ދިވެހިންގެ ކިބައިން ގެއްލެމުންދާ އިންސާނިއްޔަތުކަމާއި އަޚުލާގު…

2A2B960E-6E6D-4B7E-B72D-066E94559F7E

މީހަކު ހާޓް އެޓޭކެއް ޖެހިގެން ހޮސްޕިޓަލަށް ގެންދިޔައެވެ. އޭނާ ބާއްވާފަ އޮތީ ހޮސްޕިޓަލުގެ އޮބްޒަރވޭޝަން ގައެވެ. މުޅިތަންވަނީ ތޮއްޖެހިފައެވެ. ޑޮކްޓަރުންވެސް އެހިސާބަށް ގޮސް ހަދަންޖެހުނީ މީހުން ދުރުކޮށްގެންނެވެ.

ހާޓްއެޓޭކް ޖެހިފައިއޮތް މީހާގެ ވަރަށް ގާތް ރަހްމަތްތެރިބަޔަކު އެތަނުގައި ތިއްބެވެ. އެއިގެތެރެއިން މީހަކު ބުންޏެވެ.

“އޭ! އަދި މިއީވެސް އެއްޗެއް ތަތްކޮށްލަންޖެހޭ ތަނެއްނު!”

އޭނާ މިހެން ބުނެލީ ބަލިމީހާގެ ގައިގެ އެތަންމިތަނުގައި ބަލިމީހާގެ ވައިޓަލް ސައިންތައް (ހާލުއަންގައިދޭ ތަފާތު ވަޒަންތައް) ދެނެގަތުމަށް، މެޝިންތަކާ ގުޅާފައިހުރި ހުރި ވާތަކުގެ ކޮޅުތަކަށް އިޝާރާތް ކޮށްފައެވެ. (އަޅުގަނޑު ނުދެންނެވި ކަމުގައި ވިޔަސް، މޭމަތީގައި ތަންކޮޅެއްގައި ކޮށްޓާލާފައި އެދެއްކީ ކޮންތަނެއްކަން މިހާރު އެނގިވަޑައިގެންފި ކަމަށް އުންމީދުކުރަމެވެ.)

ޖެހިލުންކުޑަ، މަޖާ މިމީހާ، ފުރާނަޔާ ހަނގުރާމަކުރަން އޮތް އޭނާގެ ރަހްމަތްތެރިޔާއަށް މިކޮށްލި “ސަމާސާ” އަށް، އެތަނުގައި ތިބި އޭނާގެ ބައިވެރިން މަޖާވެ ހީނގަތެވެ. މިބައިމީހުން ހޮސްޕިޓަލުން އައިސް، ދެން ދިމާވީ އެމީހުންގެ ރަހްމަތްތެރިންނަށް، ހީހީ މަޖާކޮށްފައި މިވާހަކަ ކިޔާދިނެވެ. އެއީ ދިވެހިންނެވެ. ހަމަ ތަސައްރަފުފުދިފައިތިބި، ތަންދޮރުދަންނަ، ޒިންމާދާރު ބޮޑެތި މީހުންނެވެ.

މިއީ އަޅުގަޑުމެންގެ މުޖުތަމައުގެ ހާލަތު މިއަދު ހުރިގޮތެވެ. ކޮންމެ ކަމަކީ އުފަލާއި މަޖަލެކެވެ. އަނެކުންނަށް ރަހުމާއި ހަމްދަރުދީ އެއީ އަޅުގަޑުމެން ނުދަންނަ އެއްޗެއް ކަހަލައެވެ. މީހަކަށް މަލާމާތްކޮށްލާ ފުރައްސާރަ ކޮށްލުމުގެ ފުރުސަތަކީ، ބަނގުރާބޮއި މަސްތުވެފައި ނެތަސް ދިވެހިންނަށް އުނދަގޫ ކަމެއް ނޫނެވެ. މިއީ ކޮންމެ ދުވަހަކު އެތައް ފަހަރަކު އަޅުގަޑުމެން ތަޖުރިބާ ކުރާ ހަގީގަތެކެވެ. ފަހަރެއްގައި “ގައުމަށްޓަކައި” މިވާހަކަޔަށް ދެކޮޅުހަދާ ރައްދުދެއްވާ ބޭފުޅުން ތިއްބަވާފާނެއެވެ. އެބޭފުޅުން އެދެކެވަޑައިގަންނަވާ “ދިވެހިރާއްޖެ” އެއް ހަގީގަތުގައި މިހާރަކު ނެތެވެ.

