2026 ވަނަ އަހަރުގެ ވޯލްޑް ކަޕް ސްޕެއިންއިން ކާމިޔާބުކުރިތާ މަދު ހަފްތާތަކެއްގެ ތެރޭގައި، ދެކުނު އިރުމަތީ އޭޝިއާގެ ގައުމުތަކުން 2030 ވަނަ އަހަރުގެ ވޯލްޑް ކަޕަށް ތައްޔާރުވުމުގެ މަސައްކަތް މިހާރު ވަނީ ފަށާފައެވެ.

މިގޮތުން ކެމްބޯޑިއާގެ ޕްނޮމް ޕެންގައި މިހާރު ކުރިއަށްދާ އާސިއާން ކަޕް ވެފައިވަނީ މި ސަރަހައްދުގެ ގައުމުތަކަށް ވޯލްޑް ކަޕްގެ ކޮލިފިކޭޝަނަށް ތައްޔާރުވުމަށް ލިބުނު ރަނގަޅު ފުރުސަތަކަށެވެ.

Ad
rt

ކޮންމެ ދެ އަހަރަކުން އެއް އަހަރު ބާއްވާ މި މުބާރާތުގައި މި ސަރަހައްދުގެ 10 ގައުމަކުން ވާދަކުރެއެވެ. އަންނަ އަހަރު 2030 ވަނަ އަހަރުގެ ވޯލްޑް ކަޕް ކޮލިފިކޭޝަން ފެށޭއިރު، އިންޑޮނޭޝިއާ، ތައިލެންޑް އަދި ވިއެޓްނާމް ފަދަ ގައުމުތަކުން ދަނީ މި މުބާރާތުގެ ބޭނުން ހިފައި ޓީމުތައް ވަރުގަދަ ކުރަމުންނެވެ.

އާސިއާން ފުޓްބޯޅަ ފެޑެރޭޝަންގެ ރައީސް ޚިއެވް ސަމެތު ވިދާޅުވީ، ދެކުނު އިރުމަތީ އޭޝިއާގެ ގައުމެއް ވޯލްޑް ކަޕުން ފެނުމުގެ ހުވަފެން ހަގީގަތަކަށް ވުމާ ގާތްވެފައިވާ ކަމަށެވެ.

މި ސަރަހައްދުން އެންމެ ފަހުން ވޯލްޑް ކަޕަށް ކޮލިފައިވުމާ ގާތަށް ދިޔަ އިންޑޮނޭޝިއާއިން ވަނީ ޓީމު ވަރުގަދަ ކުރުމަށްޓަކައި ކެނެޑާގެ ކުރީގެ ކޯޗު ޖޯން ހާޑްމަން އައްޔަންކޮށްފައެވެ. ހާޑްމަން ބުނީ އޭނާގެ ހަމައެކަނި އަމާޒަކީ އިންޑޮނޭޝިއާ ވޯލްޑް ކަޕަށް ގެންގޮސްދިނުން ކަމަށެވެ. މީގެ އިތުރުން އިންޑޮނޭޝިއާއިން ދަނީ ބޭރު ގައުމުތަކުގައި އުޅޭ އެގައުމަށް ނިސްބަތްވާ ކުޅުންތެރިންނަށް ރައްޔިތުކަން ދީގެން ޓީމަށް ކުޅުވަމުންނެވެ. އޭގެ ތެރޭގައި އޮސްޓްރޭލިއާއަށް އުފަން މިޗް ބޭކާ ފާހަގަކޮށްލެވެއެވެ.

މުބާރާތުގެ އެންމެ ފަހުގެ ޗެމްޕިއަން ވިއެޓްނާމްގެ ކޯޗު ކިމް ސަންގް-ސިކް ވެސް ހުރީ ވޯލްޑް ކަޕްގެ އަމާޒުގައެވެ. އޭނާ ބުނި ގޮތުގައި ކުޅުންތެރިންނާއެކު ވޯލްޑް ކަޕް ބަލަމުން ދިޔައިރު، އެންމެންގެ ވެސް އުންމީދަކީ ދުނިޔޭގެ އެންމެ ބޮޑު ފުޓްބޯޅަ މުބާރާތުގައި ވާދަކުރުމެވެ. ހަތް ފަހަރު މި މުބާރާތް ކާމިޔާބުކޮށްފައިވާ ތައިލެންޑުން ވެސް ދަނީ އާ ކޯޗު އެންތަނީ ހަޑްސަންގެ އިރުޝާދުގެ ދަށުން ބޮޑު ކާމިޔާބީއަކަށް ތައްޔާރުވަމުންނެވެ.

އާސިއާން ކަޕްގެ ގްރޫޕް ސްޓޭޖުގެ މެޗުތަކަށް ފަހު، ސެމީ ފައިނަލް މެޗުތައް ކުޅުމަށް ހަމަޖެހިފައިވަނީ އޮގަސްޓް މަހުގެ ފަހުކޮޅުގައެވެ. މި މުބާރާތަށް ފަހު، މި ސަރަހައްދުގެ ގައުމުތަކުގެ ދެން އޮތް ބޮޑު އަމާޒަކީ 2027 ވަނަ އަހަރުގެ ޖެނުއަރީ މަހު ސައުދީ އަރަބިއްޔާގައި ބޭއްވުމަށް ހަމަޖެހިފައިވާ އޭޝިއަން ކަޕެވެ.