަޅާފައި ހުންނަވާ އިސްރާއީލުގެ ސަފީރު ޑެނީ ޑަނޮން ބުނީ އދ.ގެ ސެކްރެޓަރީ ޖެނެރަލްއާ އެކު އިސްރާއީލުން މަސައްކަތް ނިމިއްޖެ ކަމަށެވެ. މިގޮތުން ގުޓަރޭޒްގެ ދައުރު 2026 ވަނަ އަހަރުގެ ނިޔަލަށް ހަމަވަންދެން އޭނާގެ އޮފީހާ އެއްވެސް މުއާމަލާތެއް ނުކުރުމަށް އިސްރާއީލުން ވަނީ ނިންމާފައެވެ. މީގެ އިތުރުން، ޖިންސީ އަނިޔާއާ ބެހޭ އދ. ގެ ހާއްސަ މަންދޫބު ޕްރަމީލާ ޕެޓަން އިސްރާއީލަށް ކުރުމަށް ހަމަޖެހިފައި އޮތް ޒިޔާރަތް ވެސް މިހާރު ވަނީ ކެންސަލްކޮށްފައެވެ.
އިސްރާއީލުގެ ފޮރިން މިނިސްޓްރީން ވަނީ އދ. އަކީ "ކޮރަޕްޓް" އަދި "ދުޝްމަނު" އިދާރާއެއްގެ ގޮތުގައި ސިފަކޮށްފައެވެ. ނަމަވެސް، އިސްރާއީލަކީ އަދިވެސް އދ. ގެ ފުރިހަމަ މެންބަރު ގައުމަކަށް ވާތީ، އދ. ގެ އެހެނިހެން އިންސާނީ އެހީދޭ އިދާރާތަކާ އެކު ފަންނީ މަސައްކަތްތަކުގައި އެއްބާރުލުން ދޭނެ ކަމަށް ބެލެވެއެވެ. އެހެންނަމަވެސް، މިއީ ޒަމާނީ ތާރީހެއްގައި އދ. އާއި އިސްރާއީލާ ދެމެދު ގުޅުން އެންމެ ބޮޑަށް ގޯސްވި ފަހަރެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!