އަންރުވާ ހުއްޓުވާލުމުން ފަލަސްތީނު ކުދިންގެ ތަޢުލީމަށް ނޭދެވޭ އަސަރުކުރާނެ ކަމަށް އދ. އިން ބުނެފިއެވެ.
ޔޫއެންގެ ފަލަސްތީނު ރެފިއުޖީންގެ އެޖެންސީ (އަންރުވާ) ގެ ކޮމިޝަނަރ ޖެނެރަލް ފިލިޕް ލަޒަރީނީ އާދީއްތަ ދުވަހު ވިދާޅުވެފައިވަނީ އަންރުވާ ހުއްޓުވާލުމަށް މަސައްކަތްކުރުމުގެ ބަދަލުގައި ޣައްޒާގައި ހިނގަމުންދާ އިސްރާއީލުގެ ހަނގުރާމަ ނިންމުމަށް އެއްބަސްވުމަކަށް އާދެވޭތޯ މަސައްކަތްކުރުމަށް އިސްކަންދޭންވާނެ ކަމަށެވެ.
ލަޒަރީނީ ދެއްވި ބަޔާނެއްގައި ވިދާޅުވެފައިވަނީ އަންރުވާ ހުއްޓުވާލައިފިނަމަ ފަލަސްތީނު ކުދިން ތަޢުލީމު ހާސިލުކުރުމުގެ ފުރުސަތު ގެއްލިގެންދާނެ ކަމަށެވެ. އަދި އަންރުވާގެ ބަދަލުގައި އެހެން ގޮތެއް ހަމަޖެހިފައި ނެތް ހާލަތެއްގައި މިކަން ވެގެންދާނީ އެންމެ ނުރައްކާތެރި ކަމަކަށް ކަމަށް އޭނާ ވިދާޅުވިއެވެ.
"ކުދިންނާއި އެކުދިންގެ ތަޢުލީމާ ބެހޭގޮތުން 'މާހިރުން' ނުވަތަ ސިޔާސީ ފަރާތްތަކުން އަންރުވާގެ ބަދަލުގައި އެހެން ގޮތެއް ހޯދުމާ ބެހޭގޮތުން ވާހަކަދައްކާކަމަށް ބުނާއިރު އެއްވެސް ވާހަކައެއް ނުދައްކާ،" ލަޒަރީނީ ވިދާޅުވިއެވެ.
އަދި ތަޢުލީމު ނުލިބިއްޖެނަމަ ކުދިން ހަތިޔާރު ހިފާ ޖަމާޢަތްތަކާ ގުޅުމުގެ ފުރުސަތު އޮތްކަމަށް އޭނާ އިންޒާރުދެއްވިއެވެ. އަދި އަންރުވާ ނެތިއްޖެނަމަ މިލިއަނުން ގުނާ ލެވޭ ޣައްޒާގެ އާބާދީއަށް ބޭނުންވާ އެހީގެ ކަންތައްތައް ދެމެހެއްޓެނިވި ގޮތެއްގައި ކުރިއަށް ގެންދިއުމަކީ އުނދަގޫ ކަމަކަށް ވެގެންދާނެ ކަމަށްވެސް އޭނާ ވިދާޅުވިއެވެ.
ލަޒަރީނީ ވިދާޅުވިގޮތުގައި 2023 ވަނަ އަހަރުގެ އޮކްޓޯބަރު މަހާ ހަމައަށް އަންރުވާއިން ޣައްޒާގައި 300،000 އަށްވުރެ ގިނަ އަންހެން އަދި ފިރިހެން ކުދިންނަށް ތަޢުލީމު ފޯރުކޮށްދީފައިވެއެވެ. މިއީ ޣައްޒާގެ ސްކޫލް އުމުރުގެ އާބާދީގެ ދެބައިކުޅައެއްބައެވެ.