މިފަދަ ވާހަކަތައް އަޅުގަޑުމެން ބޭނުންވަނީ ފޮރުވާފައި ބަހައްޓާށެވެ. އެކަންކަން އެއީ ނެތްކަންކަމަށް ހަދައިގެން، ލޯމަރައިގެން ތާއަބަދަށް ދުނިޔޭގައި އުޅޭށެވެ. އެކަމަކު ދުނިޔެ އުމުރަށް “ދޮގު” ގެތެރޭގައި ނުއުޅެވޭނެކަން އަޅުގަޑުމެން ގަބޫލުކުރަން އެބަޖެހެއެވެ.

އަޅުގަޑުމެންގެ އިގުތިސާދުގެ މައިސޯބުގެ ގޮތުގައި އޮތް ޓޫރިޒަމް ދާއިރާ އަނދަވަޅަކަށް ވެއްޓިގެން ދިޔައީ އެހެންވެގެންނެވެ. ލޯކުރިމަތީގައި ހިނގާ ވިޔާނުދާ ކަންކަމަށް ލޯމަރައިގެން ތިބޭބަޔަކަށް ދިވެހިން ވީމައެވެ. އުފަލަށާއި މަޖަލަށް ކޮންމެކަމެއް “އޯކޭ” ބައެއް ކަމުގައި ވުމުގެ ތަރުބިއްޔަތު ދިވެހިންނަށް ލިބުނީމައެވެ.

އެހެންނަމަވެސް، މިއަދުގެ ހަގީގަތަކީ، އެހެންމީހުންގެ އިހްސާސްތަކަށް އިހްތިރާމް ކުރަން ދަންނަ، އިހްތިރާމްކުރާ، ތިމާ ނޫން މީހުންނަށް ވެސް ކަމޭހިތަން ދަސްވެފައިތިބި ދިވެހިދަރީން މިގައުމުގައި ބިނާކުރެވިގެން ނޫނީ، ކިތަންމެ ރީތި ގޮނޑުދޮށާ ގުދުރަތީ ރީތިކަމެއް ލިބިފައިވާ ވެށްޓެއް އޮތްކަމުގައި ވިޔަސް، މިދިވެހިރާއްޖޭގެ މުސްތަގުބަލެއް ނެތެވެ. މިދިވެހިރާއްޖޭގައިވެސް، އަނެއް ދިވެހިރާއްޖޭގައި ވިޔަސް މެއެވެ.

ލިޔުން ވިދާޅުވުމަށްފަހު ހިއްސާ ކުރައްވާ

ކިޔުންތެރިންގެ ޚިޔާލުތައް

  1. ނިމިދިޔަ ހަފުތާގައި ފާޅު ބޯޓު ކުޅުދުއްފުށިން މާލެއަށް ކުރި ދަތުރެއގައި އެބޯޓުގެ ކުރޫއަށް ހާޓު އެޓޭކެއް ޖެހި ނިޔާވީ އެބޯޓުގެ ކެޕްޓަން ހަސަންގެ އަންސާނިއްޔަތުކަމެއް ނެތިގެން ކަން މިހާދިސާ އެގޭ އެންމެން ގަބޫލުކުރޭ. ތިމާގެ ބޮޑާކަން ދެއްކުން

