ބަޔާން މިއުނިކަށް ކުޅެމުން އަންނަ އިންގްލެންޑުގެ ފޯވާޑް ހެރީ ކޭން އާއި ޖަރުމަނުގެ ގުއިލިއާ ގުވިން، 2026 ވަނަ އަހަރުގެ ޖަރުމަނުގެ އެންމެ މޮޅު ފުޓްބޯޅަ ކުޅުންތެރިންގެ އެވޯޑު ކާމިޔާބުކޮށްފިއެވެ.

މީގެ އިތުރުން އެންމެ މޮޅު ކޯޗުގެ މަގާމު ހޯދީ ބަޔާންގެ ކޯޗު ވިންސެންޓް ކޮމްޕެނީއެވެ.

Ad
rt

ޖަރުމަނުގެ ސްޕޯޓްސް ޖާނަލިސްޓުންގެ އެސޯސިއޭޝަން (ވީޑީއެސް) ގެ މެންބަރުންގެ މެދުގައި ކިކާ މަޖައްލާއިން ނެގި އަހަރީ ވޯޓުގެ ނަތީޖާއިން ދައްކާގޮތުގައި، ކޭން އެވޯޑު ކާމިޔާބުކުރީ 272 ވޯޓު ހޯދައިގެންނެވެ. އޭނާއާ އެންމެ ގާތުން ވާދަކުރި ޓީމުގެ ކުޅުންތެރިޔާ މައިކަލް އޮލީސޭ އަށް 203 ވޯޓު ލިބުނުއިރު، ސްޓުޓްގާޓްގެ ޑެނިޒް އުންދާވް އަށް ލިބުނީ 61 ވޯޓެވެ. ކޭން ވަނީ ވޭތުވެދިޔަ ސީޒަނުގައި ހުރިހާ މުބާރާތެއްގައި 61 ލަނޑު ޖަހައި، ބަޔާން އަށް ބުންޑެސްލީގާ އަދި ޖަރުމަން ކަޕް ކާމިޔާބުކޮށްދިނުމުގައި މުހިންމު ދައުރެއް އަދާކޮށްފައެވެ.

އަންހެން ކުޅުންތެރިޔާގެ އެވޯޑު 106 ވޯޓާއެކު ގުވިން ހޯދިއިރު، އޭނާ ވަނީ ބަޔާންގެ ކްލާރާ ބުއެލް އާއި ފްރާންސްގެ ލިޔޯން އަށް ކުޅޭ ޖޫލް ބްރޭންޑް ފަހަތަށް ޖައްސާލާފައެވެ. ގުވިން އާއި ބުއެލް ވަނީ ވޭތުވެދިޔަ ސީޒަނުގައި ބަޔާންގެ އަންހެން ޓީމަށް ޖެހިޖެހިގެން ދެވަނަ އަހަރަށް ލީގާއި ކަޕް ކާމިޔާބުކޮށްދީ، ވިމެންސް ޗެމްޕިއަންސް ލީގުގެ ސެމީ ފައިނަލަށް ޓީމު ގެންގޮސްދީފައެވެ.

އެންމެ މޮޅު ކޯޗުގެ އެވޯޑު ބަޔާންގެ ކޮމްޕެނީ ހޯދީ ޖުމްލަ ވޯޓުގެ ގާތްގަނޑަކަށް ދެބައިކުޅަ އެއްބައި ކާމިޔާބުކޮށް، ފްރެއިބާގްގެ ހޫލިއަން ޝޫސްޓާއާ ވާދަކޮށްގެންނެވެ.