އެމެރިކާގެ "އޮޕަރޭޝަން އެޕިކް ފިއުރީ" އަދި އިސްރާއީލުގެ "އޮޕަރޭޝަން ރޯރިންގް ލަޔަން" އަށް އަށް ދުވަސް ފުރިގެންދާއިރު، އީރާނުގެ ވެރިރަށް ތެހެރާނުގައި ހުންނަ ސަރުކާރުގެ މުހިންމު އިމާރާތްތަކަށް ހަމަލާތައް ދީފިއެވެ.

2026 މާރިޗު 6 އާއި 7 ވަނަ ދުވަހު ދިން މި ހަމަލާތަކުގައި އީރާނުގެ ގާނޫނީ އަދި ސަލާމަތީ އިންފްރާސްޓްރަކްޗަރަށް އަމާޒުކޮށް، އެ ގައުމުގެ ވެރިކަމުގެ ބާރުތައް މުގުރާލުމަށް ވަނީ ގަސްދުގައި ވަނީ މަސައްކަތްތަކެއް ކޮށްފައެވެ.

Ad
rt

މިގޮތުން ތެހެރާނުން ލިބޭ ރިޕޯޓްތައް ކަށަވަރުކޮށްދޭ ގޮތުގައި، އެމެރިކާ-އިސްރާއީލުން މިހާރު ވަނީ އަސްކަރީ އަމާޒުތަކުގެ ބޭރަށް ގޮސް، އިސްލާމީ ޖުމްހޫރިއްޔާގެ އެތެރޭގެ ކޮންޓްރޯލް ނިޒާމުގެ މައިގަނޑު މަރުކަޒުތަކަށް ހަމަލާދޭން ފަށާފައެވެ. މިގޮތުން ޝަރުއީ ދާއިރާގެ ދެވަނަ އިދާރީ އިމާރާތާއި، މަދަނީ އަދި އަސްކަރީ މުވައްޒަފުންނާ ބެހޭ ކޯޓުތަކުގެ އިތުރުން ޝަރުއީ ދާއިރާގެ އިންޓެލިޖެންސް ޑިޕާޓްމަންޓް ވަނީ ބިމާ ހަމަކޮށްލާފައެވެ.

ސަލާމަތީ ބާރުތަކަށް އަމާޒުކޮށް ދިން ހަމަލާތަކުގައި، ހުޅަނގު ތެހެރާނުގައި ހުންނަ ސްޕެޝަލް ޕޮލިސް ކޮމާންޑް ހެޑްކުއާޓާޒްގެ ބޮޑުބައެއް ވަނީ ސުންނާފަތިކޮށްލާފައެވެ. މީގެ އިތުރުން އައްބާސް އާބާދުގެ ޕޮލިސް ސްޓޭޝަން 104 އާއި ޔަފްތާބާދުގެ ސްޓޭޝަން 151 އަށް ވެސް ވަނީ ސީދާ ހަމަލާތައް އަމާޒުވެފައެވެ. މި ހަމަލާތަކުގެ ބޭނުމަކީ މަގުތައް ކޮންޓްރޯލް ކުރުމަށް ސަރުކާރުން ބޭނުންކުރާ ބަސީޖް އަސްކަރީ މަރުކަޒުތަކުގެ ބާރު ކަނޑުވާލުން ކަމަށް ބެލެވެއެވެ.

މީގެ އިތުރުން ތެހެރާނުގެ މައި އެއާޕޯޓް ކަމަށްވާ މެހެރްއާބާދު އެއާޕޯޓަށް ވަނީ މި ހަނގުރާމައިގެ އެންމެ ވަރުގަދަ ހަމަލާތައް އަމާޒުވެފައެވެ. ސެޓެލައިޓް ފޮޓޯތަކުން ފެންނަ ގޮތުގައި އެއާޕޯޓުގެ ތެޔޮ ރައްކާކުރާ ގުދަންތަކުގައި ބޮޑެތި އަލިފާންގަނޑުތައް ރޯވެފައިވާއިރު، އިސްރާއީލުން ބުނާ ގޮތުގައި ހަމަލާތައް އަމާޒުކުރީ F-14 އަދި MiG-29 މަރުކާގެ ހަނގުރާމަމަތީ ބޯޓުތައް ބަހައްޓާފައި ހުރި ހޭންގަރުތަކަށެވެ.

މި ހަމަލާތަކާ ގުޅިގެން މެހެރްއާބާދު އެއާޕޯޓް މިހާރު ވަނީ މަދަނީ ދަތުރުފަތުރަށް ބަންދުކޮށްފައެވެ. އިސްރާއީލް ޑިފެންސް ފޯސް (IDF) އިން އެ ސަރަހައްދަކީ "ސްޓްރެޓީޖިކް މިލިޓަރީ ނޯޑް" އެއްގެ ގޮތުގައި ކަނޑައަޅާފައިވާއިރު، މީގެ ސަބަބުން އީރާނުގެ މުޅި ވައިގެ ސަރަހައްދު ބަންދުވެ، ވެރިރަށް ތެހެރާން ވަނީ ދުނިޔެއާ އެކަހެރިވެފައެވެ.

މި ވަރުގަދަ ހަމަލާތައް ދީފައިވަނީ ފެބްރުއަރީ 28 ގައި އީރާނުގެ ސުޕްރީމް ލީޑަރު އަލީ ޚާމަނާއީ އަވަހާރަވިކަން ކަށަވަރުވުމާ ގުޅިގެން އުފެދުނު ހަލަބޮލިކަމުގެ ތެރޭގައެވެ. އެންމެ މަތީ ލީޑަޝިޕާއި، ކޯޓުތަކާއި ފުލުހުން ފަދަ ބާރު ތަންފީޒުކުރާ ފަންތިތައް ނައްތާލުމުން، އެމެރިކާއާއި އިސްރާއީލުން މަސައްކަތް ކުރަމުންދަނީ އީރާނުގެ ވެރިކަމުގެ ނިޒާމުގައި ބާރުގެ ހުސްކަމެއް އުފެއްދުމަށް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.