އަހަރެމެން އީރާނާ ދެކޮޅު ހަނގުރާމައިގައި ބައިވެރިވާކަށް ބޭނުމެއް ނޫން: އިޓަލީ

އީރާނާ ދެކޮޅަށް އެމެރިކާ އާއި އިސްރާއީލުން ކުރިއަށްގެންދާ އަސްކަރީ ހަނގުރާމާގައި އިޓަލީން ބައިވެރިނުވާނެ ކަމަށް އެގައުމުގެ ބޮޑުވަޒީރު ޖޯޖިއާ މެލޯނީ ރަސްމީކޮށް އިއުލާނު ކުރައްވައިފިއެވެ.

ރޯމްގެ އަމާޒަކީ ސަރަހައްދީ ފުޅާ ހަނގުރާމައެއްގެ ތެރެއަށް ވަދެގަތުމުން ސަލާމަތްވުން ކަމަށް ފާހަގަކުރައްވަމުން މެލޯނީ ވިދާޅުވީ އިޓަލީން ގެންގުޅޭނީ ހަމައެކަނި ދިފާއީ ސިޔާސަތެއް ކަމަށެވެ.

"އަހަރެމެން މިތިބީ ހަނގުރާމައެއްގައެއް ނޫން، އަދި ހަނގުރާމައިގައި ބައިވެރިވާކަށްވެސް ބޭނުމެއް ނޫން،" މާރިޗު 5 ވަނަ ދުވަހު އާރް.ޓީ.އެލް 102.5 އަށް ދެއްވި އިންޓަވިއުއެއްގައި މެލޯނީ ވިދާޅުވެފަވެއެވެ.

އެމެރިކާގެ "އޮޕަރޭޝަން އެޕިކް ފިއުރީ" އަދި އިސްރާއީލުގެ "ރޯރިންގް ލަޔަން" ގައި އިޓަލީގެ ބައިވެރިވުމެއް ނޯންނާނެކަން ސާފުކޮށްދެއްވަމުން ބޮޑުވަޒީރު ވިދާޅުވީ، ފެބްރުއަރީ 28 ގައި އީރާނުގެ އެންމެ މަތީ ލީޑަރު ޚާމަނާއީ އަވަހާރަކޮށްލުމަށް ދިން ހަމަލާތަކުގެ ކުރިން އިޓަލީއާ އެއްވެސް މަޝްވަރާއެއް ކޮށްފައި ނުވާ ކަމަށެވެ.

މިކަމާ ގުޅޭގޮތުން އިޓަލީގެ ޑިފެންސް މިނިސްޓަރު ގުއިޑޯ ކްރޮސެޓޯ ޕާލަމެންޓުގައި ވާހަކަދައްކަވަމުން ވިދާޅުވީ، އެމެރިކާ އާއި އިސްރާއީލުގެ ހަމަލާތަކަކީ ބައިނަލްއަގުވާމީ ގާނޫނުތަކުގެ ބޭރުން ދީފައިވާ ހަމަލާތަކެއް ކަމަށެވެ. އެއީ އދ. ގެ މެންޑޭޓެއް ނެތި އަދި އެއީ އަމިއްލަ ދިފާއުގައި ދިން ހަމަލާއެއްކަން ސާބިތުކޮށްދެވިފައި ނުވާތީ ކަމަށް އޭނާ ފާހަގަކުރެއްވިއެވެ.

އީރާނަށް ހަމަލާދިނުމުގައި ބައިވެރިނުވި ނަމަވެސް، ޕާޝިއަން ގަލްފްގައި ތިބި އަރަބި ބައިވެރިން ކަމަށްވާ ސައުދީ އަރަބިއްޔާ އާއި ޔޫ.އޭ.އީ އަށް އިޓަލީން އަސްކަރީ އެހީތެރިކަން ފޯރުކޮށްދޭނެކަމަށް އިޓަލީން ވަނީ ބުނެފައެވެ. މިގޮތުން އީރާނުން ފޮނުވާލާ ޑްރޯންތަކާއި މިސައިލްތައް ހުއްޓުވުމަށް ވައިގެ ދިފާއީ ނިޒާމުތައް އެ ގައުމުތަކަށް ފޮނުވުމަށް އިޓަލީން ދަނީ ތައްޔާރުވަމުންނެވެ. މިއީ ހަނގުރާމައިގެ އަމަލެއް ނޫން ކަމަށާއި، އެ ސަރަހައްދުގައި ތިބި އިޓަލީގެ 2،000 ސިފައިންނާއި ރައްޔިތުންގެ އިތުރުން ހަކަތައިގެ ވަސީލަތްތައް ހިމާޔަތްކުރުމަށް އޮތް ޒިންމާއެއް ކަމަށް މެލޯނީ ސިފަކުރެއްވިއެވެ.

އިޓަލީގެ ބިމުގައި ހުރި އެމެރިކާގެ އަސްކަރީ މަރުކަޒުތައް ކަމަށްވާ ސިގޮނެލާ އަދި އަވިއާނޯ ބޭނުންކުރުމާ ގުޅޭގޮތުން މެލޯނީ ވިދާޅުވީ، 1954 ވަނަ އަހަރުގެ އެއްބަސްވުމުގެ ދަށުން އެމެރިކާއަށް ހުއްދަ އޮތީ ހަމައެކަނި ލޮޖިސްޓިކަލް ކަންކަމަށް ކަމަށެވެ. އޭގެ ތެރޭގައި ތެޔޮ އެޅުމާއި ފާރަވެރިވުން ހިމެނެއެވެ. ނަމަވެސް ހަމަލާދިނުމަށް އެ ބޭސްތައް ބޭނުންކުރަން އެދިއްޖެ ނަމަ، އެކަމަށް ޕާލަމެންޓުގެ ވޯޓަކާއި ސަރުކާރުގެ ރަސްމީ މުރާޖައާއެއް ބޭނުންވާނެ ކަމަށް އެކަމަނާ އިންޒާރު ދެއްވިއެވެ.