ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ރާއްޖެ އިސްލާމްވީ ދުވަހާއި ގުޅިގެން ކުރެއްވި ޓްވީޓަށް ރާއްޖޭގެ މަޝްހޫރު ދީނީ ޢިލްމުވެރިޔާ ޝެއިޚް އިލިޔާސް ހުސެއިން ހޫނު ރައްދެއް ދެއްވައިފިއެވެ.
ރާއްޖެ އިސްލާމްވީ ދުވަހުގެ ގޮތުގައި ހިޖުރީ ގޮތުން ކޮންމެ އަހަރެއްގެ ރަބީޢުލްއާޚިރު މަހުގެ ދެވަނަ ދުވަސް ދިވެހިން ފާހަގަ ކުރަމުން އަންނައިރު، މި ދުވަހުގެ ތަހުނިޔާ ކިޔުމުގެ ގޮތުން ރައީސް ނަޝީދު މިއަދު ކުރެއްވި ޓްވީޓްގައި ވިދާޅުވެފައިވަނީ އިސްލާމް ދީނުގެ މަތިވެރި ހަމަތަކަށް ރާއްޖެ ބޯލަނބަންފެށީ ސޫފީ ދަންނަ ބޭކަލުންގެ މަޑުމައިތިރި ސުލްހަވެރި މަސައްކަތްޕުޅުންކަމަށެވެ. އެހެން ނަމަވެސް ދިވެހިންގެ އަޤީދާ ބަދަލުކުރަން ތަފާތު ދަންނަ ބޭކަލުންގެ ނަމުގައި މީހުން މަސައްކަތް ކުރަމުން އަންނަ ކަމަށާއި ނަމަވެސް ދިވެހިންގެ އިސްލާމީ އަޤީދާއަށް ގުޑުމެއް ނާންނަ ކަމަށެވެ.
Islam dheenuge mathiveri hamathakah Raajje boalabanfeshee sufi dhannabeykalunge madumaithiri sulhaveri masakkaipulhun.Ehenas Dhivehinge aqeedha badhalkuran thafathu dhannabeykalunge namugai meehun masakkaiykurey.Dhivehinge Islamee aqeedha nuguda.Raajje Islamvee dhuvahuge thahniya
— Mohamed Nasheed (@MohamedNasheed) November 17, 2020
މިފަދައިން ރައީސް ނަޝީދު ޓްވީޓް ކުރެއްވުމާއި ގުޅިގެން އެކަމަށް ރައްދު ދެއްވައި ޝެއިޚް އިލިޔާސް ހުސެއިން މިއަދު ކުރެއްވި ޓްވީޓްގައި ވިދާޅުވީ، ސައްހަ އަޤީދާއަކީ ކޮބައިކަން ނޭނގޭ ހާލު ދިވެހިންގެ އަޤިދާ ނުގުޑާނޭ ބުނެ ބާތިލު އަޤީދާތަކަށް ގޮވާލައި އަދި ދިވެހިން މަގުފުރައްދަން އުޅޭ މީހުންނާއި މެދު ސަމާލުވުމަށް ދިވެހި ރައްޔިތުންނަށް ގޮވާލާ ކަމަށެވެ.
ދިވެހިންގެ އަޤީދާއަކީ އަހުލުއް ސުންނާ ވަލް ޖަމާޢަތުގެ އަޤީދާ
އިލިޔާސްގެ ޓުވީޓުގައި ފާހަގަ ކުރައްވާފައިވެ އެވެ.
Sahha ageedha akee kobaikan neyngey haalu dhivehinge ageedha nugudaaney bune baathil aqeedhaa thakah govaalai, dhivehin magu furadhdhan ulhey meehunnaa medhu samaaluvumah dhivehi rayyithunnah govaalan.
Dhivehinge aqeedha akee ahluh sunnah wal jamaaathuge aqeedhaa.— Ilyas Hussain (@shkilyas) November 17, 2020
ރައީސް ނަޝީދުގެ ޓްވީޓާއި ގުޅިގެން ބައެއް ދީނީ ޢިލްމުވެރިންގެ އިތުރުން އާންމުން ވެސް ދަނީ ރައީސް ނަޝީދަށް ފާޑުކިޔުން އަމާޒުކުރަމުންނެވެ.
ރައީސް ނަޝީދުގެ ޓްވީޓާއި ގުޅިގެން ޑޮކްޓަރ މުޙައްމަދު އިޔާޒް މިއަދު ކުރެއްވި ޓްވީޓްގައި ވިދާޅުވެފައިވަނީ ސޫފީ އަޤީދާގެ މީހަކީ ރައްޔިތުންގެ މަޖިލީހުގެ މެމްބަރުކަމުގެ ޝަރުތު ފުރިހަމަ ވާނެ މީހެއް ނޫންކަމަށެވެ. އަދި މަޖިލީހުގެ މެމްބަރު ކަމުގެ ޝަރުތު ފުރިހަމަނުވާ މީހެއް އެ މަޖިލީހުގެ ރައީސްކަމަށް ޝަރުތު ހަމަނުވާނެ ކަމަށެވެ.
ޑ.އިޔާޒްގެ މި ޓްވީޓްގައި ރައްޔިތުން މަޖިލީހުގެ މެމްބަރަކަށް ވުމުގެ ޝަރުތުތައް ކަމަށް ޤާނޫނު އަސާސީގައިވާ މާއްދާގެ ފޮޓޯއެއްވެސް ވަނީ ހިމަނާފައެވެ.
Sufi Aqeedhaage meehakee rayyithunge majileehuge memberukamuge sharuthu furihama nuvaane meeheh. Majlis member kamuge sharuthu furihama nuvaa meeheh majilees raees kamuge sharuthuves furihama nuvaane. pic.twitter.com/AycC4vwSFa
— Dr.Mohamed Iyaz (@dr_iyaz) November 17, 2020
ރާއްޖެ އިސްލާމްވީ ހިޖުރައިން 548 ވަނަ އަހަރުގެ ރަބީޢުލްއާޚިރް މަހުގެ ދެވަނަ ދުވަހުގައެވެ. ރާއްޖެ އިސްލާމްވި ދުވަހުގެ ގޮތުގައި ދިވެހި ދައުލަތުން މިދުވަސް ފާހަގަކުރައްވަން އެންމެ ފުރަތަމަ ފެއްޓެވީ ހިޖުރައިން 1374 ވަނަ އަހަރެވެ. އެ އަހަރުން ފެށިގެން 1387 ގެ ނިޔަލަށް 14 އަހަރު މި ދުވަސް ފާހަގަ ކުރެއްވުމަށްފަހު އޭގެ ފަހުން އެ ދުވަސް ފާހަގަކުރެއްވުން ވަނީ ހުއްޓަވާލައްވާފައެވެ. އެއަށްފަހު އަނެއްކާވެސް 1421 ވަނަ އަހަރުން ފެށިގެން ރާއްޖެ އިސްލާމްވި ދުވަސް ދަނީ ފާހަގަކުރައްވަމުންނެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!