އިސްރާއީލުން ހިފާފައިވާ ފަލަސްތީނުގެ ބިންތަކުގެ އިންސާނީ ހައްގުތަކުގެ ހާލަތު ބަލާ އދ.ގެ ހާއްސަ ރެޕަޓުއާ ފްރެންޗެސްކާ އަލްބަނީޒްއާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް އެ ގައުމުން އުވާލައިފިއެވެ.
މި ފިޔަވަޅުތައް އުވާލާފައި މިވަނީ، އެ ފިޔަވަޅުތަކުގެ ސަބަބުން އޭނާގެ ބަސްބުނުމުގެ މިނިވަންކަމަށް ހުރަސްއެޅޭ ކަމަށް އެމެރިކާގެ ފެޑަރަލް ފަނޑިޔާރަކު ކަނޑައެޅިތާ ހަފްތާއެއް ފަހުންނެވެ.
އެމެރިކާގެ ޓްރެޜަރީ ޑިޕާޓްމަންޓުން ބުދަ ދުވަހު އާންމުކުރި އަޕްޑޭޓެއްގައި، ބައިނަލްއަގުވާމީ ޖިނާއީ ކޯޓު (އައިސީސީ) އާ ގުޅުންހުރި ދަތިކުރުމުގެ ފިޔަވަޅުތައް އުވާލި ލިސްޓުގައި އަލްބަނީޒްގެ ނަން ވަނީ ހިމަނާފައެވެ. މި ނިންމުން އައިސްފައިވަނީ އަލްބަނީޒްގެ ފިރިމީހާ އާއި ދަރިފުޅު މިދިޔަ ފެބްރުއަރީ މަހު ހުށަހެޅި މައްސަލައަކާ ގުޅިގެން، ޑިސްޓްރިކްޓް ޖަޖް ރިޗަޑް ލިއޯން އެ ފިޔަވަޅުތަކާ ދެކޮޅަށް ވަގުތީ އަމުރެއް ނެރުއްވުމާ ގުޅިގެންނެވެ.
އަލްބަނީޒްގެ އާއިލާއިން ހުށަހެޅި ދައުވާގައި ބުނެފައިވަނީ، އިސްރާއީލުން ފަލަސްތީނު މީހުންގެ އިންސާނީ ހައްގުތަކަށް އަރައިގަންނަ މައްސަލައިގައި އޭނާ ފާޅުގައި ވާހަކަދައްކަވާތީ، އެކަމުގެ އަދަބެއްގެ ގޮތުން އެމެރިކާގެ ސަރުކާރުން ފިޔަވަޅު އެޅީ ކަމަށެވެ. ފަނޑިޔާރު ލިއޯން ވިދާޅުވީ، ރައީސް ޑޮނަލްޑް ޓްރަމްޕްގެ ސަރުކާރުން މަސައްކަތް ކޮށްފައިވަނީ އަލްބަނީޒް ފާޅުކުރެއްވި ޚިޔާލުތަކާއި މެސެޖުތަކުގެ ސަބަބުން އޭނާގެ ބަސްބުނުމުގެ މިނިވަންކަން ކޮންޓްރޯލް ކުރުމަށް ކަމަށެވެ.
ދަތިކުރުމުގެ ފިޔަވަޅުތަކުގެ ފަހަތް
ޓްރަމްޕްގެ ސަރުކާރުން އަލްބަނީޒްއާ ދެކޮޅަށް ފިޔަވަޅު އެޅީ އޭނާ އަކީ "ވަކި ފަރާތަކަށް ޖެހިފައިވާ އަދި ނުބައި ނިޔަތެއްގައި މަސައްކަތްކުރާ" ފަރާތެއް ކަމަށް ތުހުމަތުކޮށްފައެވެ. އޭގެ ތެރޭގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި ކުރީގެ ޑިފެންސް މިނިސްޓަރު ޔޯވް ގަލަންޓް ހައްޔަރުކުރުމުގެ އަމުރު ނެރުމަށް އައިސީސީއަށް ލަފާދިނުން ހިމެނެއެވެ. ނަމަވެސް ފަނޑިޔާރު ލިއޯން ފާހަގަކުރެއްވި ގޮތުގައި، އަލްބަނީޒްގެ ލަފަޔަކީ އައިސީސީގެ ނިންމުންތަކަށް ބާރު ފޯރުވޭނެ އެއްޗެއް ނޫން ކަމަށާއި، އެއީ ހަމައެކަނި އޭނާގެ އަމިއްލަ ޚިޔާލު ކަމަށެވެ.
މިދިޔަ ޖުލައި މަހު އެމެރިކާއިން މި ފިޔަވަޅުތައް އެޅީ، ގާޒާގައި އިސްރާއީލުން ހިންގާ ގަތުލުއާންމުގައި އެމެރިކާގެ ޓެކްނޮލޮޖީ ކުންފުނިތައް ކަމަށްވާ މައިކްރޯސޮފްޓް، ގޫގުލް އަދި އެމެޒޯން ބައިވެރިވާ ކަމަށް ތުހުމަތުކޮށް އަލްބަނީޒް ރިޕޯޓެއް ޝާއިއުކުރުމާ ގުޅިގެންނެވެ. ފިޔަވަޅުތައް އުވާލުމާ ގުޅިގެން އަލްބަނީޒް ވަނީ އޭނާގެ ދިފާއުގައި ތެދުވި އާއިލާ އަށާއި އެހީތެރިވި ހުރިހާ ފަރާތްތަކަށް ޝުކުރު އަދާކުރައްވާފައެވެ.
މޭ 2022 އިން ފެށިގެން އދ.ގެ ރެޕަޓުއާގެ މަގާމު ފުރުއްވަމުން ގެންދަވާ އަލްބަނީޒްގެ އިތުރުން، އެމެރިކާއިން ވަނީ އައިސީސީގެ ފަނޑިޔާރުންނާއި ޕްރޮސެކިއުޓަރުންނާ ދެކޮޅަށްވެސް ފިޔަވަޅު އަޅާފައެވެ. އެއީ ނަތަންޔާހޫ އާއި ގަލަންޓްގެ މައްޗަށް ހަނގުރާމައިގެ ކުށްތަކުގެ ތުހުމަތުގައި ހައްޔަރުކުރުމުގެ އަމުރު ނެރުމާ ގުޅިގެންނެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!