އިނގިރޭސި ޕްރިމިއާ ލީގުގައި ޗެލްސީގެ އައު ކޯޗު ޒަބީ އަލޮންސޯގެ އިރުޝާދުގެ ދަށުން ކުޅުނު ފުރަތަމަ މެޗުގައި ފުލަމްގެ މައްޗަށް 3-2 އިން ކުރިހޯދިއިރު، އިޓާލިއަން ސެރީ އާގައި ޑޮންޔެލް މާލެން ހެދި ހެޓްރިކާއެކު ރޯމާއިން 4-0 އިން ފިއޮރެންޓީނާ ބަލިކޮށްފިއެވެ.

ޗެލްސީއަށް ފުރިހަމަ ފެށުމެއް

ފޯރިގަދަ ލަންޑަން ޑާބީގައި ޗެލްސީއަށް ޖޮއާއޯ ޕެޑްރޯ ވަނީ މެޗު ފެށިގެން 32 ވަނަ ސިކުންތުގައި ލީޑު ނަގައިދީފައެވެ. ނަމަވެސް ފުރަތަމަ ހާފުގެ މެދެއްހާ ހިސާބުގައި ޖޮޝް ކިންގް ވަނީ ފުލަމްއަށް ނަތީޖާ ހަމަހަމަކޮށްދީފައެވެ. ފުރަތަމަ ހާފު ނިމެން ހަތަރު މިނެޓަށް ވެފައިވަނިކޮށް، ކްލަބް ރެކޯޑު އަގަކަށް ގެނައި މޯގަން ރޮޖާސް ވަނީ ޗެލްސީއަށް އަލުން ލީޑު ހޯދައިދީފައެވެ. ދެވަނަ ހާފު ފެށިގެން ހަތަރުވަނަ މިނެޓުގައި ކޯލް ޕާމާ ޗެލްސީގެ ތިންވަނަ ލަނޑު ޖެހިއެވެ. އޭގެ ފަސް މިނެޓު ފަހުން ގޮންޒާލޯ ގާސިއާ ފުލަމްއަށް ފަރަގު ކުޑަކޮށްދިން ނަމަވެސް، މެޗު ނިމުނީ 3-2 އިން ޗެލްސީ މޮޅުވެގެންނެވެ.

Ad
d

ސެރީ އާ: ރޯމާ އަދި ލާޒިއޯއަށް ކާމިޔާބީ

އިޓަލީ ލީގުގައި ޕައޮލޯ ޑީބަލާ ތަނަވަސްކޮށްދިން ތިން ފުރުސަތަކުން މާލެން ވަނީ 27، 52 އަދި 60 ވަނަ މިނެޓުގައި ލަނޑު ޖަހައި ހެޓްރިކް ފުރިހަމަކޮށްފައެވެ. އަދި މެޗު ނިމެން ހަތަރު މިނެޓަށް ވެފައިވަނިކޮށް ބަދަލު ކުޅުންތެރިޔާ ނިކޮލޯ ޕިސިއްލީ ވަނީ ރޯމާގެ ހަތަރުވަނަ ލަނޑު ކާމިޔާބުކޮށްފައެވެ. މީގެއިތުރުން، އައު ކޯޗު ޖެނާރޯ ގަޓޫސޯގެ އިރުޝާދުގެ ދަށުން ނުކުތް ލާޒިއޯ ވަނީ ޑޭވިޑޭ ފްރަޓޭސީ ޖެހި ލަނޑުން 1-0 އިން ބޮލޯނިއާ ބަލިކޮށްފައެވެ.

ސްޕެނިޝް ލަލީގާ އަދި ޖާމަން ކަޕް

ސްޕެނިޝް ލަލީގާގައި ކުޅުނު ދެ މެޗުވެސް ނިމުނީ އެއްވަރުވެގެންނެވެ. މަލާގާ އަދި ޑެޕޯޓިވޯ އަ ކަރޫނާ ބައްދަލުކުރި މެޗު 1-1 އިން އެއްވަރުވިއިރު، ލެވަންޓޭ އަދި އޮސަސޫނާ ބައްދަލުކުރި މެޗު ނިމުނީ ލަނޑެއް ނުޖެހި 0-0 އިންނެވެ. ޑެޕޯޓިވޯއަށް ލަނޑު ޖަހައިދިނީ ޕިއޭ އެމެރިކް އޮބާމަޔަންގް އެވެ.

Ad
df

ޖާމަން ކަޕްގައި ވުލްފްސްބާގުން ވަނީ ހަތަރުވަނަ ޑިވިޝަނުގެ އަލްޓްގްލިނިކޭ އަތުން ބަލިނުވެ ސަލާމަތްވެ، ޕެނަލްޓީ ޖަހައިގެން 6-5 އިން މޮޅުވެފައެވެ. އަދި ޝާލްކޭ ވެސް ވަނީ އިތުރު ވަގުތުގައި ހާލެޝާ ބަލިކޮށް ދެވަނަ ބުރަށް ދަތުރުކޮށްފައެވެ. މީގެއިތުރުން ކޮލޯން އަދި ހެމްބާގް ވެސް ވަނީ އެ ޓީމުތައް ކުޅުނު މެޗުތައް ކާމިޔާބުކޮށްފައެވެ.