އެމެރިކާއާއި އީރާނާ ދެމެދު އޮތް މަސްރަހު ނުތަނަވަސްވެ، ދެގައުމުގެ ދެމެދުގައި މިދިޔަ ޖޫން މަހުގެ 15 ވަނަ ދުވަހު ގާއިމުކުރި ސުލްހައިގެ އެއްބަސްވުން މުގުރާލައި، އެމެރިކާއިން އީރާނުގެ އެކި ސަރަހައްދުތަކަށް ވަރުގަދަ ވައިގެ ހަމަލާތަކެއް ދީފިއެވެ.
ހޯމަ ދުވަހުގެ ފަތިހުގެ ވަގުތެއްގައި އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ދިން މި ހަމަލާތަކަކީ ރައީސް ޑޮނަލްޑް ޓްރަމްޕްގެ ސީދާ އަމުރަށް ދީފައިވާ ހަމަލާތަކެކެވެ.
މި ހަމަލާތަކުގައި އީރާނުގެ ހޫޒެސްތާން ޕްރޮވިންސްގެ މަހްޝަހްރު ކައުންޓީގައި ހުންނަ، ދަނޑުވެރިކަމަށް ބޭނުންކުރާ ފެން ޕަމްޕުކުރާ މައި މަރުކަޒަށް ވަނީ ބޮޑެތި ގެއްލުންތަކެއް ލިބިފައެވެ. އެ ގައުމުގެ ސަލާމަތީ ބާރުތަކުން ކަށަވަރުކޮށްދީފައިވާ ގޮތުގައި، މި ހަމަލާގައި އެ ސަރަހައްދު ބަލަހައްޓަން ހުރި ސެކިއުރިޓީ ގާޑަކު މަރުވެ، އިތުރު ހަތަރު މީހަކު ވަނީ ޒަހަމްވެފައެވެ.
މަހްޝަހްރުގެ އިތުރުން، އީރާނުގެ ދެކުނު އައްސޭރިފަށުގެ ސިޓީތައް ކަމަށްވާ ބަންދަރު އައްބާސް، ސިރީކް، ގޭޝްމް އައިލެންޑް، ޖާސްކް، ބުޝެހްރު އަދި އަހްވާޒް ކައިރި ސަރަހައްދުތަކަށް ވެސް އެމެރިކާއިން ވަނީ ބޮން އަޅާފައެވެ. އެމެރިކާއިން ބުނާ ގޮތުގައި މި ހަމަލާތަކުގެ މަގްސަދަކީ ކަނޑުދަތުރުފަތުރަށް ހުރަސްއެޅުމަށް އީރާނުން ބޭނުންކުރާ ޑްރޯން ސައިޓްތަކާއި، މިސައިލް ލޯންޗަރުތަކާއި، ކަނޑުގެ އަސްކަރީ ގާބިލްކަން ނައްތާލުމެވެ.
އެމެރިކާގެ މި ހަމަލާތަކަށް ރައްދު ދިނުމުގެ ގޮތުން އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ވަނީ ފާސީ ކަނޑުއޮޅި ސަރަހައްދުގައި ހުރި އެމެރިކާގެ މަސްލަހަތު އޮތް ތަންތަނަށް މިސައިލާއި ޑްރޯން ހަމަލާތައް ދީފައެވެ. މީގެ ތެރޭގައި ބަހްރޭން، އުރުދުން، ކުވެއިތު، ގަތަރު އަދި އޮމާންގައި ހުރި އަސްކަރީ މަރުކަޒުތައް ހިމެނެއެވެ. ޚާއްސަކޮށް، މީގެ ކުރިން މެދުވެރިއެއްގެ ދައުރު އަދާކުރި ގަތަރާއި އޮމާނަށް އަމާޒުކޮށް ހަމަލާ ދިނުމަކީ، އީރާނުން އެ ގައުމުތަކުގެ ސުލްހައިގެ މަސައްކަތްތަކާ މެދު ހިތްހަމަނުޖެހުން ފާޅުކުރުމުގެ ރަމްޒެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
މި ކުރިމަތިލުންތަކާ ގުޅިގެން އީރާނުން ވަނީ ހޯރްމުޒް ކަނޑުއޮޅި ބަންދުކޮށްފައިވާ ކަމަށް އިއުލާންކޮށްފައެވެ. ނަމަވެސް، އެމެރިކާގެ ސެންޓްކޮމް އިން ވަނީ އެ ނިންމުން ބަލައިނުގަނެ، ބައިނަލްއަގުވާމީ ކަނޑުދަތުރުފަތުރުގެ މަގުތައް ހުޅުވިފައިވާނެ ކަމަށާއި، އެމެރިކާގެ ހިމާޔަތް އެ ސަރަހައްދަށް ލިބޭނެ ކަމަށް ބުނެފައެވެ.
މި ހަމަލާތަކާއެކު، ދެ ގައުމުގެ ދެމެދުގައި އޮތް ސުލްހައިގެ އުންމީދުތައް ވަނީ ފަނޑުވެފައެވެ. ރައީސް ޓްރަމްޕް ވަނީ މީގެ ކުރިން އޮތް ސުލްހައިގެ އެއްބަސްވުން ނިމުމަކަށް އައިސްފައިވާ ކަމަށް އިއުލާންކުރައްވާފައެވެ.
އީރާނުގެ އޮފިޝަލުން ވެސް ވިދާޅުވަމުން ގެންދަވަނީ "އެއްކޮޅަށް ފައިދާވާ އެއްބަސްވުންތަކުގެ ޒަމާން" މިހާރު ނިމިއްޖެ ކަމަށެވެ. މިއީ ފަހުގެ ތާރީޚެއްގައި މެދުއިރުމަތީގެ މަސްރަހު މިހާ ބޮޑަށް ގޯސްވި ފުރަތަމަ ފަހަރެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!