ކެނެޑާގައި އިސްލާމޯފޯބިއާއަށް ނުވަތަ މުސްލިމުންނާ މެދު އޮންނަ ނަފްރަތާއި ތަފާތުކުރުންތަކަށް އެއްވެސް ޖާގައެއް ނެތްކަމަށް އެ ގައުމުގެ ބޮޑުވަޒީރު މާކް ކާނީ ވިދާޅުވެއްޖެއެވެ.

ބޮޑުވަޒީރު މިހެން ވިދާޅުވީ މީގެ ނުވަ އަހަރު ކުރިން ކިއުބެކް ސިޓީގެ މިސްކިތަކަށް ދިން ނުރައްކާތެރި ޓެރަރިސްޓް ހަމަލާގެ ހަނދާންތައް އާކުރައްވައި އެކްސްގައި ކުރެއްވި ޕޯސްޓެއްގައެވެ.

Ad
rt

މީގެ ނުވަ އަހަރު ކުރިން، 29 ޖެނުއަރީ 2017 ގައި ކިއުބެކް ސިޓީގެ އިސްލާމިކް ކަލްޗަރަލް ސެންޓަރަށް ދިން ބިރުވެރި ބަޑީގެ ހަމަލާގައި ކެނެޑާގެ ހަ މުސްލިމުންގެ ފުރާނަ ވަނީ ގެއްލިފައެވެ. އަދި މި ހާދިސާގައި އިތުރު 19 މީހަކަށް އެކިވަރުގެ އަނިޔާ ލިބިފައިވެއެވެ. އެ ހާދިސާ ފާހަގަކުރަށްވައި ބޮޑުވަޒީރު ވިދާޅުވީ ހުރިހާ ދީންތަކެއްގެ ރައްޔިތުންނަށް ވެސް މިނިވަންކަމާއި ރައްކާތެރިކަމާއެކު ދިރިއުޅެވޭނެ ގައުމެއް ބިނާކުރުމުގައި ކެނެޑާ ދެމިއޮންނާނެ ކަމަށެވެ.

މަރުވި ފަރާތްތަކުގެ ހަނދާން އާކުރުން

މި ހާދިސާގައި ޝަހީދުވި ހަ ބަފައިންނާއި މުޖުތަމައުގެ މެންބަރުންގެ ހަނދާންތައް މިއަދު މުޅި ގައުމުން އާކުރެއެވެ. މި ހާދިސާގައި ޝަހީދުވި މީހުންނަކީ އިބްރާހިމާ ބާރީ، މަމަދޫ ތަނޫ ބާރީ، ޚާލިދު ބެލްކަސޭމީ، ޢަބްދުލްކަރީމް ޙައްސާން، ޢައްޒުއްދީން ސޫފިއާން އަދި އަބޫބަކުރު ތާބިތީ އެވެ. މި މީހުން ވަކިވުމަކީ މުޅި ގައުމަށް ލިބުނު ފުން ހިތާމައެއްގެ ގޮތުގައި ބޮޑުވަޒީރު ސިފަކުރެއްވިއެވެ.

ގައުމީ ހަނދާނީ ދުވަސް

2021 ވަނަ އަހަރުން ފެށިގެން ކެނެޑާ ސަރުކާރުން ވަނީ ޖެނުއަރީ 29 އަކީ "ކިއުބެކް ސިޓީ މިސްކިތުގެ ހަމަލާގެ ހަނދާން އާކުރުމާއި އިސްލާމޯފޯބިއާއާ ދެކޮޅަށް މަސައްކަތްކުރުމުގެ ގައުމީ ދުވަސް" ކަމުގައި ރަސްމީކޮށް ކަނޑައަޅާފައެވެ. މި ދުވަސް ކަނޑައެޅުމުގެ މައިގަނޑު ބޭނުމަކީ މަރުވި ފަރާތްތަކުގެ ޒިކުރާ އާކުރުމާއި، އިސްލާމޯފޯބިއާއާ ދެކޮޅަށް އަމަލީ ފިޔަވަޅުތައް އެޅުމަށް ބާރުއެޅުމެވެ.

އިސްލާމޯފޯބިއާ އަކީ ކޮބާ؟

އިސްލާމޯފޯބިއާ އަކީ އިސްލާމްދީނާއި މުސްލިމުންނަށް އަމާޒުކޮށްގެން ކުރިއަށްގެންދާ ނަފްރަތާއި ތަފާތުކުރުންތަކެވެ. ކެނެޑާ ސަރުކާރުން ގަބޫލުކުރާ ގޮތުގައި އެއްވެސް މުޖުތަމައެއް ބިރުވެރިކަމެއްގެ ތެރޭގައި އުޅެން ނުޖެހޭނެކަން ކަށަވަރުކުރުމަށްޓަކައި ނިޒާމީ ބަދަލުތަކެއް ގެންނަން ޖެހެއެވެ. މިއަދަކީ ކެނެޑާއިން ގަބޫލުކުރާ އެންމެން ބައިވެރިކުރުމާއި ރައްކާތެރިކަމުގެ އަގުތަކާ މެދު ފުންކޮށް ވިސްނާލަންޖެހޭ ދުވަހެކެވެ.