ވޯލްޑް ކަޕް ފުޓްބޯޅަ މުބާރާތުގެ ގަދަ 16 ގައި އާދީއްތަ ދުވަހު ނޯވޭއާ ދެކޮޅަށް ކުޅުނު މެޗުން 2-1 އިން ބަލިވެ، 1990 ވަނަ އަހަރަށްފަހު ބްރެޒިލް މުބާރާތުން ކެޓި އެންމެ ކުރީ މަރުހަލާއަށް މިފަހަރުގެ މުބާރާތް ވެއްޖެއެވެ. މި މެޗުގައި ބްރެޒިލަށް ލިބުނު މުހިންމު ޕެނަލްޓީއެއް ޖަހާނެ ކުޅުންތެރިއަކު އިޚްތިޔާރު ކުރުމުގައި ނިންމި ނިންމުމާމެދު މިހާރު ވަނީ ސުވާލު އުފެދިފައެވެ.

މެޗުގެ 14 ވަނަ މިނެޓުގައި ބްރެޒިލްގެ މަތިއަސް ކޫންހާއަށް އޭރިއާ ތެރެއިން ކުރި ފައުލަކާ ގުޅިގެން، ވީއޭއާރުގެ އެހީގައި ޕެނަލްޓީއެއް ދިނެވެ. އެ ވަގުތު ބޯޅަ ހިފައިގެން ހުރީ މި މުބާރާތުގައި ބްރެޒިލަށް އެންމެ ގިނަ ލަނޑު ޖަހައިދީފައިވާ ވިނީޝިއަސް ޖޫނިއާ އެވެ. ނަމަވެސް، ވިނީޝިއަސްގެ ބަދަލުގައި އެ ޕެނަލްޓީ ޖެހީ ބްރޫނޯ ގިމަރޭޒް އެވެ. ގިމަރޭޒް ފޮނުވާލި ޕެނަލްޓީ ނޯވޭގެ ކީޕަރު އޮރްޔަން ނައިލޭންޑް ވަނީ ދިފާއުކޮށްފައެވެ.

Ad
rt

މިއީ 1986 ވަނަ އަހަރަށްފަހު ވޯލްޑް ކަޕެއްގެ ފުރިހަމަ ވަގުތުގެ ތެރޭގައި ބްރެޒިލުން ނާކާމިޔާބުވި ފުރަތަމަ ޕެނަލްޓީއެވެ. ދުނިޔޭގެ ފެންވަރުގެ މޮޅު ފޯވާޑުން ޓީމުގައި ތިއްބާ، ގިމަރޭޒް ލައްވާ ޕެނަލްޓީ ޖެއްސުމަކީ ބްރެޒިލްގެ ސަޕޯޓަރުންގެ މެދުގައި ބޮޑު ބަހުސަކަށް ވެފައިވާ ކަމެކެވެ.

ބްރެޒިލް އަށް ލިބުނު ފުރަތަމަ ޕެނަލްޓީ ފޮނުވާލަނީ، މި ޕެނަލްޓީ ކީޕަރު ވަނީ ދިފާޢުކޮށްފައި، ފޮޓޯ: ގެޓީ އިމޭޖްސް

މެޗުގެ ފަހުކޮޅު ބްރެޒިލަށް ލިބުނު ދެވަނަ ޕެނަލްޓީއެއް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ނޭމާ އެވެ. މި ލަނޑާއެކު ނޭމާ ވަނީ ޕެލޭ ފިޔަވައި ހަތަރު ވޯލްޑް ކަޕެއްގައި ލަނޑު ޖެހި ހަމައެކަނި ބްރެޒިލް ކުޅުންތެރިޔާގެ ޝަރަފު ހޯދާފައެވެ. ނަމަވެސް، ނޭމާގެ ލަނޑު އައީ މާ ލަސްވި ފަހުން ކަމަށްވާތީ ބްރެޒިލަށް މެޗުގެ ނަތީޖާ އަނބުރާލެވޭ ގޮތެއް ނުވިއެވެ.

މިއީ 1990 ވަނަ އަހަރުގެ ވޯލްޑް ކަޕްގެ ގަދަ 16 ގައި އާޖެންޓީނާ އަތުން ބަލިވި ފަހުން، ބްރެޒިލް ކުއާޓާ ފައިނަލަށް ނުގޮސް މުބާރާތުން ވަކިވާން ޖެހުނު ފުރަތަމަ ފަހަރެވެ. ފަސް ފަހަރު ވޯލްޑް ކަޕް ކާމިޔާބުކޮށްފައިވާ ބްރެޒިލުން އެންމެ ފަހުން ތަށި އުފުލާލީ 2002 ވަނަ އަހަރުއެވެ.