އިޓާލިއަން ސެރީ އޭގައި އެންމެ ފަހުގެ ޗެމްޕިއަން އަދި މިވަގުތު ތާވަލުގެ އެއްވަނައިގައި އޮތް އިންޓަ މިލާން 3-1 ގެ ނަތީޖާއަކުން ބަލިކޮށް، އޭސީ މިލާނުން މި ސީޒަނުގައި އިންޓަގެ ފުރަތަމަ ބަލިވުން ރަޖިސްޓްރީ ކުރުވައިފިއެވެ.

ހޮނިހިރު ދުވަހުގެ ރޭ ކުޅުނު ފޯރިގަދަ މިލާން ޑާބީ މެޗުގައި މިލާނުން ކުރިހޯދިއިރު، އެ ޓީމާ އެކު އައު އެއްބަސްވުމެއްގައި ސޮއިކުރި ކްރިސްޓިއަން ޕުލިސިޗް ވަނީ މެޗު ފެށިގެން ހަތަރު މިނެޓު ނުވަނީސް ލަނޑު ޖަހައި ޓީމަށް ކުރިމަގު އަލިކޮށްދީފައެވެ.

Ad
d

ސަން ސީރޯ ދަނޑުގައި ގާތްގަނޑަކަށް 78،000 ސަޕޯޓަރުންގެ ކުރިމަތީގައި ކުޅުނު މި މެޗު ފެށުމުގެ ކުރިން ދެ ޓީމުގެ ސަޕޯޓަރުންގެ ފަރާތުން ވެސް ކުލަގަދަ ހަރަކާތްތަކެއް ފެނިގެންދިޔައެވެ. މެޗު ފެށުމުގެ ކުރިން އިންޓަގެ ސަޕޯޓަރުން ވަނީ "ތިޔަބައިމީހުންގެ ފުލޯކު ވާހަކައިގެ ވަގުތު މާޒީވެއްޖެ" ކަމަށް ބުނެ ބޮޑު ބެނާއެއް ދައްކާލާފައެވެ. ނަމަވެސް، މެޗުގެ ފުރަތަމަ 10 މިނެޓުގެ ތެރޭގައި މިލާނުން ވަނީ ދެ ލަނޑުގެ ލީޑެއް ނަގައި ހުރިހާ ސަޕޯޓަރުން ހައިރާންކޮށްލާފައެވެ.

މެޗުގެ ހަތަރުވަނަ މިނެޓުގައި ޑިއޭގޯ މޮރޭރާ ނަގައިދިން ހުރަހަކުން ބޮލުން ޖަހައި ޕުލިސިޗް މިލާނަށް ލީޑު ނަގައިދިންއިރު، އޭގެ ހަ މިނެޓު ފަހުން މިލާނުން ވަނީ ދެވަނަ ލަނޑު ޖަހައި ލީޑު ފުޅާކޮށްފައެވެ. މިއީ މޮރޭރާ ނެގި ކޯނަރަކުން، އިންޓަގެ ޑިފެންޑަރުންނަށް ފުރުސަތެއް ނުދީ އެޑްރިއަން ރަބިއޯ ގޯލުގެ ދުރު ކަނަށް ބޯޅަ ވައްދާލައިގެން ކާމިޔާބުކުރި ރޭވުންތެރި ލަނޑެކެވެ.

އިންޓަ މިލާނުން މެޗުގެ 22 ވަނަ މިނެޓުގައި ލަނޑެއް ޖަހައި އުއްމީދު އާކުރިއެވެ. ކޯނަރަކުން ތަނަވަސްވި ފުރުސަތެއްގައި ބޮލުން ޖަހައި މި ލަނޑު ކާމިޔާބުކޮށްދިނީ އަލެސަންދްރޯ ބަސްޓޯނީއެވެ. އެހެންނަމަވެސް، ފުރަތަމަ ހާފު ނިމެން ކުޑަތަންވެފައި ވަނިކޮށް ބެލްޖިއަމްގެ އިންޓަނޭޝަނަލް ކުޅުންތެރިޔާ ޑިއޭގޯ މޮރޭރާ ވަނީ މޮޅު ހިލޭޖެހުމަކުން ގޯލުގެ މަތީ ކަނަށް ބޯޅަ ވައްދާލައި، މިލާނުގެ ތިންވަނަ ލަނޑު ޖަހައިދީފައެވެ. މިއީ މޮރޭރާ ހިލޭޖެހުމަކުން ކާމިޔާބުކުރި ފުރަތަމަ ލަނޑެވެ.

