އުރީދޫ މޯލްޑިވްސްގެ ބޯޑު ޑިރެކްޓަރަކަށް އަބްދުﷲ އަލީ

އުރީދޫ މޯލްޑިވްސްގެ އާންމު ހިއްސާދާރުންގެ ފަރާތުން އެ ކުންފުނީގެ ބޯޑު ޑިރެކްޓަރެއްގެ ގޮތުގައި ޢަބްދުﷲ ޢަލީ ޢައްޔަނުކޮށްފިއެވެ.

ހދ. ހަނިމާދޫ އަށް ނިސްބަތްވާ، މާލީ ދާއިރާގެ ޢިލްމާއި ތަޖުރިބާ ހޯއްދަވާފައިވާ ޢަބުދުﷲ މި މަގާމަށް ޢައްޔަނުކުރިކަން ހާމަކޮށް، އުރީދޫން ވަނީ އޭނާ އަށް މަރުޙަބާ ކިޔާފައެވެ.

އެ ކުންފުނިން ބުނީ މުވާސަލާތީ ގުޅުންތަކާއި އައު އީޖާދުތަކުގެ އެހީގައި ރައްޔިތުންގެ ދިރިއުޅުން މުއްސަނދިކޮށްދިނުމަށް އެ ކުންފުނިން ކުރަމުންދާ މަސައްކަތުގައި، ޢަބުދުﷲގެ ތަޖުރިބާއާއި ޢިލްމީ ލަފާގެ ބޭނުން ހިފިގެންދާނެކަމަށް އުންމީދުކުރާކަމަށެވެ.

ނޭޝަނަލް ޕޭ ކޮމިޝަންގެ މެމްބަރުކަން ވެސް ކުރަށްވާފައިވާ ޢަބުދުﷲ ވަނީ ރާއްޖޭގެ މާލީ ވުޒާރާ އާއި ރާއްޖޭގައި ހުންނަ ބައިނަލްއަގްވާމީ ބައެއް ބެންކް ތަކުގައިވެސް ޚިދުމަތް ކުރަށްވާފައެވެ.

އުރީދޫ މޯލްޑިވްސްއަކީ ދިވެހިރާއްޖޭގައި މުވާސަލާތީ އަދި ޑިޖިޓަލް ޚިދުމަތްތައް ފޯރުކޮށްދިނުމުގައި އެންމެ ކުރިއަރާފައިވާ އެއް ކުންފުންޏެވެ. މިއީ މެދުއިރުމައްޗާއި، އުތުރު އެފްރިކާގެ އިތުރުން އިރުދެކުނު އޭޝިއާގެ ގައުމުތަކުގައި މުވާސަލާތީ ޚިދުމަތްދޭ ބައިނަލްއަގުވާމީ ކުންފުންޏެއް ކަމަށްވާ އުރީދޫ ގްރޫޕުގެ ސަބްސިޑިއަރީ ކުންފުންޏެކެވެ.

މި ކުންފުނީގެ ޚިދުމަތް ރާއްޖޭގައި ފުރަތަމަ ފަށާފައިވަނީ 1 އޯގަސްޓް 2005 ގައެވެ. އެއީ "ވަތަނިއްޔާ ޓެލެކޮމް މޯލްޑިވްސް" ގެ ނަމުގައެވެ. އޭގެ ފަހުން، ޑިސެމްބަރު 2013 ގައި "އުރީދޫ މޯލްޑިވްސް" ގެ ނަމަށް ރީބްރޭންޑްކޮށް، އޮކްޓޯބަރު 2016 ގައި ޕަބްލިކް ލިމިޓެޑް ކުންފުންޏަކަށް ބަދަލުވެ، މޯލްޑިވްސް ސްޓޮކް އެކްސްޗޭންޖުގައި ލިސްޓުކުރެވުނެވެ.

އުރީދޫއަކީ ރާއްޖޭގެ ޓެކްނޮލޮޖީގެ ދާއިރާއަށް އައު އިންގިލާބީ ބަދަލުތަކެއް ގެނައި ކުންފުންޏެކެވެ. އެގޮތުން، ރާއްޖެއަށް އެންމެ ފުރަތަމަ 3ޖީ އަދި 4ޖީ ނެޓްވޯކް ތަޢާރަފުކުރީ މި ކުންފުނިންނެވެ. އަދި މިހާރުވެސް 5ޖީ އާއި ހައި-ސްޕީޑް ބްރޯޑްބޭންޑް ޚިދުމަތް ފުޅާކުރުމުގައި އުރީދޫ ދަނީ އިސްދައުރެއް އަދާކުރަމުންނެވެ.

އާދައިގެ މުވާސަލާތީ ޚިދުމަތްތަކުގެ އިތުރުން، އުރީދޫއިން ވަނީ ފުރިހަމަ ޑިޖިޓަލް ނިޒާމެއް ބިނާކޮށްފައެވެ. މީގެ ތެރޭގައި ހިމެނެނީ:

އެމް-ފައިސާ: ޑިޖިޓަލްކޮށް ފައިސާ ފޮނުވުމާއި އެކި ޚިދުމަތްތަކަށް ފައިސާ ދެއްކުމަށް ބޭނުންކުރާ ޕްލެޓްފޯމެކެވެ.
މޫލީ: ރާއްޖޭގެ އެކި ކަންކޮޅުތަކުގައި ތިބި ވިޔަފާރިވެރިންނާއި ކަސްޓަމަރުން ގުޅުވައިދޭ އީ-ކޮމާރސް މާކެޓްޕްލޭސްއެކެވެ.
ސުޕަރއެޕް: މުވާސަލާތީ، މާލީ އަދި ވިޔަފާރީގެ ޚިދުމަތްތައް އެއް ފުރާޅެއްގެ ދަށުން ލިބިދޭ އެޕްލިކޭޝަނެކެވެ.

އުރީދޫގެ މައިގަނޑު މަގްސަދަކީ "މީހުންގެ ދިރިއުޅުން މުއްސަނދިކުރުން" ކަމުގައިވާއިރު، ޒަމާނީ ޓެކްނޮލޮޖީގެ އެހީގައި އާންމު ފަރުދުންނާއި ވިޔަފާރިތަކުގެ ގާބިލިއްޔަތު އިތުރުކުރުމަށް އެ ކުންފުނިން މަސައްކަތް ކުރެއެވެ.
މި ކުންފުނީގެ މައި މަރުކަޒު ހުންނަނީ ހުޅުމާލޭގައެވެ. އަދި އުރީދޫއަކީ ރާއްޖޭގެ އެކި ރަށްތަކުގައި އިޖުތިމާޢީ ޒިންމާ (ސީ.އެސް.އާރު) ގެ ދަށުން މުޖުތަމަޢަށް ފައިދާހުރި ގިނަގުނަ މަސައްކަތްތަކެއް ކުރަމުންދާ ކުންފުންޏެކެވެ.