އެމެރިކާއާއި އީރާނާ ދެމެދު އުފެދިފައިވާ ހަމަނުޖެހުންތަކަށް ހަތަރު ރޭ ވަންދެން މެދުކެނޑުމެއް އައުމާ ގުޅިގެން، އޭޝިއާގެ ބާޒާރުގައި މިއަދު ތެލުގެ އަގު ދަށަށް ގޮސްފިއެވެ. މިއީ ދެ ގައުމުގެ ދެމެދުގައި އެއްވެސް ހަމަލާއެއް ބަދަލުނުކޮށް ފާއިތުވި ހަތަރު ވަނަ ރެއެވެ.

މި ވަގުތުގެ ރޭޓްތަކަށް ބަލާއިރު، ޑަބްލިޔުޑީއައި ކްރޫޑް ބަރަަލަކަށް 80.98 ޑޮލަރަށް ވަނީ ތިރިވެފައެވެ. މިއީ 1.97 އިންސައްތައިގެ ދަށްވުމެކެވެ. ހަމައެއާއެކު ބްރެންޓް ކްރޫޑްގެ އަގު 1.77 އިންސައްތަ ދަށްވެ، ބަރަަލަކަށް 86.80 ޑޮލަރަށް ވަނީ ތިރިވެފައެވެ.

Ad
rt

އެމެރިކާގެ ރައީސް ޑޮނަލްޑް ޓްރަމްޕް ހޯމަ ދުވަހު ވިދާޅުވީ އީރާނާއެކު "ރަނގަޅު ވާހަކަތަކެއް" ދެކެވެމުންދާ ކަމަށާއި، ޑިޕްލޮމެޓިކް ހައްލެއް ފެނުމުގެ އުންމީދު ބޮޑު ކަމަށެވެ. އީރާނުގެ އޮފިޝަލުންވެސް މިކަމަށް ތާއީދުކުރައްވާފައިވީ ނަމަވެސް، ޑިޕްލޮމެޓިކް މަސައްކަތްތައް ނާކާމިޔާބުވެއްޖެނަމަ އަލުން ހަމަލާ ބަދަލުކުރަން ތައްޔާރަށް ތިބިކަމަށް ދެ ފަރާތުންވެސް ވަނީ ހާމަކޮށްފައެވެ.

މަސްރަހު ކޮންމެވެސް ވަރަކަށް ފިނިވި ނަމަވެސް، މެދުއިރުމަތީގެ ހަކަތަ ފޯރުކޮށްދޭ މަގުތަކަށް ހުރަސްތަކެއް ކުރިމަތިވަމުންދާތީ ތެލުގެ އަގު އަދިވެސް ހުރީ ނިސްބަތުން މަތީގައެވެ. ހާއްސަކޮށް ހޫތީން ރަތް ކަނޑުގެ ދަތުރުފަތުރަށް ހުރަސްއަޅަމުންދާތީ ކަންބޮޑުވުންތައް އެބަހުއްޓެވެ. އާދިއްތަ ދުވަހު ސައުދީގެ ތެޔޮ ކާރުޚާނާތަކަށް ހޫތީން ދިން ހަމަލާއަކާ ގުޅިގެން ބާބުލް މަންދަބް ކަނޑުއޮޅިން ކުރާ ދަތުރުތައް ވަނީ މަދުވެފައެވެ.

ތެލުގެ އަގު ދަށަށް ދިއުމަށް މެދުވެރިވި އަނެއް ސަބަބަކީ ތެލަށް އޮތް ޑިމާންޑް ދަށްވުމެވެ. ބަރަަލަކަށް 100 ޑޮލަރަށް އަގު އެރުމުން ތެޔޮ ބޭނުންކުރާ މިންވަރު ވަނީ މަދުވާން ފަށާފައެވެ. މިދިޔަ ހަފުތާގައި އީ.އައި.އޭ އިން ނެރުނު ރިޕޯޓްތަކުން ދައްކާ ގޮތުގައި ތެޔޮ ރައްކާކޮށްފައި ހުރި މިންވަރު ވަނީ އިތުރުވެފައެވެ. މިއީ ޑިމާންޑް ދަށްވަމުންދާކަމުގެ ނިޝާނެއް ކަމަށް މާހިރުން ދެކެއެވެ.

ކުރިއަށް އޮތް ތަނުގައިވެސް ތެލުގެ ބާޒާރު ބިނާވެފައި އޮންނާނީ މެދުއިރުމަތީގެ ސިޔާސީ މަސްރަހުގެ މައްޗަށެވެ. މަސްރަހު އިތުރަށް ގޯސްވެއްޖެނަމަ އަގުތައް އުފުލިގެންދާނެއެވެ. ނަމަވެސް ޑިޕްލޮމެޓިކް ހައްލެއް ފެނިއްޖެނަމަ އަގުތައް އިތުރަށް ތިރިވާނެ ކަމަށް ބެލެވެއެވެ.