މި ލަނޑާ ގުޅޭގޮތުން ވާހަކަދައްކަމުން މޮރޭރާ ބުނީ، ފަރިތަކުރުންތަކުގައި އޭނާ ގިނަ ހިލޭޖެހުންތަކެއް ޖަހާފައިވާނެ ކަމަށެވެ. "ޕުލިސިޗް އަހަރެން ކައިރީ ބުނި އޭނާ އަހަންނަށް އިތުބާރު ކުރެއޭ، އޭނާ އެ ބުނީ ތެދެއް،" ހިނިތުންވެލަމުން މޮރޭރާ ބުންޏެވެ. މި ނަތީޖާއާއެކު މިއީ ޖެހިޖެހިގެން މިލާނުން ޑާބީ މެޗެއްގައި އިންޓަ ބަލިކުރި ހަތަރުވަނަ ފަހަރެވެ.

ޑާބީ މެޗުތަކުގައި މޮޅު ކުޅުމެއް ދައްކަމުން އަންނަ އެމެރިކާގެ ތަރި ޕުލިސިޗް މި މެޗުގައި ޖެހި ލަނޑަކީ މިލާން ޑާބީގައި އޭނާ ކާމިޔާބުކުރި ހަތަރުވަނަ ލަނޑެވެ. އޭނާ އެންމެ ގިނައިން ލަނޑު ޖަހާފައިވަނީ ލެޗޭ (ހަތް ލަނޑު) ކޮޅަށެވެ. 2023 ވަނަ އަހަރު މިލާނާ ގުޅުނު ފަހުން ކުޅުނު 142 މެޗުން 45 ލަނޑު ޖަހާފައިވާ ޕުލިސިޗް ވަނީ ހުކުރު ދުވަހު އެ ކްލަބާއެކު 2031 ވަނަ އަހަރުގެ ނިޔަލަށް ދިގުދެމިގެންދާ ފަސް އަހަރުގެ އައު އެއްބަސްވުމެއްގައި ސޮއިކޮށްފައެވެ.

މެޗަށްފަހު ވާހަކަދައްކަމުން ޕުލިސިޗް ބުނީ، ޑާބީ މެޗުތަކުގައި އަބަދުވެސް ލަނޑު ޖަހައި ޓީމު މޮޅުކޮށްދޭން ބޭނުންވާ ކަމަށެވެ. "މިއީ ވަރަށް މުހިންމު ތިން ޕޮއިންޓް. އެކަމަކު އަހަރެމެން ޖެހޭނެ އަބަދުވެސް މި ފެންވަރުގައި ކުޅުމުގެ އެއްވަރެއް ހިފަހައްޓަން. ބޮޑެތި މެޗުތަކުގައި އަހަރެމެން ރަނގަޅަށް ކުޅުމަކީ ހައިރާންވާންޖެހޭ ކަމެއް ނޫން،" އޭނާ ފާހަގަކުރިއެވެ.

މި މޮޅާއެކު އޭސީ މިލާން ވަނީ ލީގު ތާވަލުގެ ހަތަރުވަނައަށް ޖެހިލާފައެވެ. އެ ޓީމު މިހާރު އޮތީ އެއްވަނައިގައި ޕޮއިންޓުގެ ގޮތުން ހަމަހަމަވެފައިވާ އިންޓަ އަދި ލާޒިއޯއަށް ވުރެ ހަތަރު ޕޮއިންޓް ފަހަތުގައެވެ. އާދީއްތަ ދުވަހު އަމިއްލަ ދަނޑުގައި ކަލިއާރީއާ ދެކޮޅަށް ކުޅޭ މެޗުން ނަތީޖާއެއް ނެރެގެން ލާޒިއޯއަށް ތާވަލުގެ އެއްވަނައަށް އެކަނި ޖެހިލުމުގެ ފުރުސަތު އޮންނާނެއެވެ.

Ad
df

މި މެޗު ކުޅެވިގެން ދިޔައީ މިލާނުގެ ދެ ކްލަބުން ގުޅިގެން މިހާރުގެ ދަނޑާ ޖެހިގެން އައު ސްޓޭޑިއަމެއް އެޅުމުގެ ޕްލޭންތައް އާންމުކުރިތާ ދެ ދުވަސް ފަހުންނެވެ. ކްލަބްތަކުން އުއްމީދުކުރާ ގޮތަށް 2031-32 ވަނަ އަހަރުގެ ސީޒަނުގައި އައު ދަނޑަށް ބަދަލުވުމުގެ ކުރިން، ތާރީޚީ ސަން ސީރޯގައި މަދުވެގެން އަދި ނުވަ ޑާބީ މެޗު ކުޅޭނެ ކަމަށް ބެލެވެއެވެ.