  2. ވަރަށް ރަނގަޅު ވާހަކައެއް. އިހު ދިވެހިންގެ ކިބައިން ފެނުނު ރީތި އާދަކާދަތައް މިހާރުގެ ކުދިން ބޮލާލައި ޖަހައިފި. ތަހުޒީބުގެ ނަމުގައި މިހާރުގެ ކުދިންގެ ގޮތެއް ފޮތެއް ނެތްކަން މިއީ ޤަބޫލު ކުތަން ޖެހޭ ހަގީގަތެއް. ހެޔޮ ވިސްނުމަކުން ވިސްނައިފި މީހަކު މިކަމާ ދެބަހެއް ނުވާނެ. އެފަދަ ކުދިންނަށް ހެޔޮ އެދިގެން ބަސް ބުނާ މީހަކީ އެންމެ ކަޓު ތަންދޮރު ނުދަންނަ މީހާ. މިއީ ޒަމާނީ ދިބެހިންގެ ޙާލަތު.

  3. މުޙައްދު ޝިހާބުގެ ވާހަކަ ރަނގަޅު! އެކަމަކު ވާހަކައެއް ބުނަންތަ! ދިވެހިރާއްޖެ ނުކިޔަވައި އޮތްއިރު ތިކަހަލަ ނޭދެވޭ އެއްވެސް ސިފައެއް ފެނިފައެއްނެތެވެ. އެކަމަކު ޢިލްމަކީ މީހާގެ ޖާހިލުކަން ދުރުކޮށް ތަންދޮރު ދެތުމާއެކު މީހާ ހޭލުންތެރި ކުރުވާ އެއްޗެކެވެ. މިއަދު އަހުރެމެން ފަޚުރުވެރި ވެފައި މިތިބީ ޢިލްމު ލިބިފައި ތިބިކަމުގެ މައްޗަށެވެ. އެކަމަކު ރާއްޖޭގެ ޖާހިލިއްޔަ ޒަމާނުގައި ރާއްޖޭގެ މީހުން މައިންބަފައިންނަށް ކުރި އިހްތިރާމާ ޤަދަރާ ކަމޭ ހިތުމާ އަޅައިލުމާ ދިންލޯތްބާ، މިކަންކަން މި ޢިލްމީ ޒަމާނުގައި ނެތިގެން މިއުޅެނީ ކީއްވެގެންކަމާ މެދުވިސްނައި ލެއްވިންތޯ! ދިވެހިބަހުން ބަހެއްބުނަން މިއަދު ނޭގުނަސް، "ޔެސް، ނޯ، ތެންކިޔޫ، އައިއޭމް ވެރީބިޒީ ބުނަން ނޭގޭ ހަމައެކަކުވެސް މިޤައުމުގައި ނުުުުުުުުުުުުުުންނާނެއެވެ. ކިޔަވައި ނުދޭ އެއްޗެއް ކިޔަވައިގެން އުޅެނީކީ ނޫނެވެ. ދަރިންގެ ބޮލުގައި އިލްޒާމެއް އަޅުވަން ވާނީ އެދަރިންނަށް ދިންތަރުބިއްޔަތާ އުނގަނައި ދިން ޢިލްމު ނޫން އެހެން މަގަކުން އެކުދިން ދަތުރުކޮށްފައި ވާނަމައެވެ. އަހަރުމެން އިންދައި ހެއްދި ގަހުގެ މޭވައި މިހާރު މިދަނީ ފުރިހަމައަށް ލިބެމުންނެވެ މޭވައި ކިތަންމެ ހިތިނަމަވެސް މިހާރު ދެން އެ ނުކައި ފަރުޖެހޭނެ އެއްވެސް ގޮތެއްނެތެވެ. އެމްޑީއެން އަކީވަރަށް ރަނގަޅު މިސާލެކެވެ!

ހިޔާލު ދެއްވާ!

Your email address will not be published. Required fields are marked *