ދިއްދޫގެ ދެ މުއައްސަސާއަކުން ''މަވެސް ފަޞީލްއަށް އެހީވާނަން'' ފަންޑަށް އެހީވެއްޖެ

ހއ. ދިއްދޫ މިޑްލް ސްޕޯޓްސް ކުލަބްގެ ފަރާތުން އިންތިޒާމް ކޮށްގެން، އެ ރަށު ފެހިފަތް، މުޙައްމަދު ފަޞީލްގެ ކިޑްނީ ޓްރާންސްޕްލާންޓް ކުރުމަށް ބޭނުންވާ ފައިސާ ހޯދުމުގެ ގޮތުން ދިއްދޫގައި ކުރިއަށް ގެންދިޔަ ''މަވެސް ފަޞީލްއަށް އެހީވާނަން'' ހަރަކާތު ފަންޑަށް ދިއްދޫގެ ދެ މުއައްސަސާއަކުން އެހީތެރިވެއްޖެ އެވެ.

މިގޮތުން ފެނަކަ ދިއްދޫ ބުރާންޗުގެ މުވައްޒަފުން ވަނީ އެ މުވައްޒަފުންގެ 1 ދުވަހުގެ މުސާރައަށްވާ 6315 ރުފިޔާއެ ފަންޑަށް ހަދިޔާ ކޮށްފައެވެ. އެ ފައިސާ ފެނަކަ ދިއްދޫ ބުރާންޗުގެ ފަރާތުން ހަވާލުކޮށްދެއްވީ އެ ބްރާންޗްގެ ޑެޕިއުޓީ މެނޭޖަރ އަޙްމަދު ޒަކީއެވެ. މިޑްލް ސްޕޯޓްސް ކްލަބްގެ ފަރާތުން އެ ފައިސާއާއި ހަވާލުވީ އެ ކްލަބްގެ ރައީސް ނަޝްވާން އިބްރާޙީމްއެވެ.

އެ ފަންޑަށް އެހީތެރިވި ދިއްދޫގެ އަނެއް މުއައްސަސާއަކީ، އެރަށުގައި ހުންނަ ހއ. އަތޮޅު ތަޢުލީމީ މަރުކަޒުއެވެ. އެ އިދާރާގެ މުވައްޒަފުންގެ ފަރާތުން އެ ފަންޑަށް ވަނީ 1100 ރުފިޔާ ހަދިޔާ ކޮށްފައެވެ. އެ ސްކޫލްގެ ފަރާތުން އެ ފައިސާ އެހީ ހަވާލުކޮށް ދެއްވީ އެ ސްކޫލްގެ ޕްރިންސިޕަލް އަބުދުﷲ ނާހިދުއެވެ. މިޑްލް ސްޕޯޓްސް ކްލަބްގެ ފަރާތުން އެ ފައިސާއާއި ހަވާލުވީ އެ ކްލަބްގެ ރައީސް ނަޝްވާން އިބްރާޙީމްއެވެ.

އޭޕްރިލް 1 އަދި 2 ވަނަ ދުވަހު މިޑްލް ސްޕޯޓްސް ކުލަބްގެ ފަރާތުން އިންތިޒާމް ކޮށްގެން، އެ ރަށުގައި ކުރިއަށް ގެންދިޔަ ''މަވެސް ފަޞީލްއަށް އެހީވާނަން'' ހަރަކާތަށް ވަނީ ބޮޑު ތަރުޙީބެއް ލިބިފައެވެ. އެ ދެ ދުވަހުގެ ހަރަކާތުން 86،711.75 ރުފިޔާއާއި، 81 ޔޫއެސް ޑޮލަރު ވަނީ ހޯދާފައެވެ.

ދިއްދޫ މިޑްލް ސްޕޯޓްސް ކްލަބުން ވަނީ އެ ފަންޑަށް ފައިސާ ހަދިޔާކުރަން ބޭނުންވާ އެ ރަށުގެ މުއައްސަސާތަކަށް ވެސް އެ ފުރުޞަތު ހުޅުވާލާފައެވެ.

އެ ކްލަބުން ހާމަކުރެއްވި ގޮތުގައި އެ ކްލަބުން އިސްނަގައިގެން ފަޞީލްއަށް އެހީތެރިވުމަށް ހިންގި ހަރަކާތްތަކުން ލިބުނު ފައިސާ މިރޭ ފަޞީލްގެ ޢާއިލާއާއި ހަވާލު ކުރާނެއެވެ.