އީރާނާ ގުޅުން އޮންނަ ހެކަރުން އިނގިރޭސިވިލާތް (ޔޫކޭ) ގެ ކުޑަ ކަރަންޓު އުފައްދާ މަރުކަޒަކަށް ވަރުގަދަ ސައިބާ ހަމަލާއެއްދީ، ހަތަރު ދުވަހުގެ މުއްދަތަށް އެ ތަނުގެ މަސައްކަތްތައް މުޅިން ހުއްޓުވާލާފައިވާ ކަމަށް ރިޕޯޓުތައް ބުނެފިއެވެ.
މިއީ އިނގިރޭސިވިލާތުގެ ހަކަތަ ފޯރުކޮށްދޭ މިފަދަ ވަސީލަތަކަށް އީރާނުގެ ހެކަރުން މިހާތަނަށް ކާމިޔާބުކަމާއެކު ދިން އެންމެ ބޮޑު މިފަދަ ހަމަލާ ކަމަށް މީޑިއާތަކުން ސިފަކުރެއެވެ.
އިނގިރޭސިވިލާތުގެ 'ދަ ޓެލެގްރާފް' އިން ރިޕޯޓުކޮށްފައިވާ ގޮތުގައި މި ހާދިސާ ހިނގާފައިވަނީ ޖުލައި 2026 ގައެވެ. ސަލާމަތީ ސަބަބުތަކަށްޓަކައި ހަމަލާ އަމާޒުވި މަރުކަޒުގެ ނަން ހާމަކޮށްފައި ނުވި ނަމަވެސް، އެއީ ނިސްބަތުން ވަރަށް ކުޑަ މަރުކަޒެއް ކަމަށް އޮފިޝަލުން ވިދާޅުވެއެވެ. މި ހަމަލާގެ ސަބަބުން އިނގިރޭސިވިލާތުގެ މުޅި ގައުމީ ގްރިޑަށާއި، އާންމުކޮށް ކަރަންޓު ފޯރުކޮށްދިނުމުގެ ނިޒާމަށް އެއްވެސް އަސަރެއް ކޮށްފައެއް ނުވެއެވެ.
"ޔޫކޭގައި އޮތީ ވަރަށް ވަރުގަދަ އަދި ވިލުންވެރި ހަކަތައިގެ ނިޒާމެއް. މި ހާދިސާއަކީ ވަރަށް ކުޑަ މަރުކަޒަކަށް ކުރިމަތިވި ކަމެއް، އަދި މުޅި ގައުމުގެ ހަކަތައިގެ ނިޒާމަށް މީގެ ސަބަބުން އެއްވެސް ނުރައްކަލެއް ނެތް" ޔޫކޭ ސަރުކާރުގެ ތަރުޖަމާނަކު ވިދާޅުވެފަވެއެވެ.
އެ މަރުކަޒުގެ މަސައްކަތްތައް އަލުން އިއާދަކުރުމަށް މުވައްޒަފުންނަށް ހަތަރު ދުވަސް ހޭދަވިއެވެ.
މި ހާދިސާ ވަނީ ޔޫކޭގެ ނޭޝަނަލް ސައިބާ ސެކިއުރިޓީ ސެންޓަރު (އެންސީއެސްސީ) އަށް ރިޕޯޓުކޮށްފައެވެ. އަދި ސަރުކާރުން ވަނީ ހަކަތަ އުފައްދާ ކުންފުނިތަކުގެ ވެރިންނާ ބައްދަލުކޮށް، ސައިބާ ރައްކާތެރިކަމާ ގުޅޭ އިރުޝާދުތައް ދީފައެވެ. މި ހަމަލާއަކީ އާންމުންނަށް ބޮޑު ގެއްލުމެއް ދިނުމަށްވުރެ ބޮޑަށް، ނާޒުކު ނިޒާމުތަކަށް ވަދެގަތުމުގެ ގާބިލުކަން ދައްކާލުމުގެ ގޮތުން ދިން ހަމަލާއެއް ކަމަށް ބެލެވެއެވެ.
މި ހަމަލާ ހިނގާފައިވަނީ އެމެރިކާގެ 12 ސްޓޭޓެއްގެ ފެނުގެ ވަސީލަތްތަކަށް އީރާނާ ގުޅުންހުރި ހެކަރުން ދިން ސައިބާ ހަމަލާތަކަކާ ވެސް އެއް ދުވަސްވަރެއްގައެވެ. މި މައްސަލައާ ގުޅޭގޮތުން އީރާނު ސަރުކާރުން އަދި ރަސްމީކޮށް އެއްވެސް އެއްޗެއް ހާމަކޮށްފައެއް ނުވެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!